Salmos 69 - Kashibo-Kakataibo Biblia

ꞌAisamaira tëmërai Diosan ꞌakinun David kia bana

¹ ꞌËn ꞌIbu Dios ꞌë kamina ië́miti ꞌain, ꞌëx inúkë ñukama an ka bakami kikësa ꞌinun ꞌë ꞌimia;

² ꞌëx kana ꞌian pëanpëankikë nëminra anu nanë́kësa ꞌinun ꞌitsaira ñu inúkin tanin, usa ꞌain ka ꞌën taën anu amáti ꞌaíma ꞌikën. ꞌËx kana baka nëminra anu ꞌain, anua ka aín xobukë kushiira an ꞌë taranpakin ubanpaxa.

³ ꞌItsaira banai kana tëëxan; usa ꞌain kana ꞌën tëru paëia tanin; ¡usai ꞌianan kana uni kara bain aia kixun kainkësa okin ꞌën Dios kainin!

⁴ Añu ñu ꞌën ꞌakë ꞌaímabi ka ax ꞌëmi nishkë unikamax ꞌitsaira ꞌaish ꞌën maxkánu ꞌikë bun ꞌitsasamaira ꞌikën; axa ꞌëmi nishkë unikamax ka ꞌitsaira ꞌikën, usa ꞌixun ka bëtsi ñu ꞌakëmabi ꞌë ꞌaisa tankania, ꞌimainun ka atun ñu mëkamakë ꞌikëmabi ꞌë ñu ꞌinánun kixun ubioia.

⁵ ꞌËn Dios min kamina usakin ꞌatimabi ꞌën ꞌakë ñukama a ꞌunan; usa ꞌain ka ꞌën ꞌuchakama ax mimi unëtisama ꞌikën.

⁶ Dios kamabi kushiñuira; ¡axa mimi katamëkë akamax ka ꞌëx ꞌuchakë anun rabinkë ꞌitima ꞌikën! Israel unikaman Dios, ꞌëx ꞌuchakë kupín ka an asérabi mi barikë unikaman ka uisai karana ꞌiti ꞌai kiax bënë́kinma munu ꞌakinun mi barikanti ꞌikën.

⁷ Mi kupín kana unin uisakinshi kara ꞌë ñuikëxunbi tënëa; usai ꞌi kana ꞌën bëmanabi xanai rabian;

⁸ ¡usa ꞌikë ka achúshi uni bërí ukë ꞌunánkëmasa, ꞌën xukë́n ꞌibukamanbi ꞌë isia!

⁹ ꞌËn anuxun mi rabiti xubu a nuibakin bërúankëbëa ꞌëmi bananan an mi ribi ñuikë unikama bana ax ka ꞌënan ꞌaisama ꞌiaxa.

¹⁰ Usa ꞌain ꞌëx pima ꞌianan inia isi unikama ꞌëmi kuaikania;

¹¹ ꞌën uni ñukëbëtan pañuti chupa pañuia isi ka ꞌë ꞌusani kamabi uni kuaia,

¹² Kamabi unikama ëmanu ꞌikë ꞌimainun, axa ñu xëax paë́nkë unikamaxribi ka ꞌë ñui ꞌatimati banaia.

¹³ ꞌAínbi kana, ꞌëx ënima mibë banain. ꞌËn ꞌIbu Dios, ¡bërí kamina min ꞌë ꞌakinti ꞌain! Min ꞌitsaira nuibakin, ¡kamina ꞌakinsatankin ꞌë kati ꞌain! ꞌËn kana ënkinmami, ¡ꞌë ꞌakinkëxun ꞌunanin! Usa ꞌain kamina ꞌë ¡ië́miti ꞌain!

¹⁴ ¡Chua menu nanë́kësa ꞌiabi kamina anua ꞌë ëntima ꞌain! ¡Axa ꞌëmi nishkë unikamaxa ꞌëmi nishiabi ꞌakianan, kamina baka nëminnu nikësa ꞌaish tëmëraiabi ꞌë ꞌakinti ꞌain!

¹⁵ ¡ꞌItsaira ñu inúkin baka kushin taranpakësa taniabi kamina ꞌë ëntima ꞌain! ¡ꞌIanan kana baka nëmin samani birikian ñu nanëni urutëkënkë usanu ꞌikësa tanin, usa ꞌain kamina anu ꞌikësa ꞌikëbi ꞌë ëntima ꞌain!

¹⁶ ꞌËn ꞌIbu Dios, mix upí ꞌixun; ¡nuibairakin kamina timakësa okima ꞌë kati ꞌain! Usa ꞌain kamina mix nuibanairakë ixun ꞌë nuibati ꞌain;

¹⁷ ¡usa ꞌain kamina min uni ꞌikë ꞌë kuashikësa otima ꞌain! ¡ꞌAtima ñu inuti bënëtia isëshikinma kamina, ꞌë ꞌakinti ꞌain!

¹⁸ Usa ꞌain kamina, ꞌë ꞌurama okin ꞌë ꞌakinti ꞌain; ¡ꞌë ꞌakinkin kamina axa ꞌëmi nishkë unikamanua ꞌë bërúanti ꞌain!

¹⁹ Min kamina ꞌunan uisai karana ꞌichakin ñuikankëx, katë́ti ꞌitsaira ꞌëx tëmëra kixun; ꞌimainun kamina uikamax kara ꞌëmi nishia kixun ꞌunán.

²⁰ Usa ꞌain kana ꞌitsaira ñuikankëxun kuakin bëtsi bëtsiokin sinanin; ¡usa ꞌaish kana bëtsiokin sinani kushiñumasa ꞌain! Usai ꞌikin kana ñu ꞌati ꞌunánma unisa ꞌixun uin kara ꞌë nuibakin ꞌakinti ꞌikë kixun sinánkin barian.

²¹ ꞌËn pitinubi muka ñu ꞌaruanan ka, shimaia ꞌë ñu bimi baka kachakë xëanun kixun ꞌinánkëxa.

²² ¡Usa ꞌain kamina min atúan timë́xun anu bukuxun piti ꞌakë anuxun piti ꞌaxun piaxa, anunbi atux ꞌatimanun ꞌimiti ꞌain!

²³ ¡Usakin ꞌimianan kamina bëxuñu ꞌixun iskasmanun ꞌimianan, nëtë́tima aín xokamax bërënun ꞌimiti ꞌain!

²⁴ Mix atumi nishkin kamina; ¡uisa ñu kara atunu ꞌia ꞌikëbëa atux tëmëranun ꞌimiti ꞌain!

²⁵ Usaia ꞌikëbë ka anua ꞌikankë atun ëma ax anu uni ꞌikëmasa ꞌiti ꞌikën, ꞌimainun ka atun xubu ënkë ꞌain uixi anu ꞌikëmasa ꞌiti ꞌikën;

²⁶ Min kamina ꞌë atsánkë ꞌikëbi, ꞌitsaira tëmëramiakën, usa ꞌikëbi ka axa ꞌëmi nishkë unikaman paë tamikin ꞌë ñui ꞌënun kuaikania.

²⁷ Usa ꞌain kamina atux ꞌuchañu ꞌikë ꞌatima okin atun ꞌuchakë kupín tëmëramiti ꞌain; ¡ꞌaínbi kamina uibi atun ꞌucha mënioxuntima ꞌain!

²⁸ ¡Usokin ꞌakinma kamina a unikaman anë anua xënibua ꞌaínbi min unikama mibë ꞌiti anua atun anë tërënti ꞌain! ¡Usakin ꞌakin kamina atun anë, anua mix kuëënkësabi oi ꞌikë unikaman anë ꞌikë anubi atun anë nantima ꞌain!

²⁹ ꞌAínbi kamina ꞌëx ꞌinsínkë ꞌaish tëmërai atsánkë, ꞌikëbi mix ꞌën Dios ꞌixun ië́mikin ꞌë ꞌakinti ꞌain.

³⁰ Usakin ꞌakëxun kana ꞌën Dios ꞌikë mi ñuikin rabiti ꞌain; usakin kana mixmi chaiira ꞌikë min anë rabiti ꞌain,

³¹ usakin ꞌaxunkëx ka Dios asérabi kuëëinrati ꞌikën, baka aín bënë ꞌaxun xaroxuanan, ñuina ꞌarakakë manchañu ꞌimainun ꞌuntsisñu ꞌaxun xaroxunkëxa ꞌikë usamairai kuëënti ꞌikën.

³² Usokin ꞌaia isi ka uni tëmërakëkama ax chuámarua tani kuëënti ꞌikën, usai ꞌia isi ka an Dios barikë unikama ax atun nuitunën munu sinanati kuëënkanti ꞌikën;

³³ usai ꞌikëbëtan ka Diosan uni ñuñumakama aín bana kuanan; aín unikama bëtsi unikaman ñatanbiankin ꞌain menu buánkë akamaribi kuakëmasa otima ꞌikën.

³⁴ ¡Dios a ka an unio naí me parúmpapa ꞌimainun, kamabi ñukama anbi rabikë ꞌiti ꞌikën!

^35-36 Diosan ka Jerusalénnu ꞌikë unikama ië́mianan Judá ëmakama amiribishi birutëkënkin ꞌanun ꞌamiti ꞌikën. Usakin ꞌakë ꞌain ka min unikamax a ëma ꞌibuai anu tsóti ꞌikën; usai ꞌikin ka min unikaman rëbúnkinën atunanbi ꞌinun a ëmakama biti ꞌikën, ¡Ui unikaman kara min anën mi rabikin mix kikësabiokin ꞌaia atun ka anu tsókin a ëmakama ꞌatëkënti ꞌikën!