Salmos 84 - Kashibo-Kakataibo Biblia

Dios anuxun rabiti xubu ax ka upíira ꞌikë kiax kikë bana

¹ ¡Upíira upí ka anumi mix ꞌikë min xubu ax ꞌikën, Nukën ꞌIbu Dios kamabi kushiñuira!

² ¡ꞌËx kana kuëëinra kuëëni anua min xubu ꞌikë ëman me mëníokë anu ꞌiisa tanin! ¡Usa ꞌain kana ꞌën nuitunënbi kuëëni mixmi Dios an uni tsónun ꞌimikë mimi kantati ꞌain!

³ Chunu ꞌimainun xapu chunu an ka anuxun mi ñuina xaroxunti ꞌakë a ꞌurama aín na ꞌatankëxun anu tuaia, ꞌën ꞌIbu Dios kamabi kushiñuira, mix kamina ꞌën ꞌapu ꞌianan ꞌën Dios ꞌain.

⁴ ¡Uikamax kara anuxun mi rabiti xubunu ꞌia, atux ka mi rabi chuámarua tani kuëënti ꞌikën!

⁵ ¡Chuámarua ka uikamax kara min ꞌakinkëx kuantankëx, ꞌunánkëma bashi ꞌabiani anuxun mi rabiti xubu anu bëbaia atux ꞌiti ꞌikën!

⁶ Uínsaran kara tëmërai bëunan, mëskukë kakë me sapan anun inuti kuani, anun ka min ꞌuñe ꞌibúkian xëxá ꞌëmikin buakarukësa usaribi ꞌitánun, a men ꞌinutia nu upíokin sinánxunkin ꞌakinin;

⁷ usai anun kuani ka atux atiainra kushiñuira ꞌikanti ꞌikën, ꞌianan ka Jerusalénnu bëbakin anuxun a rabiti anua Dios kushiira a isti ꞌikën.

⁸ Nukën ꞌIbu Dios kamabi kushiñuira, ꞌianan Jacobnën Dios, ¡ꞌën mi ñukákëxun kamina kuati ꞌain!

⁹ Dios nu ꞌakinkë, ꞌixun kamina nu nuibakin min kaískë ꞌapu an kara uisakin ñu ꞌaia isti ꞌain.

¹⁰ ¡Asábira ka achúshi nëtën min xubunu ꞌikë me mëníokëkama anu ꞌiti ax ꞌikën, ax ka mil nëtëkama ꞌiminu ꞌikësamaira ꞌikën! ꞌËn anuxun Dios rabiti xubu aín xëputi bërúankë ax ka asábi ꞌikën, ax ka uni ñu ꞌatima ꞌakë kamabë ꞌikësamaira ꞌikën.

¹¹ Nukën ꞌIbu Dios an ka ꞌakianan nu bërúaia; Diosan ka uni an ñu upí ꞌai tsókë akama nuibanan ꞌakinia, ꞌakianan kana ꞌinanima kixun ñu upí ñonkinma ꞌinania.

¹² Dios kamabi kushiñuira, ¡axa mimi katamëkë unikamax ka chuámarua tani kuëëni tsókanti ꞌikën!