Salmos 72 - Kashibo-Kakataibo BibliaꞌApu ꞌiti uni a Dios ñukáxuan bana 1 ¡ꞌËn ꞌIbu Dios, axa ꞌapu ꞌiti uni ënë kamina, min ꞌakësarabi okin upíokin ñu ꞌanun ꞌamiti ꞌain, 2 usakin ꞌanun min ꞌamikëxun ka min unikama ꞌimainun uni ñuñumakama aribi upíokin ꞌakinti ꞌikën. 3 ꞌImainun kamina aín bashi kamakëñun, matá mekama atunan ꞌain uínbi ubíokëma upitax anu bukukanti ꞌikën. 4 ¡ꞌApun ka uni ñuñumakama an kakësabiokin aín bana tankin ꞌanun ꞌamiti ꞌikën! ¡ꞌAmianan ka aín bakë bëchikëkama aribi upíokin ꞌakinti ꞌikën, ꞌakianan ka an këmëxun atu ꞌatima okë uni akamaribi ꞌatima oti ꞌikën! 5 ¡Usa ꞌain ka a ꞌapux min kakësabiokin ꞌai baribëa ꞌuxë këñutisamapan ꞌain xënibua ꞌaínbi tsóti mimi rakuë́ti ꞌikën! 6 ¡Usai ꞌi ka ꞌuñe ꞌimainun nibitan menu ñu ꞌapákë, chabónan pasto chabókë usaribi ꞌiti ꞌikën! 7 ¡Usakin ꞌanan ka ax ꞌapu ꞌixun ñu upíokin ꞌakëbë, a nëtëkaman uni upitax bukuti ꞌikën, anúan ꞌuxë nëtë́ti nëtë ꞌitámainun! 8 ¡ꞌAnan ka parúmpapa itsi parúmpapa itsi anuabi ꞌanan, Éufrates kakë baka anuabi uinu kara me kuainakëakëxa ax ꞌapu ꞌixun ainan ꞌinun ꞌimiti ꞌikën! 9 ¡Axa ami nishkë unikama, anu uni ꞌikëma menua ꞌikë, akamax ka an ñu ꞌaia kuati ami rakuë́ti ꞌikën! 10 ¡ꞌImainun ka a ꞌinaínshiti ñukama bëanan ꞌapu ꞌinánti bikë akama Tarsisnu ꞌikë ꞌapukama ꞌimainun paru nasínu, ꞌikë akamanribi bëxun ꞌinámainun ka, Sabá ꞌimainun Sebá anu ꞌikë ꞌapukamanribi bëxun ꞌinánti ꞌikën! 11 ¡Kamabi menu ꞌikë ꞌapukamax ka, an ismainunbi menu rantinpuruni tsóbuti ꞌikën! ¡Kamabi menu ꞌikë unikaman ka an kakësabiokin aín bana tankin ñu ꞌati ꞌikën! 12 An ka uni ñuñumakama ꞌakinua ñukákëxun ꞌakianan, an ꞌakinti ꞌaíma ꞌaia tëmërai uin kara ꞌakinti ꞌikë kixun sinánkë a unikamaribi ꞌakinti ꞌikën. 13 Ax ka uni mënin sinánñushikamax tëmëraia isi anun masá nuituti ꞌikën, ꞌimainun ka ñuñuma unikamaribi upiti tsónun ꞌakinti ꞌikën. 14 ꞌAnan ka an paránxun ñu mëmikë unikamanua chikíanan, an ꞌishtuinshi, bënë́kinshi ñu mëëxunun kikë unikamanua atu chikínti ꞌikën, atun tsóti ax ka an iskëx ꞌitsaira kupíkë ñusamaira ꞌiti ꞌikën. 15 ¡ꞌApu ax tsókëpan ꞌikë ka! ¡Sabá menua ꞌikë kuri ꞌinankanti ꞌikën! ¡Usakin ꞌanan ka ënkinma abi Dios ñukáxunti ꞌikën! ¡Usa ꞌaish ka ax upíokin sinánxunkë ꞌiti ꞌikën, ꞌapu ax ka xënibua ꞌaínbi tsóti ꞌikën! 16 ¡Usa ꞌain ka a menu ꞌaisamaira trigo ꞌiti ꞌikën, ꞌianan ka bashi rëbu anubi trigo ꞌaisamaira ꞌiti ꞌikën! Usa ꞌain ka Líbano menu trigo ꞌapákëxa bimikë usaira aín bimi ꞌi xubi koia iskë usaira ꞌiti ꞌikën! 17 ¡Usa ꞌain ka ꞌapun anë ax manukima usabi okin sinánkë ꞌiti ꞌikën; usa ꞌain ka an ꞌakë ñukama kamaxunbi ꞌunánkë ꞌaish bari këñutisama pain ꞌain an ꞌakë ñukamaxribi këñutima ꞌikën! ¡ꞌIanan ka kamabi menu tsókë unikama a ꞌapu kupín upíokin sinánxunkë ꞌiti ꞌikën! ¡Usa ꞌain ka kamabi menu ꞌikë unikaman ax ka chuámarua tsotia kiax kiti ꞌikën! 18 Chúamarua ka Israel unikaman ꞌIbu ꞌimainun atun Dios ax ꞌiti ꞌikën, axëshi ka an ñu chaiirabu ꞌakë a ꞌikën; 19 aín anë upíira ax ka xënibua ꞌaínbi sinánkë ꞌiti ꞌikën. ¡Usa ꞌain ka aín kushi ax xënibua ꞌaínbi kamabi menu ꞌikë unikaman ꞌunánkë ꞌiti ꞌikën! ¡Usa ka ꞌiti ꞌikën ashi! 20 Ënushi ka David Jesénën bakë bëchikë axa Diosbë bana ënë sënënia. |
© 1978, 1995, 2008, 2022 Wycliffe Bible Translators, Inc. All rights reserved.
Wycliffe Bible Translators, Inc.