Santiago 4 - Kashibo-Kakataibo Biblia

An ënë menu ꞌicë ñuishi sináncë unicamasaribi ꞌitima bana

¹ ¿Uisa cupí caramina mitsúxbi nishananan ñu cananin? Mitsúnbi bëtsi bëtsi ñu ꞌatimaquin sinani camina usai ꞌicanin.

² Mitsun cuëëncë ñu bicasi bënë́quinbi bicëma ꞌixun camina binuxun ami nishquin uni itsi ꞌacësa ꞌain. Usa ꞌixun bëtsi uni ꞌicësaribiti ñuñu ꞌiisa tani bënë́quinbi bicasmati camina nishananan mëëananin. Usai ꞌiquinbi camina Nucën Papa Diosmi ñucácëma cupí mitsun cuëëncë ñu bitsiman.

³ Ñucáquinbi camina ami ñucácë ñu a bitsiman, ax cuëëncësabi oquinmami mitsux cuëëncësa oquinshi Nucën Papa Dios ñucácë cupí.

⁴ Nucën Papa Diosmi manúxunmi mitsun cuëëncësa oquinshi ꞌaia cana ësaquin mitsu cain: ¿Mitsun caramina ꞌunaniman, ënë menu ꞌicë ñuishi sináncë ꞌaish ca uni Nucën Papa Diosbë upíma ꞌicë quixun? Uinu ꞌicë unin cara ënë menu ꞌicë ñuishi sinania ax ca ainanma ꞌaish Nucën Papa Diosmi nishcësa ꞌicën.

⁵ Nucën Papa Diosan bana cuënëo ax ca ësai quia: “Nucën Papa Diosan ca ainan ꞌicë nu ñuñaia. Usa ꞌain ca an nubë ꞌinun nu ꞌináncë aín Bëru Ñunshin Upí ax bëtsi ñu ꞌaquinmanu ax cuëëncësa oquinshi ꞌati cuëënia”. A banax ca asérabi ꞌicën. Usa ca ax ꞌicë quixunu ꞌunánti oquin ca Nucën Papa Diosan aín uni usoquin cuënëomiacëxa.

⁶ An nu sinánmicë ñuishi nun ꞌanun ca Nucën Papa Diosan nu ꞌaquintancëxun nuibaquin nua ꞌaquincë usamaira oquin ꞌaquintëcënia. Usa ꞌain ca aín bana ësai quia: “Nucën Papa Diosan ca axa rabícë unicama a timanan axa —ꞌëx cana usa ꞌai —quiax rabícëma unicama nuibaquin ꞌaquinia”.

⁷ Usa ꞌain camina Nucën Papa Diosan bana cuati ami catamëti ax cuëëncësabi oishi ꞌiti ꞌain. Usai ꞌiquin camina ñunshin ꞌatimanëan ꞌatima ñu ꞌati mitsu sinánmisa tancëxunbi a ñu ꞌati tënëquin ꞌatima ꞌain. Usai ꞌia ca ñunshin ꞌatimanën ubíoquinma mitsu ënti ꞌicën.

⁸ Asérabi upiti ami sinani Nucën Papa Diosbë banaquin camina an nuibaquin sinánmicëxun, ax ca mitsubë ꞌicë quixun mitsun nuitu mëu upí oquin ꞌunánti ꞌain. An ñu ꞌaisama ꞌacë unicama, cana mitsu cain: Unia aín mëcën chuañuma ꞌinun mëchucacësaribiquin ca min sinan upí ꞌinun min ñu ꞌatima ꞌacëcama ën. —Nucën Papa Diosnan cana ꞌai —quicë ꞌixunbi ainanma unicaman ꞌacësaribi oquin ënë menu ꞌicë ñuishi sináncë unicama, mitsúxribi ca sinanat, Nucën Papa Dios cuëëncësabi oíshimi ꞌinun.

⁹ —Nucën Papa Dios cuëëncësabi oi cana ꞌima —quixun sinani ca masá nuituti ꞌin. Cuëëni cuaicë ꞌaíshbi ca a ëni masá nuituti bëunan mëscut. Chuámarua taními cuëëncë a ëni ca masá nuitut.

¹⁰ —ꞌËx cana an iscëx ꞌaisamaira ꞌuchañu ꞌai —quixun sinánquinmi cacëxun ca Nucën ꞌIbu Jesucristonën mitsun ꞌuchacama tërë́nquin upíira ꞌaíshmi cuëënun mitsu ꞌimiti ꞌicën.

Ñuiquin uni itsi ꞌatimotima

¹¹ ꞌËn xucë́antu, cana mitsu cain, Jesucristomi sináncë ꞌaish camina axribia ami sináncë unicamabë ñuianantima ꞌain. Axa abëa Jesucristomi sináncë uni ñui —ax ca ꞌaisama ꞌicë —quicë uni ax ca —Nucën Papa Diosan banax ca ꞌaisama ꞌicë —quicësa ꞌicën. Usai qui camina mitsux Nucën Papa Diosan bana quicësabi oquin ꞌaíma a banax ca cuatima ꞌicë quicësa ꞌain.

¹² Usai ca uni ꞌiti ꞌicë quicë bana nu ꞌinan ax ca achúshi, Nucën Papa Dios, ashi ꞌicën. A bana ꞌinan ꞌixun ca unin cara a bana quicësabi oquin ꞌaia quixun isti ꞌicën. Usa ꞌixun ca axa xënibua ꞌaínbi abë ꞌiti unicama a ië́mianan axa abë ꞌitima unicama a xënibua ꞌaínbi abë ꞌitimoquin ënti ꞌicën. ¿Usa ꞌaínbi caramina minmi uni itsi ꞌatimonun mix añu ꞌain?

Uisai caranuna imë́ishi ꞌiti ꞌai quixun cananuna ꞌunanima quicë bana

¹³ Ënë banaribi ꞌën mitsu camainun ca cuat. Micama raírinëx camina ësai quin: —Bërí cuanima cananuna imë́ishi anuxun ñu ꞌai bëtsi ëmanu cuanti ꞌain. Cuanx bëbatancëxun cananuna achúshi barin anu ꞌiquin ñu bitancëxun maruquin ꞌitsa curíqui biti ꞌain.

¹⁴ Usai quiquinbi camina uisai caramina imë́ishi ꞌiti ꞌai quixun ꞌunaniman. Uisa cara nun tsóti ꞌicë cananuna ꞌunaniman. Ax ca ꞌibútancëxa curu nëtë bënëtishi nëtë́cë usaribi ꞌicën.

¹⁵ Usai quima camina ësai quiti ꞌain: Nucën ꞌIbu Dios cuëëncëbë, bamacëma ꞌixun cananuna nun sináncë ñu ꞌati ꞌain.

¹⁶ Usa ꞌaínbi camina mitsux —ꞌënbi cana usaquin ñu ꞌati ꞌai —quiax cërúanan rabitin. Usai ꞌiti ca ꞌaisama ꞌicën.

¹⁷ Ësa ca: An usaquin ꞌati ca upí ꞌicë quixun ꞌunánquinbi usaquin ꞌacëma uni ax ca ꞌuchaia.