Santiago 5 - Kashibo-Kakataibo Biblia

Ñuñu uni usai ꞌiti ca ꞌaisama ꞌicë quicë bana

¹ Ñuñuira unicama, mitsúnribi camina ꞌën cacëxun cuati ꞌain. Mitsúxmi ꞌaisamaira ñuñu ꞌianan curíquiñu ꞌaish, a cupí tëmërati sinani camina masá nuituti inti ꞌain.

² Mitsun curíqui ꞌimainun mitsun ñucamaribi ca chëquiisa ꞌicën, mitsun chupa upíburibi ca nacuaxan piisa ꞌicën.

³ Mitsun manë ñu curi ꞌacë ꞌimainun manë uxua ꞌacë, mitsun curíquicamaribi ca puibuisa ꞌicën. Usa ꞌaish ca a ñucama chëqui nëtë́ti ꞌicën. Tsin nëncë́xa ñu nëtë́cësa usaribitia mitsun ñucama nëtë́mainun camina mitsúxribi tëmërati ꞌain. Nucën ꞌIbu Jesucristo utëcënti ꞌurama ꞌaínbi camina ñuñu ꞌitishi sinánquin mitsunainshia ꞌinun ñu bucúnruan.

⁴ An mitsu naënuxun ñu mëëxuncë uni camina cupíocëma ꞌain. Cupíocëma ꞌaish ca mitsu ñui banaia. Usaquian mitsu ñuia ca ángelcaman ꞌapu, Nucën ꞌIbu Dios, an cuaxa.

⁵ Ënë menuax camina ꞌaisamaira ñu upíñu ꞌaish mitsux cuëëncësabi oi ꞌian. Usa ꞌaish camina aín ꞌibúan ꞌaracacë ñuina anun ꞌati nëtë sënë́ncëbëtan ꞌanuxun rëracamicësa ꞌain.

⁶ Mitsun camina ꞌuchañuma unibi ꞌuchoquin ꞌan. Usoquinmi ꞌacëxunbi ca atun mitsu cupicëma ꞌicën.

Uisai cara ñu ꞌicëbëbi bënëtima Nucën Papa Diosbë banati

⁷ ꞌËn xucë́antu, Nucën ꞌIbu Jesucristo utámainun camina tëmëraibi bënë́quinma anúan uti nëtë caínti ꞌain. An ñu ꞌapácë unin ca ñu ꞌapátancëxun anun aín bimi biti nëtë sënë́ntamainun cainia. Usa ꞌixun ca mitabutancëxa sënë́ncëbëtan ñu ꞌapátancëxun bënë́quinma canitancëxuan tuaia aín bimi binuxun cainia.

⁸ Usaribi oquin camina mitsun, —Nucën ꞌIbu Jesucristo anun utëcënti nëtë ca ꞌurama ꞌicë —quixun sinánan masá nuituti bënëtima cuëënquin caínti ꞌain.

⁹ ꞌËn xucë́antu, Nucën Papa Diosan anun camabi uni aín nuitu ꞌunánquin uisoquin cara ñu ꞌaxa quixun isti nëtë ꞌurama ꞌain, camina mitsúxmi an ꞌuchocëma ꞌinun, uni raíribë ñuianani nishanantima ꞌain.

¹⁰ ꞌËn xucë́antu, camina an Nucën ꞌIbu Dios quicë bana uni ñuixuncë unicama ꞌiásaribiti ꞌiti ꞌain. Atun ca tëmëraquinbi bënë́quinma tanshiacëxa.

¹¹ Uicaman cara tëmëraquinbi bënë́quinma tanshitia ax ca upí oquinshi sinani cuëënia quixun cananuna ꞌunanin. Mitsun camina Jobnëxa ꞌaisamaira tëmëraibi Nucën ꞌIbu Diosmi catamëa a bana ñuia cuan. Cuacë ꞌixun camina ꞌunáncanin, uisaira oquin cara Nucën ꞌIbu Dios an nuibaquin uni ꞌaquincë ꞌixun a uni ꞌaquiancëxa quixun.

¹² ꞌËn xucë́antu, bëtsi banacama cuaquinbi camina ënë banaira sinánti ꞌain. Mitsux camina mitsun bana isa asérabi ꞌicë quixun unin cuanun —naitanbi cuamainun cana mi cain —quianan —menbi cuamainun cana mi cai —quitima ꞌain. Uisa ñubi cara, a ñui camina —cana asérabi mi cai —quiax quitima ꞌain. Usai quima camina asérabi banáinshi banati ꞌain, Nucën Papa Diosan mitsu ꞌuchotima cupí.

¹³ Micama uinu ꞌicëx caramina masá nuituti bëtsi sinani camina Nucën Papa Diosbë banati ꞌain. Micama uinu ꞌicëx caramina cuëëni chuámarua tani camina Nucën Papa Dios rabi cantati ꞌain.

¹⁴ Uix cara ñucë ꞌicë, anribi ca Jesucristomi catamëcë unicaman cushicama camiti ꞌicën, xëni ron ꞌaquian, an pëxcunun Nucën ꞌIbu Jesucristo ñucáxuni unun.

¹⁵ Asérabi ca an ënë uni pëxcuti ꞌicë quixun sinánquinmi a ñucáxuncëxun ca Nucën ꞌIbu Jesucristonën ñucë uni pëxcuti ꞌicën. Pëxcüanan ca aín ꞌuchacama tërë́nxunti ꞌicën.

¹⁶ Usa ꞌain camina mitsúnmi min ꞌatimaquin sináncë a ñuixuananquin abëmi Jesucristomi catamëcë uni raíribë mia usa ñucama mëníoxunun Nucën Papa Dios ñucáxuananti ꞌain. Upíira oquin sinánquin ñucácë cupí ca Nucën Papa Diosan upí oquin uni ꞌaquinti ꞌicën.

¹⁷ Elías, an Nucën Papa Dios quicë bana unicama ñuixuncë uni, an ca nusaribi uni ꞌixunbi ꞌuía ꞌibuaxma ꞌinun Nucën Papa Dios ñucácëxa. Usa ꞌain ca an ñucácësabi oi rabë́ ꞌimainun achúshi baritia, ꞌimainun achúshi mëcën ꞌimainun achúshi ꞌuxën ꞌuí ꞌibuama ꞌicën.

¹⁸ Usaía ꞌicëbëtan Nucën Papa Dios amiribishi ñucátëcëncëbëa, ꞌuí ꞌibútëcëncëbë ca menu ꞌicë ñucama cotëcëni bimiacëxa.

¹⁹ ꞌËn xucë́antu, micama achúshinën Nucën Papa Diosan bana ëncë ꞌicëbi bëtsi uni sinanamiquin ami catamëtëcënun ꞌimicëbëtan,

²⁰ camina ꞌunánti ꞌain, ui unin cara usoquin uni ꞌuchañu ꞌicëbi sinanamia, an ca a uni Nucën Papa Diosnan ꞌinun ië́cë ꞌianan aín ꞌuchacama tërë́ncë ꞌinun ꞌimiti ꞌicë quixun. Ashi, Santiago.