Santiago 3 - Kashibo-Kakataibo Biblia

Upitishi cananuna banati ꞌai quicë bana

¹ ꞌËn xucë́antu, mitsux camina camáxëshiira an axa Jesucristomi catamëcë unicama ꞌunánmicë uni ꞌitima ꞌain. Camina ꞌunanin, usa uni ꞌixunbi ꞌatima ñu ꞌai camina raíri unicama ꞌacësamaira oquin ꞌuchocë ꞌiti ꞌain.

² Camaxunbi cananuna ñu ꞌaisama ꞌain. Axa uisaíbi ꞌatimati banacëma uni ax ca asérabi upí uni ꞌicën. A unin ca ꞌatimati banatisa tanquinbi tënëti ꞌunáncë ꞌixun uisa ñu ꞌatima ꞌati cara sinania, abi tënëti ꞌicën.

³ Ësa ca. Caballo niquinquin cananuna anun nitsinananbi anun buinati itsi aín cuëbínu tëcërëcain. Usoxun cananuna nun cuëëncësa oquin niquínti ꞌain.

⁴ Usaribi ca manë nunti ꞌicën. Chaira ꞌicëbi ca suñun bëcaquin buania. Usa ꞌicëbi ca an niquincë unin, uinu cara cuainsa tania ami oquin anun chibíti axa chairama ꞌaínbi anúinshi puntëbianquin buania.

⁵ Usaribi ca nun ana anúnu banacë ax ꞌicën. Chamaratsu nun cuëbí ꞌaínbi cananuna uisa ñuishi ñui cara, anun banain. Tsi chamaratsu bimicëxunbi ca chaira ꞌicëbi naë rëquiquiani chaquin cëñuia. Usaribi oquin ca nun anáxa chamará ꞌaínbi uisa banaratsu cara unin uni itsi ñuiabi, a bana chanioquin tsuácaruia, camabi menuxuan unin cuanun.

⁶ Tsi chamaratsu usaribi ca nun ana, a cupínu nun cuëbitan banacë, ax ꞌicën. Chamaratsu ꞌaínbi cananuna anun ꞌatimati banati ꞌain. Usai banacë cupí nun sinánribi ꞌatima ꞌixun cananuna ñu ꞌatimaribi ꞌain. Usa ꞌixun ca anúnu ꞌatimati banacë ꞌixun nun bamati nëtë utámainun usabi nu ꞌimiti ꞌicën. Ñunshin ꞌatimanën ꞌapu anbi ca uni ꞌatimati banati sinánmia.

⁷ Unin ca camabi ñuina axa piánancë ꞌimainun ñuina pëchiu ꞌimainun men nirícë ñuina ꞌimainun baca mëu ꞌicë ñuina a camabi aín cuëëncësa oquin ꞌati ꞌicën, usoquin ca ꞌaia.

⁸ Usa ꞌaínbi ca unin aín cuëbitan ꞌatimati banati ashi tënëtima ꞌicën. Usa ꞌain ca uni usabi ꞌatimati banaia. Usa ꞌaish ca a unin bana anun uni bamati muca rosaribi ꞌicën.

⁹ Nun ana anúnu banacë, anúnbi cananuna Nucën ꞌIbu Dios rabin, anúnribi cananuna uni, a Nucën ꞌIbu Diosan asaribi oquin unio ꞌicëbi ami nishquin ami ꞌatimati banaquin ñu cain.

¹⁰ Nun cuëbitanbi cananuna Nucën Papa Dios rabin. Rabianan cananuna nun cuëbitan ꞌatimati banain. ꞌËn xucë́antu, usai ꞌiti ca ꞌaisama ꞌicën.

¹¹ ¿Anuaxa me mëúcüax ꞌunpax chiquícë, anuax cara bata ꞌunpax ꞌimainun muca ꞌunpáxribi uti ꞌic? Ca utima ꞌicën.

¹² ꞌËn xucë́antu, ¿higueranën cara aceitunanën bimisa oquin tuati ꞌic? Ca ꞌatima ꞌicën. ¿Uvasnënribi cara higueranën bimisa oquin tuati ꞌic? Ca ꞌatima ꞌicën. Usaribiti ca anuaxa me mëúcüax ꞌunpax chiquícë anuax tashiñu ꞌunpáxbëbi bata ꞌunpax utima ꞌicën. Usaribiti cananuna nun cuëbitan Nucën Papa Dios rabianan ꞌatimati banatima ꞌain.

Aserabi ñu ꞌunáncë ꞌiti bana

¹³ Micama uinu ꞌicëx caramina sinánñuira ꞌianan upí oquin bana cuacë ꞌain camina cëruti rabíquinma ñu upíshi ꞌati ꞌain. Usaquinmi ꞌaia isquin ca —a unix ca asérabi sinánñu ꞌianan upí oquin bana cuacë ꞌicë —quixun unin ꞌunánti ꞌicën.

¹⁴ Usa ꞌaínbi camina mitsux unimi nishcë ꞌianan uni itsimi sinánanima nutsi mixëshi ñuñu ꞌiti cuëëncë ꞌixun, rabiacáquin —ꞌëx cana ñu ꞌunáncë ꞌai —quixun sinántima ꞌain. Usaquin sináncë ꞌaish ca min bana cëmëcë ꞌicën.

¹⁵ Usaquin sináncë unix ca Nucën Papa Diosan sinánmicëma ꞌicën. Ax ca an ënë menu ꞌicë ñuishi sináncë unin sináncësa ꞌicën. Ñunshin ꞌatimanën sinánmicë ca usa uni ꞌicën.

¹⁶ Axa nishanan ami sinanima uni itsimi nutsianan axëshi ñuñu ꞌiti cuëëncë uni an ca upí oquin sináncëma ꞌixun camabi ꞌatima ñu ꞌatishi sinania.

¹⁷ Usa ꞌaínbi ca Nucën Papa Diosan sinánmicë unin upí oquinshi sinánquin upí ñu ꞌaia. Ca unibë nishananquinma nuibananquin bëtsi unían cacëxun cuaquin upí oquin bana sinánan uni itsiribi nuibaquin axa ꞌaquinsa ꞌicë ꞌaquinia. Usa unin ca cëmëma ꞌixun paránanquinma aín quicësabi oquin ꞌaia.

¹⁸ Axa unibë nishananima upitishi banacë unicama an ca chuámarua ꞌixun upí ñuishi ꞌaquin uni raíriribi chuámarua ꞌinun ꞌimia.