Salmos 91 - Kashibo-Kakataibo Biblia

Diosan ka bërúankin nu ꞌakinia kikë bana

¹ Uix kara Dios kamabi kushiñuira ꞌianan, manámi ꞌikë an bërúankë an ka

² ësokin a rabikin Dios kati ꞌikën: “Mix kamina an ꞌë bërúankin kushiokë a ꞌain, ꞌianan kamina nux ami katamëkë a ꞌain, ¡usa ꞌain kana ꞌëx mimi katamëti ꞌain!”

³ Usa ꞌixun ka an ishi nun ꞌunánkëma ꞌatima ñu, ꞌimainun anun uni bamakë ꞌinsín anuabi nu ië́miti ꞌikën,

⁴ usakin ꞌanan ka anbi mi ñuina pëchiñusa ꞌixun aín pëchin bërúankëx kamina uisaibi ꞌima upí ꞌiti ꞌain. ¡Usa ꞌain ka an mi bërúankë ax manë parámi mix katamëkësa ꞌinun mi ꞌimiti ꞌikën!

⁵ Usa ꞌain kamina imë́ ñu ꞌaisama inutimi, rakuë́tima, ꞌianan kamina nëtënbi pia nikian anun mi ꞌatimi rakuë́tima ꞌain,

⁶ usai ꞌianan kamina bëankibukëmi katamëaxa ukë ñu ꞌatimakama ꞌianan, nëtënribi an ñu ꞌatimoi nikë ñu kamamibi rakuë́tima ꞌain;

⁷ usai ꞌikëbëbi ka mil uni min mëmiu bamai këñuti ꞌikën ꞌimainun ka diez milribi min mëkeu ñui këñuti ꞌikën, usai ꞌimainun kamina mix uisa ñubi ꞌinútima ꞌain.

⁸ Usa ꞌain kananuna nun bërúnbi: uisai kara an ñu ꞌatima ꞌakë unikamax Diosan ꞌimikëx ꞌia isti ꞌain.

⁹ Mix kamina Dios an nu bërúankë a ꞌain, usa ꞌaish kamina Dios manámi ꞌikë ꞌain,

¹⁰ usa ꞌain ka uisa ñu ꞌaisamabi minu utima ꞌikën, ꞌianan ka ꞌaisama ꞌinsínbi min xubunu utima ꞌikën;

¹¹ an ka aín ángelkama uinu karamina kuani anuabi mi bërúanun xuti ꞌikën.

¹² An ka mi aín mëkënan maxáxmi tachakaxma ꞌinun mi bikin bërúanti ꞌikën.

¹³ ꞌIanan kamina paru ꞌinúan ꞌimainun, ñuinakan ꞌëobu runu akama nëbëtsi nikëbi ka mi uisabi otima ꞌikën.

¹⁴ “ꞌËn kana kamabi ñu ꞌaisamakama ië́miti ꞌain, an ka nuibanan ꞌë ꞌinánxa usa ꞌain.

¹⁵ Uínsaran kara ꞌakinun kixun ꞌë kaia anun kana ꞌakinti ꞌain; ¡ꞌëxbi kana abë ꞌiti ꞌain! Usakin ꞌai kana ꞌëx abëbi ꞌiti ꞌain, ꞌënbi kana ꞌupiokin kamina ñu ꞌa kixun mi kati ꞌain;

¹⁶ ꞌimikin kana ꞌitsa baritia tsotia kuëënun ꞌënbi ië́mitankëxun ꞌimiti ꞌain: ¡usakin ꞌakin kana ꞌën ië́mikëxa kuëëni tsónun ꞌimiti ꞌain!”