Salmos 73 - Kashibo-Kakataibo Biblia

Diosan ka upíokin ñu ꞌaia kikë bana

¹ ¡Dios ax ka Israel unikamabë upí ꞌianan, uin kara ꞌain nuitunën upíokin ami sinania a unikamabëribi upí ꞌikën!

² ꞌËn kana ñu ꞌatima ꞌai ꞌuchati chamara ꞌaisaira tankinbi tënëan; usai ꞌikinbi kana chamara ñu ꞌatima ꞌati tënëakën.

³ ꞌËx kana ꞌatima sinánñu unikama ꞌimainun axa rabiakakë unikama ñuñu ꞌia, isi atumi xuamati nishakën.

⁴ A unikamax ka kana bamati ꞌai kixun sinanibi bënëtima, usai ꞌika chuámashirua tani uisa ñubi ꞌinutima bukuia;

⁵ usai ꞌi ka bëtsi unikama ꞌikësai ñu mëi tëmërakinbi tankëma ꞌianan, bënëruxun raíri unikaman ꞌakësokin ñu ꞌaima.

⁶ Usa ꞌain ka atúxa rabiakakë ax ꞌain tëutisa ꞌianan atun bënëruxun ñu ꞌatima ꞌakë ax atún pañukë chupasa ꞌikën;

⁷ atux ka ꞌaímai xuati atun bëru bëtsëkërës kikësabu ꞌianan; atun ñu ꞌatima ꞌati sinánkë ax ꞌaisamaira ꞌikën.

⁸ Usa ꞌaish ka rabiakati an kuanuma unimi kuai, bënë́kinshi ꞌatima ñu ꞌakatsikiax banaia;

⁹ usai ꞌika aín kuëbitan naíkamë ꞌëo këñun Dios ñui banai kia, ꞌianan ka kamabi menu ꞌikë unikama ñui banaia.

¹⁰ Usa ꞌikë ka unikaman atu rabia, ꞌianan ka atun ñu ꞌatima ꞌakëbi mëraima.

¹¹ Usa ꞌain ka atux kánani kia: ¿Diosan kara nun ꞌakë ñukama ꞌunánti ꞌik? ¿Uisaxun kara Diosan ax chaiira ꞌixunbi nun ꞌakë ñu uisaxun kara axa kixun ꞌunánti ꞌik?

¹² ¡Uni ꞌatima sinánñukama, atun ñu ꞌaia kamina isti ꞌain! Atun ka ñuñu ꞌi upiti tsókinbi ꞌitsaira ñuñu ꞌiti kuëënia.

¹³ ¡Usa ꞌaínbi ꞌën upiokin sinánkë ꞌixunbi atun ñu ꞌaia iskin, ꞌën sinánkë ax ka ñankáishi ꞌën usokin sinánti chukúmara pishinkë ꞌiaxa!

¹⁴ Usa ꞌain kana kamabi nëtën rishkiakatin, ꞌianan kana kamabi nëtën tëmëramikin ꞌatimokë ꞌain.

¹⁵ ꞌËn atun sinánkësa okin sinánkë uni ꞌixun kana, an min bana ꞌakë unikama ꞌatimokin ꞌën paránkë ꞌitsían.

¹⁶ ꞌËn kana uisokin kuaisa kara kixun tankën, ꞌaínbi ka ꞌënan kuaisama tëiratë ꞌiakëxa.

¹⁷ Usa ꞌain kana anuxun Dios rabiti xubu anu atsínxun ira, uinuira kara atux ꞌinuxun ꞌaia kixun ꞌunánkë:

¹⁸ usa ꞌain kamina min atun ñu ꞌatima ꞌakënbia, ñu tuñunuax raishki ꞌikësai ꞌia atúxbi ꞌanuax tëmëranun ꞌimian.

¹⁹ ¡Atux ka bënë́kinshi këñúkë ꞌiti ꞌikën! ¡Usa ꞌain ka rakuë́kë ax atubëbi këñuti ꞌikën!

²⁰ Uínsaran kaina mix Nukën ꞌIbu ꞌaish uníxa aín ꞌuxkënuax bësukin aín namákë manukësa usakin, atun ñu ꞌakëkama a timati ꞌain.

²¹ ꞌËx kana ꞌitsaira nishkë ꞌiakën, usa ꞌain kana ꞌën sinánkënënbi ꞌën nuitu ꞌitsaira paëi ꞌiakën,

²² usai ꞌikin kana bana kuakëma unisa ꞌixun ꞌënbi ꞌunánma ꞌain; ¡usa ꞌaish kana min iskëx achúshi ñuina raëkëmasa ꞌiakën!

²³ Usa ꞌaínbi kana ꞌëx mi ënima mibëbi ꞌiakën. Usai ꞌia kamina min kushínbi ꞌë ꞌakiankën,

²⁴ ꞌanan kamina min bana kikësabiokin ꞌanun ꞌë ꞌunánmiakën, usa ꞌain kamina anun ñuti nëtë ꞌikëbëtan minan ꞌikë, upiokin kamina ꞌë ñu ꞌaxuan kakin biti ꞌain.

²⁵ ¿Uix kara naínu an ꞌë ꞌakinkë a ꞌik? ¡Mixëshi kamina a ꞌain! ꞌËx mibë ꞌixun kana añu ñubi ënë menu ꞌixun kuëëniman.

²⁶ Kamabi ꞌën namikama ñusmakësa tankim kana kushiñumasa tanin, ꞌaínbi ka Diosan xënibua ꞌaínbi anun tsóti ñu ꞌë ꞌinánti ꞌikën, ꞌianan ka an ꞌë upíokin abi sinánun ꞌimia.

²⁷ Uikamax kara minan ꞌisamatania, akamax ka bamakë ꞌiti ꞌikën; ꞌimainun kamina uikaman kara min bana kikësabiokin ꞌaisama tania akama këñunun ꞌimiti ꞌain.

²⁸ ꞌAínbi kana ꞌëx Dios ꞌurama ꞌiti ꞌain, ax ka ꞌënan asábira ꞌikën. Mix kamina ꞌën ꞌIbu ꞌianan ꞌën Dios ꞌain, usa ꞌaish kamina an ꞌë bërúankë a ꞌain, usa ꞌain kana kamabi ñumi ꞌakë akama ñuiti ꞌain.