Santiago 2 - Kashibo-Kakataibo Biblia

Raíri unishi nuibanan raíri ꞌatimotima

¹ ꞌËn xucë́antu, mitsux Nucën ꞌIbu Jesucristo, ax Diossaribi upí, ami catamëcë ꞌixun camina raíri unibëishi nuibananquin raíri uni timatima ꞌain.

² Ënëx ca ësa ꞌicën. Ñuñu uni axa upiti mëníocanan, upí chupa pañuanan, curi manë mëñuax, anu mitsux timë́cënu atsínmainun ca ñuñuma uníxribi chupa ꞌatimará pañuax atsínti ꞌicën.

³ Atsiniami mitsun ñuñu uni a upí oquin biquin: Anu tsóti upí ënu ca tsót quixun canan ñuñuma uni aribi: ꞌIisa tani nianan ca menu tsóbut cati, ax ca ꞌaisama ꞌicën.

⁴ Usoquin ꞌaquin camina camabi uni sënën nuibaquinma ꞌatima sinánñu ꞌixun raírishi nuibanan raíri uni ꞌatimoin.

⁵ ꞌËn nuibacë xucë́antu, ꞌën mitsu camainun ca cuat. Nucën Papa Diosan ca axa ënë menuax ñuñuirama unicama a caísia, atúxa ami upiti catamëcë ꞌianan aín nëtënu abë ꞌinun, an nuibacë unicamax ca usai ꞌiti ꞌicë quiáxa aín bana quicësabi oquin.

⁶ Usa ꞌaínbi camina mitsun ñuñuma uni a —ꞌaisama ca —quixun timaquin rabínmin. Ñuñuira uni an ca mitsu paránquin ñu mëëmianan tëmëramiquin mitsumi manánquin, an uníxa ami bëtsi uni ñui manáncëxun cuacë uninu buania. ¿Atux cara usama ꞌic?

⁷ Usaquin ꞌai ca Cristo, ax upí ꞌixuan an mitsu ainan ꞌimicë a ñui ꞌatimati banaia. ¿Atux cara usama ꞌic?

⁸ Aín bana raírinëxa quicësoi ꞌicësamaira oi a bana quicësoi ꞌiti Nucën Papa Diosan banax ca ësai quia: “Mixmi upiti bërúancacësaribi oquin camina min aintsicama nuibanan axa ꞌaquinsa ꞌicë ꞌaquinti ꞌain”. A bana quicësabi oquin ꞌacë ꞌixun camina mitsun Nucën Papa Dios cuëëncësabi oquin ꞌain.

⁹ Usa ꞌaínbi camina mitsun, raíri unishi nuibanan raíri uni nuibacëma ꞌixun, ꞌuchaquin Nucën Papa Diosan bana cuënëo quicësabi oquin ꞌaiman.

¹⁰ Ësa ca. An camabi aín bana cuënëo quicësabi oquin ꞌaquinbi Nucën Papa Diosan bana achúshi quicësa oquin ꞌacëma uni, an ca camabi Nucën Papa Diosan bana cuënëo quicësa oquin ꞌacëmasa ꞌaish ꞌuchaia.

¹¹ Nucën Papa Dios axa “Min xanuma ꞌain camina xanubë ꞌitima ꞌain” quiá, axbi ca “Uni camina ꞌatima ꞌain” quiacëxa. Usa ꞌaínbi ca an aín xanuma ꞌain, xanubë ꞌiquinmabi uni ꞌacë uni an Nucën Papa Diosan bana quicësabi oquin ꞌaima.

¹² Usa ꞌaínbi camina mitsux Nucën Papa Diosan, anun camabi unían ñu ꞌacë isti nëtën, mitsux caramina Jesucristomi catamëti axa cuëëncësabi oi ꞌia quixun isti cupí, upitishi bananan upíshi ꞌiti ꞌain.

¹³ Anúan an camabi unin ñu ꞌacë isti nëtë anun ca Nucën Papa Diosan, an bëtsi uni nuibaquin ꞌaquincëma unicama a aín ꞌucha cupí uisa cara oti ꞌicë usoquin ꞌati ꞌicën. Usonan ca an bëtsi uni nuibaquin ꞌaquincë unicama ashi uisabi otima ꞌicën.

Jesucristomi catamëcë ꞌixuan unin ñu upíshi ꞌati

¹⁴ ꞌËn xucë́antu, an “ꞌëx cana ami catamëti Jesucristonan ꞌain” quiquinbi, Jesusan bana quicësabi oquin upí ñuishi ꞌacëma uni ax ca aín bana ñancáishi ꞌicën. ¿Usa unix cara Jesucristonan ꞌaish ië́ti ꞌic? Ca ꞌitima ꞌicën.

¹⁵ Ësa ca. Axa Jesucristomi sináncë uni, bëbu ꞌimainunbi xanu, chupañuma ꞌianan a piti ñuñuma isquin,

¹⁶ sapi camina mitsu achúshinën cati ꞌain: Bërúanx ca cuantan, mina matsi ca mapút, pucháquin ca pit quixun. Usaquin caquinbi añu ñubi ꞌináncëma ꞌaish camina min bana ñancáishi ꞌaish banáinshi quicë ꞌain.

¹⁷ Usaribiti ca uni Jesucristomiisa catamëtia quiquinbi uni itsi nuibaquin ꞌaquincëma ꞌaish asérabi Jesucristomi catamëcëma ꞌicën.

¹⁸ Unin sapi ca uni itsi cati ꞌicën: Mixmi Jesucristomi cana catamëti quimainunbi cana ꞌën upí ñu ꞌain. Mixmi —Jesucristomi cana catamëti —quicëbëtanbi cana minmi upí ñu ꞌaia iscëma ꞌixun asérabi camina usa ꞌai quixun sinántima ꞌain. Usa ꞌaínbi cana ꞌën ñu upí ꞌacë ꞌixun mi ismiti ꞌain, ꞌëx cana asérabi Jesucristomi catamëcë ꞌai quixun. Usaía a uni quicë ax ca asérabi ꞌicën.

¹⁹ Min camina Nucën Papa Dios ax ca achúshishi ꞌicë quixun sinanin. Usaquin sinánti ca asábi ꞌicën. Usaquinmi sináncë ꞌaínbi ca ñunshin ꞌatimacamanribi —usa ca —quixun ꞌunani ami racuëtan bamai bërëruia.

²⁰ ¿Mix sinánñumasa ꞌixun caramina ꞌunaniman, Jesucristomi cana catamëti quiquinbi uni itsi nuibaquin ꞌaquincëma ꞌaish ca a uni Jesucristomi catamëcëmasa ꞌicën?

²¹ Ësa ca. Nucën rara, Abraham, an ca Nucën Papa Dios rabinuxun an cacësabi oquin aín bëchicë Isaac ꞌati mëníocëxa. Usaquin ꞌaia isi ca Nucën Papa Dios —Abrahamnën ca ꞌën bana cuaquin ꞌën cacësabi oquin ꞌaia, usa ꞌaish ca ꞌënan ꞌicë —quiax quiacëxa.

²² Nucën Papa Diosan a cacësabi oquin Abrahamnën ꞌá cupí camina ꞌunanin, Abrahamnëx ca asérabi Nucën Papa Diosmi catamëcë ꞌiacëxa quixun. Usa ꞌixun an cacësabi oquin ꞌacë ꞌaish ca Abraham asérabi ax ꞌicësamaira oi Nucën Papa Diosmi sináncëxa.

²³ Nucën Papa Diosan bana cuënëo axa a ñui quicësabi oi ca Abraham ꞌiacëxa, ësai quicë: “Nucën Papa Diosan ca aín quicësabi oquin ꞌati ꞌicë quixun ꞌunani ca Abraham ami catamëacëxa. Usaía ꞌicë cupí ca Nucën Papa Diosan iscëx Abraham upíira uni ꞌiacëxa”. Usa ꞌicë ca Abraham unin, Nucën Papa Diosbë nuibanancë uni caquin anëacëxa.

²⁴ Usa ꞌain camina mitsun ꞌunánti ꞌain, Nucën Papa Diosan ca ami sináncë cupíshima, ami sinánquian ax cuëëncësabi oquin ñu upí ꞌacë cupíribi, uni —ax ca asérabi upí ꞌicë —quixun isia.

²⁵ Usaribi oquin ca Rahab cacë xanu ax ꞌaisama ꞌixunbia Israel uni rabë́ Jericó ëmanu ꞌicë unicaman ꞌatin rabanan, aín xubunu unëxun bëtsi bain cuantánun xucë, a cupí Nucën Papa Diosan upí isacëxa.

²⁶ Cananuna ꞌunanin, bamatancëx ca bëru ñunshínñuma ꞌaish uni aín nami ñancáishi ꞌicën. Usaribi ca uni ax isa Jesucristomi catamëtia quiquinbi uni itsi nuibaquin ꞌaquincëma ꞌaish, aín banax ñancáishi ꞌicën.