Salmos 95 - Kashibo-Kakataibo Biblia

Nukën ꞌIbu rabi kananuna kuëëni ami kantati ꞌai kikë bana

¹ Dios rabi ami kantai kuëënun ka ukan; an ka nu bërúanan ëñëmia ami kananuna kantati ꞌain.

² Usai ꞌi kuëëni kananuna a ꞌuramanuax ꞌikësai kantai, anun kantati ain bana ꞌakë anun kantai ꞌasabi ka kai kuëënti ꞌain.

³ Ax ka Dios chaiira ꞌikën, usa ꞌaish ka bëtsi bëtsi dioskama atun ꞌapuira ꞌikën.

⁴ Nukën ꞌIbu Dios aín mëkënu ka kamabi me kuainakëa ax ꞌikën; ainan ka kamabi bashi ënënmenma kuainakëa axbi ꞌikën.

⁵ ꞌIanan ka parúmpapa anbi ꞌá ꞌaish ainan ꞌikën, ꞌimainun meribi ka ainan ꞌikën; ¡anbi ka ꞌain mëkënan ꞌakësokin ñukama uniokëxa!

⁶ Usa ꞌain kananuna rantinpuruni ꞌikin a rabiti ukanti ꞌain; a rabi kananuna Diosan ismainunbi rantinpuruni ꞌiti ꞌain, an ka nuribi uniokëxa.

⁷ Ax ka nun Dios ꞌikën, usa ꞌain kananuna nukamax an kaískë unikama ꞌain; usa ꞌaish kananuna an ꞌarakakë ovejakamasa ꞌain. Usa ꞌain kananuna bërí ax ësai kia kuati ꞌain:

⁸ mitsun nuitu kamina Meribá kakë menuxun ꞌasaribiokin iruatima ꞌain; a nëtëkaman mi anu uni ꞌikëma me Masá kakë anuxun ꞌakansaribi okin,

⁹ uínsaran kara min chaitiokëkama ꞌën ñu ꞌaia iskinbi, ꞌë tankatsi kixun ꞌakankëxa.

¹⁰ ꞌËx kana cuarenta baritia ꞌimi ꞌitsaira atumi nishakën, usai ꞌikin kana a unikama ꞌatimati kananuna tsóti kixuan unánun ꞌunánmiakën; ¡usai ꞌikin ka ax kikësabi oi ꞌiti ꞌën bana a tankama ꞌikën!

¹¹ Usai ꞌia atu isi nishi kana kiakën, ꞌën kana a ꞌinánuxun atu ká me anu tsónuxa atsínun ꞌimitima ꞌain.