Salmos 8 - Kashibo-Kakataibo Biblia

Diosan ꞌakë ñu chaiira ꞌimainun unin ꞌakë ñu ñui David kanta bana

¹ Dios mix kamina nun ꞌapuira ꞌaish kamabi menu ꞌain. ¡Mix chaiira ꞌain ka kamabi menu min anë ꞌikën! ¡Usa ꞌain ka min ꞌakë ñukamax naíkamë ꞌëo sënë́nkë a manámi sënënia!

² Tuá xukama kikë bana ꞌimainun tuá chabu atux ka mi kushikin rabi kantaxa, usai ꞌikin ka axa mimi nishkë unikama ꞌaisamaira ꞌikëbi nëtë́miaxa. ¡Usakin ꞌakin ka axa mimi nishi ꞌësë́nankë unikama banaima nëtë́nun ꞌimiaxa!

³ Uisaran karana minbi unio naíkamë ꞌëo, ꞌuxë, ꞌispa akama min unio a isin anun kana,

⁴ ësokin sinanin: ¿Añu kara unix ꞌik? ¿Añu karanuna nux unishi ꞌaish ꞌiti ꞌain? ¿Uisa kupín kaina ami sinani mix ꞌitsaira bënëtin?

⁵ Nukama kamina mi ꞌiskësaribi ꞌitánun uniokën, ꞌanan kamina ꞌapu ꞌakësaribi okin nu bërúankën.

⁶ Usakin ꞌaxun kamina min uniokë kamabi ñun ꞌibu ꞌinun nu ꞌimianan, kamabi ñu a manámi ꞌixun bërúain:

⁷ a ñuinakamax ka ovejakama ꞌimainun vaca aín bënëkama ꞌianan ñuina raëkëmakama aribi ꞌianan,

⁸ ñuina pëchiñu manan nuánkë a ꞌimainun bakanu ꞌikë ñuina ꞌianan, parúmpapanu ꞌikë ñuina akama ꞌikën.

⁹ Dios mix kamina ꞌapuira ꞌianan kamabi ñu manámi ꞌain, ¡usa ꞌain ka kamabi menuxun min anë ꞌunánkë ꞌikën!