Salmos 90 - Kashibo-Kakataibo Biblia

Dios këñútimoi ꞌimainun ka unix ꞌitsama baritiashi tsóti ꞌikë kikë bana

¹ Nukën ꞌIbu Dios mix kamina, bërámaira nun chaitiokëkama ꞌakian ꞌixunbi an bëríbi nu ꞌakinkë a ꞌain.

² Anun bashikama ꞌimainun me ꞌianan ënë, nëtëkama unitisama ꞌaínbi ꞌiá ꞌaish, kamina ënë nëtëkamanbi bëríbi mix Dios aira ꞌain.

³ Usa ꞌain ka mixmi unix ka me putu ꞌakë ꞌaish me ꞌitëkënun ꞌimin; usai ka unix ñui me ꞌitëkënia:

⁴ Asérabi ka mil baritia inúkë ax min tankëx bënëtishi inuti ꞌinuónkë nëtë usaíshi ꞌia. ¡Usai ꞌikë ax ka uiti hora kara imë́ inutia usashi ꞌikën!

⁵ Usa ꞌixun ka baka kushin ꞌakësokin ꞌakëx, unin tsóti ax ꞌuxnë́kënuax bënëtishi, bësukë usashi ꞌikën;

⁶ ꞌianan ka xubi pë́karakëma ꞌaínshi upíira ꞌinun uatankëxia bari kuabúkëbë chushikë usaribi ꞌikën.

⁷ Asérabi kamina mix nishkin nu rakuë́nun ꞌimianan, ¡bëtsi bëtsi okin sinani sinánkasmanun ꞌimin!

⁸ Min kamina nuxnu ꞌuchakëkama ꞌimainun ꞌatimakin ñu ꞌakë akamabi ꞌunanin, usa ꞌain kamina unin isiamabi nun ñu ꞌati sinánkë abi ꞌunanin.

⁹ Asérabi ka nuxnu tsókë, ax mixmi numi nishkëbëshi këñutia; ꞌianan ka anun nux tsókë baritia ax munuma uin bitsi nun uinkë usaribi ꞌikën.

¹⁰ Anun tsótimi nu ꞌinánkë ax ka setenta baritiashi ꞌikën; usa ꞌaínbi ka uix kara kushipain ꞌikë ax kuni ochenta; baritia ꞌimi tsóti ꞌikën, ꞌaínbi kananuna ꞌitsabaritia tëmërakin ñu mëi atsanin. ¡Usai ka nux ꞌikësaribiti baritia kamax, bënëtishi inutia!

¹¹ ¿Uin kara min kuëënkëma ñu ꞌaia isími mix nishkë a ꞌunánti ꞌik? ¿Ui unin kara mix nishkë a ꞌunánti ꞌik?

¹² Min kamina nukama ꞌunánmiti ꞌain uiti nëtë karanuna tsóti ꞌai a upíokin tupunun, usakin mi ꞌakëx kananuna nun sinan ꞌatima ꞌima min sinánmikëxun upiokinshi ñu ꞌati ꞌain.

¹³ ¡Nun ꞌIbu, nukamanu kamina utëkënti ꞌain! ¿Uínsaran ira kaina nu ꞌakintëkënti ꞌain? ¡Minmi kaisa min unikama ënë kamina nuibakin ꞌakinti ꞌain!

¹⁴ Nu kamina min nuibakin nëtëkamabi ꞌimiti ꞌain, usai ꞌi kananuna mi rabi kuëëni kantai nux anun tsókë nëtëkaman ꞌiti ꞌain.

¹⁵ Nukama kamina ꞌitsa baritia kuëëni tsónun ꞌimiti ꞌain; nuxnu ꞌitsabaritia ꞌimi tëmërakësa usaribi okin.

¹⁶ ¡Min kamina min unikama ꞌimainun aín rëbúnki kaman min ꞌakë ñukama isanan min kushikama isnun ismiti ꞌain!

¹⁷ Nukën ꞌIbu Dios min nu nuibakin ꞌakinkë ax ka nubëbi ꞌiti ꞌikën. ¡Usa ꞌain kamina nun ñu mëëkëkama upí iskin! ¡Abi nun ñu mëëtikama nu ꞌakinti ꞌain!