Santiago 1 - Kashibo-Kakataibo Biblia

Aín menuma ꞌicë judíos unicama Santiagonën quirica cuënëoxuan

¹ ꞌËx cana Santiago, an Nucën Papa Dios ꞌimainun Nucën ꞌIbu Jesucristonën cacësabi oquin ñu ꞌacë ꞌain. Israelnën bëchicë mëcën rabë́ ꞌimainun rabë́ aín rëbúnqui ꞌaíshmi bëtsi bëtsi menu tsóti cuan ꞌicë cana mitsu ënë quirica buánmin.

Nucën Papa Diosan sinánmicë ꞌaísha aín unicamax bëtsi sinánñu ꞌiti

² ꞌËn xucë́antu, cana mitsu cain, uisai caramina ꞌiti ꞌain, uisa ñu cara mitsumi ꞌicëbëbi camina upí oquinshi sinani cuëënti ꞌain.

³ Camina ꞌunanin, usai ꞌi bënë́quinma tanshiquin camina uisa ñu cara ꞌicëbëbi bënëtima upiti Jesucristomi catamëti ꞌunánti ꞌain.

⁴ Mitsux usai ꞌinux camina ëníma Jesucristomi sinani uisa ñu cara ꞌicëbëbi masá nuitutima ami catamëcanti ꞌain.

⁵ Uisaira caramina ami cushiti ꞌai quixun ꞌunáncëma ꞌixun camina Nucën Papa Dios ñucáti ꞌain. Ñucácëxun ca an mi usaími ꞌiti ꞌunánmiquin cushioti ꞌicën. An ca an a ñucácë unimi nishquinma cuëënquin upí oquin ꞌunánmia.

⁶ ꞌIxunbi camina —Nucën Papa Diosan sapi ca ꞌën cacëxun cuatima ꞌicë —quixun sinánquinma, —an ca asérabi ꞌën cacëxun cuati ꞌicë —quixun sinánquin ñucáti ꞌain. An cara ꞌë ꞌaquinti ꞌicë, cara ꞌë ꞌaquintima ꞌicë quixun sináncë uni ax ca suñun bëcacë́xa parúnpapa amami amamiqui tucánquicësa ꞌicën.

⁷ Mitsux usa ꞌixun camina Nucën Papa Diosan ca ꞌën bana cuatia quixun sinántima ꞌain.

⁸ Usaquin sinánbëquincë unix ca an sináncësabi oi ꞌima cëmëbëquinia.

⁹ Uicamax cara unían —ñuumara ca —quixun iscë ꞌiaxbi Jesucristomi catamëtia, Nucën Papa Diosan ꞌaquincëx bëráma ꞌiásama ꞌicë, ax ca cuëënti ꞌicën.

¹⁰ ꞌImainun ca ñuñuira ax Jesucristomi catamëti ñuñumaibi cuëënti ꞌicën. Axa ñuñuira uni ax ca ro uáxa upíira upí ꞌitancëxbi aín upí bënëtishi nëtë́cësaribi ꞌicën.

¹¹ Barin uruquin pëcaquin xarocëx ca ro uá chushia. Usari ꞌi ca ro uá rëucuti aín upí nëtëtia. Usaribiti ca ñuñu uni ax curíquiñuira ꞌiti sinánxun ñu ꞌaíbi ꞌiti ꞌicën.

Uisa ñu cara ꞌicëbëtanbi Jesucristomi catamëti ëntima

¹² An uisa ñu cara ꞌicëbëbi bënë́quinma tanshiquin Jesucristomi catamëti ëncëma unicama a ca usaía ax ami sináncë unicama ꞌiti ñuia quiásabi oquin Nucën Papa Diosan aín nëtënu abë ꞌaish chuámarua ꞌaish cuëënun ꞌimiti ꞌicën.

¹³ Usa ꞌain ca ui unin cara ꞌatima ñu ꞌati sinania, a unin —Nucën Papa Diosan ca usaquin ꞌanun ꞌë sinánmia —quixun sinántima ꞌicën. Nucën Papa Dios a ca uínbi ꞌatima ñu ꞌanun sinánmitima ꞌicën. Usa ꞌixun ca anribi uinu ꞌicë unibi ꞌatima ñua ꞌanun sinánmima.

¹⁴ Unían ñu ꞌatima ꞌacë ax ca Nucën Papa Diosan ꞌamicëma ꞌicën. Abi aín sinan ꞌatima ꞌixun ca usoquin ꞌaia.

¹⁵ Usaquian sináncë cupí ca unin ñu ꞌatima ꞌaia. Ñu ꞌatima ënquinma amiribi amiribi ꞌai ꞌuchacë cupí ca bamai Nucën Papa Diosbë ꞌitima ꞌicën.

¹⁶ ꞌËn nuibacë xucë́antu, uinu ꞌicë unínbi paráncë camina ꞌicantima ꞌain.

¹⁷ Camabi uisa ñu cara upí ꞌicë, ax ca Nucën Papa Dios naínu ꞌicë, an bari, ꞌuxë, ꞌispa acama unio, an camabi uni ꞌináncë ꞌicën. A ñucamaxa bënamëanan bëánquicë ꞌaínbi ca Nucën Papa Dios axira usabi ꞌiá ꞌaish usabi ꞌicën.

¹⁸ An ca unían aín bana ñuixuncëxun cuatínu ainan ꞌinun nu ꞌimiaxa, nux pain ꞌicë cupía raíri uníxribi Jesucristomi catamëcë ꞌaish camabi ñu an uniosamaira ꞌinun.

Asérabi Jesúsmi catamëtia usai uni ꞌiti bana

¹⁹ ꞌËn nuibacë xucë́antu, usa ꞌain camina Nucën Papa Diosnan ꞌixun mitsun unían bana ñuia upí oquin pain cuati ꞌain. Cuati camina mitsux munu pain sinántancëx bananan bënëtishi nishtima ꞌain.

²⁰ Axa nishcë unix ca Nucën Papa Dios cuëëncësabi oi ꞌima.

²¹ Usa ꞌain camina ñu ꞌatima ꞌaisamaira oquinmi mitsun ꞌacë a ëanan uisa ñucama cara ꞌaisama ꞌicë ënti ꞌain. A ënquin camina ami cuacë Nucën Papa Diosan bana a mitsun nuitu mëu racanaquin upí oquin sinánti ꞌain. Mitsúnmi cuacë bana ënë́xa quicësabi oquin, Jesucristomi catamëcë ꞌixun, ꞌacë ꞌaish camina Nucën Papa Diosnan ꞌinux ië́canti ꞌain.

²² Usa ꞌain camina mitsun pabitainshi cuaquinma upí oquin sinánquin a bana quicësabi oquin ꞌati ꞌain. Usoquin ꞌacëma ꞌaish camina —ꞌëx cana Nucën Papa Diosnan ꞌai —quixun sinanibi cëmëcë mitsux ꞌiti ꞌain.

²³ Axa Nucën Papa Diosan bana aín pabitainshi cuati, a bana isi ax quicësabi oi ꞌicëma uni ax ca an aín bëmánan espéjonën iscë unisaribi ꞌicën.

²⁴ —Uisa carana ꞌai —quixun istancëxbi ca mëníocatima manúquiani usabi cuania.

²⁵ Usa ꞌaínbi ca an a bana cuaquin manuquinma sináncë uni, ax a bana quicësabi oquin ënquinma ꞌacë ꞌaish chuámarua tani cuëënti ꞌicën. A banax ca anúnu upí ꞌianan, ñunshin ꞌatima cuëëncësa oi ꞌima Nucën Papa Dios cuëëncësabi oi ꞌinux ië́ti a ꞌicën.

²⁶ Ui unix cara —ꞌëx cana Nucën Papa Diosan bana cuacë ꞌai —quibi sinánxmaishi ꞌaisamairai banaia a unix ca Nucën Papa Diosan bana quicësabi oi ꞌíma cëmëia.

²⁷ An Nucën Papa Dios cuëëncësabi oquin ꞌacë unin ca ësaquin ꞌati ꞌicën: Papañuma titañuma tuácama ꞌimainun casunamëcë xanucamaribi ꞌaquinsa ꞌianan masá nuitutia isquin ca ꞌaquinti ꞌicën. ꞌAquianan ca an Nucën Papa Diosmi sinánquinma ënë menu ꞌicë ñuishi sináncë unin ꞌacësaribi oquin ñu ꞌaisama ꞌatima ꞌicën.