Salmos 93 - Kashibo-Kakataibo Biblia

Nukën ꞌIbu ax ka ꞌapuira ꞌikë kikë bana

¹ ¡Nukën ꞌIbu Dios ax ka ꞌapuira ꞌikën! ¡Usa ꞌixun ka aín kushínbi chaiirabu ñukama ꞌá ꞌixun a ꞌunánun nu ismiaxa! Usa ꞌain ka me uniotankëxun anuaxa shaíkitëkëntima okin nankëxa.

² Usa ꞌain kamina bërámabi ꞌapu ꞌia ꞌaish bëríbi mix usabi ꞌain, ¡Mix kamina bërámabi usabi ꞌiakën!

³ Nukën ꞌIbu Dios, bakakamax ka chaiirabu ꞌinun bëchuni tuki banaia;

⁴ ꞌaínbi kamina mix naínu Dios baka bëchunan kushisamaira ꞌianan, parúmpapakama bëchuni tuki banarukë usamaira ꞌain.

⁵ Nukën ꞌIbu Dios, a tanti min banakama ax ka uisaibi ꞌitima okinmi nan ꞌikën. ¡Anuxun mi rabiti xubunu ꞌikë ax ka upíira ꞌikën!