Salmos 80 - Kashibo-Kakataibo Biblia

Diosan kamabi nu nuibanun ñukati bana

¹ An Israel unikama bërúankë; an ka Israelnën rëbúnkikama achúshi ñuina aín ꞌibun bërúankësa okin bërúanti ꞌikën, mix anu ꞌikë anu ka querubinkama ax ꞌikën, ¡usa ꞌain kamina bërí nukaman ñukákëxun kuati ꞌain!

² Mix kushi ꞌixun kamina. Efraín Benjamín ꞌimainun Manasés aín rëbúnkikama ꞌakinti ꞌain, ¡usa ꞌain kamina min kushin ismikin nukama ië́miti ꞌain!

³ Mix nun Dios ꞌixun kamina, ¡bëráma ꞌiásaibi ꞌinun nu ꞌakinti ꞌain! ¡Upiokin iskimi nu ꞌakinkëx kananuna nukamax ië́kë ꞌiti ꞌain!

⁴ Nun ꞌIbu Dios kamabi kushiñuira, ¿uínsarainra kaina min unikaman ñukákëxbimi nishkë ꞌixun atu ꞌakinkëma a ënti ꞌain?

⁵ Nukamina nun bëun piti ꞌakësokin nun pinun nu ꞌamian; usakin ꞌamianan kamina nun bëun xëati ꞌitsaira xëakësa okinnu ꞌanun nu ꞌamian.

⁶ Usokinmi nu ꞌakëbë ka nu ꞌurama ꞌikë unikama numi kuaimainun, axa numi nishkë unikamaxribi nu iskin usani nukamami kuaia.

⁷ Nukën ꞌIbu Dios kamabi kushiñu nukama kamina, ¡bëráma ꞌiásabinu ꞌinun ꞌakinti ꞌain! ¡ꞌIanan kamina min upíokin nu isti ꞌain, usakinmi ꞌakëx kananuna ië́kë ꞌiti ꞌain!

⁸ Min kamina nukama Egipto menuabi uvas ꞌapákë ꞌakësa obëtsinkin; bëxun anua bëtsi unikama tsókë me a atu chikínxun nu ꞌinánkën.

⁹ Usakin kamina anu nux ꞌinun me mëníokën, usakin ꞌakëx ka ꞌapákëxa uvas tapuni ꞌikësaribiti me tsitsirui ꞌuakamë ꞌëokankëxa.

¹⁰ Usai ꞌikin kananuna anu ꞌikë aín bashikama ñu tupënan ꞌakësokin tsitsiruakën, ꞌanan kananuna Líbanu me kamabi tsitsirukin biakën.

¹¹ Usa ꞌain kananuna a menuax kaikamë ꞌëoi parúmpapa ꞌikë anuaxbi. Éufrates kakë baka anubi sënëni tsóakën.

¹² ¿Uisoti kaina nukama usainu nux tsóa a ënun nukama ꞌimian ꞌimixun, usakin min nu ꞌakë ꞌikëa numi nishkë unikaman nun bain inúkin nu ꞌatima onun ꞌamin?

¹³ Jabalí kakë ñuina ninu ꞌikësa ꞌianan; ¡raëkëma ñuinasaribi ꞌixun ka nu këñuia!

¹⁴ Usa ꞌain kamina, mix Dios kamabi kushiñuira ꞌixun; anumi ꞌikë naíkamë ꞌëo anuxunbi iskin nu ꞌakinti ꞌain, ꞌakinkin kamina min ꞌapá ꞌuvasa nux ꞌikë minan ꞌinun ꞌimiti ꞌain,

¹⁵ minbi kamina uvas ꞌapákësaribi ꞌitánun nu bëakën, usokin ꞌaxun kamina minbi nu bërúankën.

¹⁶ Axa numi nishkë unikaman ka nun ëmakama ñu tëaxun xarátanun ꞌakësokin nëaxa; usa ꞌain kamina min atu ꞌatima oti ꞌain;

¹⁷ ꞌaínbi kamina min kaískë uni a ꞌakinti ꞌain, ax ka bërámabimi kaisa unikama atun bakë bëchikë ꞌikëmi ënë menu bëakama a ꞌikën,

¹⁸ usa ꞌain kananuna uínsaranbi nux mi ëni mimi manútënkëntima ꞌain. ¡Usokinmi anu tsóti nu ꞌinánkëxun kananuna mishi rabiti ꞌain!

¹⁹ Nun ꞌIbu Dios kamabi kushiñuira, ¡Bëráma nux ꞌiásabi tsónun kamina, nu ꞌakinti ꞌain! ¡Usokin nu ꞌakinkin kamina nu ië́miti ꞌain!