Tito 1 - Kashibo-Kakataibo Biblia

Pablonëan Tito quirica cuënëoxuan

¹ ꞌËx cana Pablo, an Nucën Papa Dios cuëëncësabi oquin ꞌanan Jesucristonëan a ñuiquin aín bana ñuixunun caísa ꞌain. Usa ꞌaish cana ꞌëx, uisai cara a Nucën Papa Diosan ainan ꞌinun caísa unicama Jesucristomi catamëti upí ꞌiti ꞌicë quixun ꞌunánmicë uni ꞌain.

² Usa ꞌixun cana ainan ꞌaish ca uni xënibua ꞌaínbi aín nëtënu abë ꞌiti ꞌicë quixun unicama ꞌunánmin. Ax asérabi cëmëma ꞌaish ca Nucën Papa Dios bëráma, me ꞌimainun camabi ñu uniosama pain ꞌaíshbi, ësai ca ꞌën unicama ꞌën nëtënu ꞌëbë ꞌiti ꞌicë quiax quiacëxa.

³ An mëníosabi oquin ca anúan unicama ënë ñucama ꞌunánti nëtëa ꞌicëbëtan aín unicaman bana ñuixuncëxun camabi unin cuanun mëníoquin, ꞌënribi uni aín bana ñuixunun Nucën Papa Diosan ꞌë caísacëxa. An ca Cristomi catamëtia ainan ꞌinun unicama iëmia.

⁴ Tito, ꞌën cana ënë quirica mi buanmin. ꞌËx ami sináncësaribi oi mixribi Jesucristomi sináncë ꞌaish camina ꞌën bëchicësa ꞌain. Nucën Papa Dios ꞌimainun Nucën ꞌIbu Jesucristo, an nu ainan ꞌinun ië́micë, an nuibacëxmi ainan ꞌaish chuámarua ꞌiti cana cuëënin.

Creta nasínuxun Titon usoquin ñu ꞌa

⁵ Anuax uquin cana nun nu sënë́oncëma ñucama ami sënë́onun Creta nasínu mi ëbëtsían, anuxunmi ꞌën mi cacësabi oquin ëmacamanu cuanquin, uicamax cara axa Jesucristomi catamëcë unicaman cushi ꞌiti ꞌicë quixun caístancëxun anënun.

⁶ Axa Jesucristomi catamëcë unicaman cushi ꞌinun camina ësa uni caísti ꞌain: Unin —ꞌaisama ca —quixun ñuicëma ca ꞌiti ꞌicën. Usa ꞌianan ca xanu achúshiñuishi ꞌiti ꞌicën. ꞌIanan ca aín bëchicëcamaxribi upí oquin bana cuacë ꞌiti ꞌicën. Aín bëchicëcamax ca —bana cuacëma ꞌixun ca ꞌaisama ñu ꞌaia —quixuan unin ñuicëma ꞌiti ꞌicën.

⁷ Usa ꞌicëmi mitsun caíscë unicaman ca atun cushi ꞌixun aín unicama Nucën Papa Dios cuëëncësabi oquin bërúanti ꞌicën. Usa ꞌaish ca upí ñuishi ꞌai —ñu ꞌaisama ca ꞌaia —quixuan unin ñuicëma ꞌiti ꞌicën. ꞌIanan ca bëtsi uni ñuuma ca quixun sinánquin ashi ñu ꞌaxunun cacë ꞌitima ꞌicën. ꞌIanan ca bënëtishi masáquin sinani nishtima ꞌicën. ꞌIanan ca paë́ntima ꞌicën. ꞌIanan ca unibë mëëananti sinánñu ꞌitima ꞌicën. ꞌIanan ca curíquiñu ꞌinuxun uni paránti sinántima ꞌicën.

⁸ Usai ꞌiquinma ca a isi aia cuëënquin uni biti ꞌicën. Añu ñucamax cara upí ꞌicë ashi ꞌati ca sinánti ꞌicën. Upí oquin sináncë ꞌixun ñu ꞌatima ꞌacëma ca ꞌiti ꞌicën. Nucën Papa Diosan bana quicësabi oi ca ꞌaisama ñu ꞌaíma upíshi ꞌiti ꞌicën.

⁹ Atun ca nun ñuixuncë bana upí oquin cuacë ꞌixun bëtsi uniribi a bana cuanun ꞌunánmiti ꞌicën. ꞌUnánmianan ca a bana ca cëmë ꞌicë quixuan an sináncë unicamaribi sinanamiti ꞌicën.

¹⁰ ꞌItsa unix —ꞌëx cana Nucën Papa Diosan bana cuati —quicë ꞌaíshbi ca a bana quicësabi oi ꞌima. Usa ꞌixun ca uni parania. Uni itsíxa usari ꞌicësamaira oi ca judíos unicama raírinëx ꞌia.

¹¹ A unicaman ca curíqui biti cupíshi unicama parántisa tanquin bëtsi bana ñuixunquin, bëtsi bëtsi uni ꞌimainun aín xubunu ꞌicëcamaribi, atun sináncësa oquian sinánun quixun sinánmia. A unicama camina amiribishi uni parántëcëanxma ꞌinun cati ꞌain.

¹² Cretanu ꞌicë uni achúshi, ax isa banati ꞌunáncë ꞌicë quixuan aín aintsicaman cacë, ax ca aín aintsicama ñui ësai quiaxa: “Cretanu ꞌicë unicamax ca usabi cëmëcë ꞌianan, ñuina pianancësa ꞌianan ñu mëëtisama tancë ꞌianan ꞌaisamaira oquin picë ꞌicën”.

¹³ A unían aín aintsi ñuicë bana ax ca asérabi ꞌicën. Usa ꞌain camina a unicama ꞌësëquin Nucën Papa Diosan bana upí oquin cuatía a bana quicësabi oi ꞌinun upí oquin sinanamiti ꞌain.

¹⁴ Unin sináncësa oquinshia judíos unicaman anbi sinánxun ñuiá bana cuaxunma ꞌanun camina sinánmiti ꞌain. Sinánmianan camina an Nucën Papa Diosan bana cuaisama tancë unin cëmëquin ñuicë banaribi cuaxunma ꞌanun upí oquin sinánmiti ꞌain.

¹⁵ Ënëx ca ësa ꞌicën. Ui unix cara aín sinan upí ꞌicë an ca ñu upíma isquinbi upí oquinshi sinania. Usa ꞌaínbi ca ui unix cara Nucën Papa Diosmi sináncëma ꞌianan aín sinan upíma ꞌicë, an upí ñu isquinbi ꞌatima ñuishi sinania. Aín nuitu ꞌaisama ꞌixun ca usa unin ꞌatimaquin sinania.

¹⁶ Atúxa —ꞌëx cana Nucën Papa Diosan uni ꞌai —quiabi ca an ñu ꞌaisama ꞌaia iscë unicaman —usama ca —quixun ꞌunania. Atúan ñu ꞌaisama ꞌacë cupí ca unin atu cuëënima. A unicaman ca bana cuacëma ꞌixun ñu upí ꞌati sinanima.