Tito 3 - Kashibo-Kakataibo Biblia

Usaia axa Jesucristomi catamëcë unicama ꞌiti bana

¹ Axa Jesucristomi catamëcë unicama camina manuaxma ꞌinun ësaquinribi cati ꞌain: Aín ꞌapucama ꞌimainun aín cushicaman bana cuaquin ca atun cacësabi oquin ꞌati ꞌicën. Uisa ñu cara upí ꞌicë a ca chiquíshquinma ꞌati ꞌicën.

² Uinu ꞌicë unimibi ca ꞌatimati banatima ꞌicën. Bëtsi unibë cuëbicanancëma ꞌianan ca upí sinánñu uni ꞌaish rabiti cuamianantima ꞌicën.

³ Nuxribi cananuna sinánñuma ꞌaish Nucën Papa Diosan bana quicësabi oi ꞌiáma ꞌain. Usa ꞌaish cananuna ñu ꞌatimaishi ꞌanúan bëtsi unin sinánmicëxun ꞌanan nunbi sinani nux cuëëncësabi oi ñunshini ꞌiacën. ꞌAisama ñuishi ꞌanan cananuna bëtsi unimi nutsianan numia uni nishcëx abë nishanancën.

⁴ Usaínu ꞌiá ꞌicëbi ca Nucën Papa Dios, an nu ainan ꞌinun ië́miti, an, an ca upíira ꞌixun nu nuibatia quixun nu ꞌunánmiacëxa.

⁵ Usoquin ca nun ñu upí ꞌacë cupíma, nuibaquinshi nu ainan ꞌinun ië́miacëxa. Ië́miquin ca bacë́ntëcëncësa ꞌinun nun ꞌuchacama tërë́nquin aín Bëru Ñunshin Upitan nu bëtsi ocëxa.

⁶ Jesucristo, an nu ië́micë, a cupíshi ca Nucën Papa Diosan aín Bëru Ñunshin Upí nubëa ꞌiti oquin nu ꞌináncëxa.

⁷ Usa ꞌixun cananuna anbia nuibaquin nu ꞌaquinquin upí ꞌimicë cupí, abënu xënibua ꞌaínbi tsóti, a caínti ꞌain.

⁸ Ënë banacamax ca asérabi upí ꞌicën. Usa ꞌaían ax quicësabi oi camabi uni ꞌiti ca asábiira ꞌicën. Usa ꞌain camina axa ami catamëcë unicama Nucën Papa Dios cuëëncësabi oi ꞌiquian ënquinma ñu upíshi ꞌanun upí oquin ꞌësëti ꞌain.

⁹ Bëtsi bëtsi unix ca sinánxmaishi aín rara ꞌiá bana ñui bëtsi unibë cuëbicanánan, usaía judíos unicama ꞌitia Moisésnën cuënëo bana uisai quicë cara quixun ñui cuamianani bëtsibë nishánania. Usaía ꞌiabi camina mixribi usai ꞌiquinma atu isëshiti ꞌain. Usai ꞌiquin upí oquin sinani banacëma ꞌixun ca unin bëtsi uni upitaxa ꞌinun ꞌaquinima.

¹⁰ Uinu ꞌicë unin cara axa Jesucristomi catamëcë unicama bëtsin sináncësa oquian sinánunma amanu amanu sinánmia, a camina usai ꞌiaxma ꞌinun quixun caquin ꞌësëti ꞌain. Cacë́xbia sinanatiama camina amiribishi catëcënti ꞌain. Cacëxunbia cuatiama camina mitsubëa ꞌinúnma ënti ꞌain,

¹¹ ax upí sinánñu ꞌiá ꞌaíshbi ca bërí usama ꞌicë quixun ꞌunánquin. Aín ñu ꞌaisama ꞌacë sinanaquin ëncëma cupí camina usoquin ꞌati ꞌain.

Ësaquinribia Pablonën Tito cá bana

¹² Nicópolisnuxun mita inúmiti cana sinanin. Usa ꞌain, Artemas carana xuti ꞌain, Tíquico carana xuti ꞌain, xucëbë camina panatima Nicópolisnu ꞌë isi uti ꞌain.

¹³ Ucëma pain ꞌixun camina an bana ꞌunánquin unicama ꞌësëcë uni, Zenas, abëtan Apolonën cuanuxun aín ñu mëníoia ꞌaquinti ꞌain. ꞌAquianan camina cuania uisa ñu cara cuëënia a ꞌinánti ꞌain.

¹⁴ Usa ꞌain camina axa Jesucristomi sináncë unicaman upí ñuishi ꞌanan bëtsi uniribi ꞌaquinsa ꞌicë ꞌaquinun sinánmiti ꞌain, usaquin ꞌaquian uni raíriribi Jesucristomi catamënun ꞌaquinun.

Upí oquin sinánxunquian ashiquin Pablonën bërúanxa ꞌinun ca

¹⁵ ꞌËbë ꞌicëcaman ca camaxunbi bërúanxmi ꞌicanun mitsu canun quixun ꞌë caxa. Uicaman cara nuxnu Jesúsmi sináncë ꞌicë nu nuibatia acama camina bërúanxa ꞌinun cati ꞌain. Nucën Papa Diosan micama nuibaquin ꞌaquincëxmi upitax ꞌiti cana cuëënin. Ashi, Pablo.