Tito 2 - Kashibo-Kakataibo Biblia

Uisai cara uni upí ꞌiti ꞌicë quicë bana

¹ Usa ꞌaínbi camina, an upí oquin min bana cuacë unicama a Nucën Papa Dios cuëëncësabi oishía ꞌinun bëtsi bana ñuixunquinma Jesucristo ñuicë banaishi upí oquin ñuixunti ꞌain.

² Uni apan, anpan mëcócama, ax ca paë́ncëma ꞌianan upí oquin sinánquin ñu ꞌanan ñu ꞌaisama ꞌacëma ꞌiti ꞌicën. ꞌIanan ca Nucën Papa Diosan bana quicësabi oi ꞌianan bëtsibë nuibanan an uisa ñu cara ꞌicëbëbi bënë́quin Nucën Papa Diosmi catamëti ëntima ꞌicën.

³ Xanu apáncama camina usaribi oquin cati ꞌain, ami sinani ca Nucën Papa Dios cuëëncësabi oi upí nuituñu ꞌiti ꞌicë quixun. Bëbu ꞌimainun xanunbi ca cëmë bana ñuitima ꞌicën. Ca paë́ntima ꞌicën. Atúan aín sinan upí ꞌixun ñu upí ꞌaia isquin ca atun xanu tuácama ꞌimainun atun ñe xutacamanribi usaribi oquin ꞌati ꞌicën.

⁴ Xanu apáncaman ca ësai ꞌiquin aín tuá ꞌimainun aín ñe xutacamaribi ësaía ꞌinun ꞌunánmiti ꞌicën: atun bënë nuibanan ca atun tuáribi nuibaquin bërúanti ꞌicën.

⁵ Ñu ꞌaisama ꞌacëma ꞌianan ca bëcántapun ꞌitima ꞌicën. ꞌIanan ca aín xubu upí oquin bërúancë ꞌianan upiti abë cananquin bëtsi xanu ꞌaquincë ꞌiti ꞌicën. Aín bënën bana ca cuati ꞌicën. Unínma Nucën Papa Diosan bana ca upíma ꞌicë quixun caia, usa ꞌain ca an aín bana cuacë xanucamax usai ꞌi upí ꞌiti ꞌicën.

⁶ Usaribi oquin camina uni bënácamaribi upí oquin sinánquian ñu upíshi ꞌanun cati ꞌain.

⁷ ꞌImainun camina minribi min ꞌaia isquian usaribi oquin unin ꞌanun upí ñuishi ꞌati ꞌain. Atu ꞌësëquin camina amanu amanua sinánquinma upí oquin Nucën Papa Diosan bana quicësabi oquin ꞌunánmiti ꞌain.

⁸ ꞌUnánmiquin camina upí oquin ꞌunánquin Nucën Papa Diosan bana quicësabi oía ꞌinun upí oquin unicama ñuixunti ꞌain, bëtsi unían —min bana ca ꞌaisama ꞌicë —quixun ñuiti rabanan. Usoquinmi ꞌacëbë ca axa mimi nishtisa tancë unicama ax a cupía mi ñuiti bana ꞌaíma ꞌain, rabínti ꞌicën.

⁹ ꞌAnan camina an uni ñu mëëxuncë unicamaribi ꞌësëquin an a ñu mëëmicë unin bana parë́quin cuëbíquinma, an cacësabi oquin ꞌanun cati ꞌain.

¹⁰ ꞌAnan camina a unicama ësaquin ꞌunánmiti ꞌain, an iscëxun ꞌananbia an ñu mëëmicë unían iscëxunmabi, ñu mëcamaquinma upí oquinshi ñu mëënun. Atúxa usai ꞌicëbëtan ca camabi unin —Nucën Papa Dios, an uni ainan ꞌinun ië́micë, aín unicamax ca asérabi upí ꞌicë —quixun ꞌunánti ꞌicën.

¹¹ Nucën Papa Diosan ca camabi uni nuibaquin ꞌaquinquin abëa upí ꞌinun ꞌiminuxun aín Bëchicë ënë menu xuacëxa, unían uisaira oquin cara an atu nuibatia quixun ꞌunánun. Usa ca Nucën Papa Dios ꞌicë quixun ꞌunáncë ꞌixun camina ꞌën mi cacësabi oquin unicama ꞌunánmiti ꞌain.

¹² Nucën Papa Diosan ca nu ꞌunánmia, nux aín uni ꞌaish cananuna abë upí ꞌaish ax cuëëncëma ñu ꞌati ëni, upíshi ꞌianan axa ami sináncëma unicamaxa ꞌicësai ꞌiti sinanima, ꞌianan ami cushicë ꞌixun, añu ñucama nun ꞌati cara cuëënia ashi ꞌati ꞌai quixun.

¹³ Usaquin ꞌunánmianan ca nu ꞌunánmia, nux ainan ꞌixun cananuna ax quiásabi oía an nu ië́micë Jesucristo, ax Nucën Papa Diosribi ꞌaish, aín cushibëbi utëcënti nëtë caínti ꞌai quixun.

¹⁴ Jesucristo ca ꞌitsianxmabi nu cupí bamacëxa, nun ꞌuchacama tërë́nxunquin Nucën Papa Diosbë upí ꞌinun ië́mianan nun sinan upí ꞌixúnu bëtsi ñu sinántëcënquinma ax cuëëncësabi oquinshi ꞌanun.

¹⁵ ꞌËn mi cacë banacama ënë camina unicama ꞌunánmiti ꞌain. Atúxa, asérabi ca a bana icë quixun sinani racuëtima Jesucristomi cushicë ꞌinun ꞌësëanan camina atúan ꞌaisama ñu ꞌaxunma ꞌanun caquin ꞌësëti ꞌain. Usoquin ꞌaquin camina ui unínbi mi timaquin min bana cuaisama tanun ꞌimitima ꞌain.