Salmos 89 - Kashibo-Kakataibo Biblia

Diosan an kakësabiokin ꞌakinuxun David ka bana

¹ ꞌËn ꞌIbu Dios, ꞌëx mimi kantai kana mix kamina nuibanankë ꞌai kiax kianan; xënibua ꞌaínbi kana mix kamina ñu ꞌatima ꞌati kuëënkëma a ꞌai kiax mi ñui kiti ꞌain.

² ꞌIanan kana munuma banakin min uni nuibakë ax ka këñutima okimi ꞌá ꞌikë kixun ñuianan; mix kamina usa ꞌai kixun ñuikë ax ka naíkamë ꞌëo usaribi bëtsiokëma usabi okin ñuikë ꞌiti ꞌikën.

³ Min kamina achúshi ñu min uni Davidbëtan ꞌakën; ꞌakin kamina ñu ꞌaxunuxun min kaískë uni kakën:

⁴ “ꞌËn kana mix ñua ꞌaínbia min rëbúnkikamax mix ꞌiásaribiti nëtë́tima ꞌapu ꞌinun ꞌimiti ꞌain.”

⁵ ¡ꞌËn ꞌIbu Dios naíkamë ꞌëonuxunbi ka min ángel kamanbi ka unin iskëma chaiirabu ñu mi ꞌa sinánkin mi rabiti ꞌikën!

⁶ ¡Uinubi ka naínu misaribi, dios ꞌaíma ꞌikën ꞌën ꞌibun!

⁷ Dios chaiira ꞌimainun ami rakuë́ti mi ka, naínuxun min ángelkaman mi bëarabuinxun rabikania.

⁸ Nukën ꞌIbu Dios kamabi kushiñuira misaribi axa kamabi kushiñu ka ꞌaíma ꞌikën; usa ꞌain ka min nan banakama ax asérabi ꞌikën; ¡uinubi ka misaribi bëtsi Dios ꞌaíma ꞌikën!

⁹ Min kamina parúmpapa ꞌunsaira ꞌinua aín bëchun tukiabi aín bëchunkë axa bukubunun ꞌimin.

¹⁰ Min kamina parúmpapanua bëtsi ñuinakama chaiirabu ꞌakësa okin ꞌakëxa bamati ꞌikëbi Rahab ꞌië́miakën; usakin ꞌanan kamina axa mimi nishkë unikama min kushínbi abánun ꞌimiakën.

¹¹ Me ꞌimainun naíkamë ꞌëo ax ka min unio ꞌaish minan ꞌikën; min kamina me uniokin anua ꞌikë ñukamaribi uniokën.

¹² ꞌAnan kamina aín tsipumi ꞌimainun aín rëbumi ꞌiti akamaribi unionan, kamina aín bashikama Tabor ꞌimainun Hermón aribi ꞌakën, usa ꞌikë ka anu tsókë unikaman mi rabi kuëënti ꞌikën.

¹³ Min kushi ax ka chaiira ꞌikën; min mëkën mëkeu ꞌikë ax ka kushiira ꞌikën, usa ꞌain kamina axa mimi nishkë unikama kupitanuma ꞌati ꞌain.

¹⁴ Min kamina achúshi ꞌapun ꞌakësokin upíira okin ñu ꞌain; usa ꞌixun kamina min kushínbi kamabi ñu ꞌakin ënkinma nu nuibati ꞌain.

¹⁵ ꞌËn ꞌIbu Dios chuámarua ka uinu ꞌikë unikaman kara mi rabiti ꞌunánxa an mi kuëënkin rabikë ax ꞌikën. ꞌIanan ka min bana ꞌai, tirítan pëkakësa ꞌaish ꞌupitax bukukanti ꞌikën,

¹⁶ usai ꞌika min anë rabi ka nëtë kamabi kuëënkanti ꞌikën, usai ꞌikin ka min kakësabiokin ꞌupiokin ñu ꞌakánti ꞌikën.

¹⁷ Asérabi kamina mix an nu kushiokë a ꞌain ꞌianan kamina nu upí ꞌimin; usakin ꞌimikëx nux kushiira ꞌikë ax ka mix kuëënxun usakin nu ꞌimikë ꞌikën.

¹⁸ ¡Dios ax ka aminu katamëkë manë pará okin ꞌakë usaribi ꞌikën! ¡Usa ꞌaish ka nukaman ꞌapu ꞌianan Israel unikaman ꞌapu ꞌaish upíira ꞌikën!

¹⁹ Bërámabi kamina namámikësokin minmi kaískë unikama abë banakin kakën: ꞌIanan kamina ësairibi kiakën ꞌën unikamanua kana achúshi uni rakuëma kaísun, axa raíri unisama ꞌaish sinánñuira ꞌikë ꞌakinti ꞌai kiax kamina kiakën.

²⁰ ¡ꞌËn kana ꞌën uni ꞌiti David a kaisakën! Usa ꞌikë kana axa ꞌapu ꞌinun aín maxkánu xëni tutukakin anënun ꞌamiakën,

²¹ usa ꞌaish ka uínsaranbi ꞌën ꞌakinkin ënkëma ꞌiti ꞌikën. Usa ꞌikë kana ꞌën kushínbi ꞌakinkë a ëntima ꞌain,

²² usakin ꞌakinia ka axa ami nishkë unikaman ꞌakatsikixun sinánxun ꞌakinbi uisabi otima ꞌikën, ꞌianan ka ꞌatima ñu ꞌakë unikamanbi uisabi otima ꞌikën.

²³ ꞌËn kana amia nishkë unikama ꞌatima okin ꞌanun ꞌamiti ꞌain; ꞌamikin kana ¡istëkënuxuma këñukin ꞌanun ꞌamiti ꞌain! ¡Usakin ꞌakin kana amia nishkë unikama këñunun ꞌamiti ꞌain!

²⁴ Usa ꞌaish ka ꞌën nuibakin ꞌakinkë ax uisaibi ꞌikëma usabi ꞌiti ꞌikën, usai ꞌia kana ꞌën kushiira ꞌinun ꞌimiti ꞌain.

²⁵ Usakin ꞌën ꞌakinkëxun ka parúmpapa Mediterráneo kakë anuxunbi Éufrates kakë baka anubi sënë́onkin ax ꞌapu ꞌixun ñu ꞌanun ꞌamiti ꞌikën.

²⁶ An ka ꞌë kati ꞌikën: Mix kamina ꞌën papa ꞌain; ꞌianan kamina ꞌën Dios an ië́mianan ꞌë ꞌakinkë a ꞌain.

²⁷ ꞌËn kana unían aín bëchikë apan aín biti ñu a ꞌinánkësaribi okin ꞌinánkin, axa kamabi menu ꞌikë unikaman ꞌapu kamasamaira ꞌaish chaiira ꞌinun ꞌimiti ꞌain.

²⁸ ꞌËn a nuibakë ax ka usabi okin ënkinma ꞌën nuibakë ꞌiti ꞌikën, ꞌianan ka ꞌën abëtan achúshi ñu ꞌa axribi uínbi uisabi okëma anubi ꞌiti ꞌikën.

²⁹ Usa ꞌain ka aín rëbúnkikama ax ꞌiásaribiti, me ꞌimainun naí kamë ꞌëo këñutisama pan ꞌain ꞌapu ꞌiti ꞌikën.

³⁰ “ꞌAínbi kana atun bëchikëkama, ꞌën ꞌunánmikë banakama kikësokin ꞌaíma ꞌianan,

³¹ a ꞌaisama tani akamami ꞌianan, ꞌëx kia bana ax kikësaibi oi ꞌiti banakama kuaisama tania,

³² kana ꞌën atux usai ñunshinakëkin, ñu ꞌaisama ꞌakë a kupín atu i pëñan bixun unin aín bakë bëchikë ꞌakësaribi okin atu ꞌatima okin tëmëramiti ꞌain;

³³ ꞌaínbi kana ꞌën uni David nuibakin ëntima ꞌain, ꞌianan kana ꞌëx kikësabiokin upíokin ñu ꞌaxunkin a ëntima ꞌain.

³⁴ ꞌImainun kana uínsaranbi abëtan achúshi ñu ꞌakë, kana ꞌaima kikínma ꞌëx kikësabiokin asérabi ꞌakinti ꞌain.

³⁵ Achúshi okin kana ꞌën asérabi ꞌëx kikësabiokin ꞌaxunuxun kakën, usa ꞌain kana paránkima David ꞌakinti ꞌain:

³⁶ usa ꞌain ka aín rëbúnkikama ax ꞌiásaribiti atúxribi ꞌapu ꞌiti ꞌikën, usai ꞌika bari ꞌianan ꞌuxë këñutisama aín ꞌapu ꞌiti ꞌikën.

³⁷ ¡Usai ꞌika ꞌuxë ꞌikësaribiti anubi ꞌianan! ¡Xënibua ꞌaínbi naíkamë ꞌëo këñutisama ꞌain ꞌiti ꞌikën!”

³⁸ Usa ꞌaínbi kamina, min kaískë ꞌapubi ꞌakinsama tankin; ¡usokin ꞌanan kamina ami nishkin ꞌaisama on!

³⁹ Min kamina min kaísa unin rëbúnkikama ꞌapu ꞌixunbi, min kásabiokin ꞌaíma; unin ain mañuti nipakëkësa ꞌitanun ꞌimian.

⁴⁰ Kamabi anun aín ëmakama kënëara a kamaxa tukibuti kini kiniabu ꞌinun kamina; ¡usakin ꞌamia ꞌaish ka atun ëma kënëara ax ꞌaisama okan ꞌikën, usa ꞌaish ka bëríbi usabi ꞌikën!

⁴¹ Usokin ꞌakë ꞌain ka au inúkin kamabi unin añu kara bisatania a iskin mëkamatia; usokëbë ka a rapasu ꞌikë unikamax atumi kuaia.

⁴² Min kamina ami nishkë unikama, atun kuëënkësokin ꞌatankëxa bërí kananuna atu ꞌa kiax kuëënkin atun mëkën manámi oi ꞌinun ꞌimian.

⁴³ Minbi kamina an tuinkë manë xëtokë axa xërui kuënuñuma ꞌinun ꞌimiakën, axa ami nishkë unikaman abë ꞌakanankin ꞌakasmanun ꞌakinkinma ëankën.

⁴⁴ Min kamina ax ꞌapu ꞌaíshbia kushiñumasa ꞌinun ꞌimikin; axa ꞌapumasa ꞌaish menu pakëkësa ꞌitánun ꞌimian;

⁴⁵ usakin ꞌimikin kamina ꞌitsama baritia ꞌimia tsónun aín baritia tëakën, usakinmi ꞌakëx ka ꞌitsaira katëaxa.

⁴⁶ ꞌËn ꞌIbu Dios, ¿uínsaran ira kaina mixmi unë́kësa ꞌikë a nëtë́ti ꞌain? ¿ꞌIanan kara mix nishkë ax nëtë́tima, tsi rëkirukësa ꞌaish usabi ꞌiti ꞌik?

⁴⁷ ꞌËn ꞌIbu Dios min kamina ꞌunánti ꞌain anun tsótimi ꞌë ꞌinánkë ax ka anun basi tsótima ꞌitsama nëtë́ishi tsótimi ꞌë ꞌinánkë ꞌikën; usa ꞌain ka minmi unio unikama atúxribi ꞌitsama baritia sënëmishi tsotia.

⁴⁸ ¡Uixi ka tsóti uínsaranbi bamaima ꞌima! ¡Uixi ka bamatinuax ië́tima ꞌikën!

⁴⁹ ꞌËn ꞌIbu Dios, ¿uinu kara minmi ꞌën kana mi nuibati ꞌai kixun a irapain, ñuikin min David ká bana ax ꞌik?

⁵⁰ ꞌËn ꞌIbu Dios min unikamami ka kamabi unix ꞌitsaira kuaia; kuaikin ñuikankë a kana ꞌën sinanin.

⁵¹ ꞌËn ꞌIbu Dios, ¡ësokin ka axa mimi nishkë unikaman nu ꞌatima oia! ¡Usakin ka min kaískë uni ꞌikëbi uisai kara ꞌia abi ñuibiankin ꞌatima oia!

⁵² Dios ax ka chuámarua xënibua ꞌaínbi ꞌiti ꞌikën. ¡Usai ka ꞌiti ꞌikën!