Salmos 66 - Kashibo-Kakataibo Biblia

Diosan aín kushin unió ñukama ax ka upíira upí ꞌikën

¹ Kuëëni ka Diosmi kantakan, kamabi menu ꞌikë unikama;

² Dios rabi kantakin ka aín anë rabikan; usai ꞌikin ka an ꞌa ñukama chaiirabu ꞌa sinánkin rabikanti ꞌikën.

³ Rabikin kamina Dios kati ꞌain: ¡Min unio ñukamax ka upíirabu ꞌikën. Mix kushiira ꞌixun kamina, axa mimi nishkë unikama rakuë́tia menu nipakëkësa ꞌitánun ꞌimin;

⁴ kamabi menu ꞌikë unikaman ka kuëënkin mi rabia, ꞌianan ka kantakin min anë ñuikin mi rabia!

⁵ Diosan chaiirabu ñu ꞌakë kamina isi ukanti ꞌain, aín unikama ꞌaxunkin upíira ñu ꞌakë a kamina iskanti ꞌain:

⁶ an ka parúmpapa me ishi rakati ëskinun ꞌimiakëxa, usakin ꞌimikëbë ka anun nun chaiti okëkama nikiani sikarakëkankëxa; ¡usa ꞌain kananuna akama sinani Dios rabi kuëënkanti ꞌain!

⁷ Usa ꞌain ka ax kushiira ꞌixun xënibua ꞌaínbi; kamabi nëtënu ꞌikë aín unikama isia; an ka ñunshinakëkin bana kuakëma unikama ami nishkima, tsuákirukin ꞌatima oti rabanan bërúaia.

⁸ ¡Bëtsi menu ꞌikë unikama mitsun kamina Nukën ꞌIbu Dios rabikanti ꞌain!, ¡usakin rabikin kamina mitsun bana Dios kuamikanti ꞌain!

⁹ Diosan ka uisa ñu kara inuti ꞌikëbi nu ꞌakianxa; usa ꞌixun ka bëtsi ñukama inútisama okin nu bërúanxa.

¹⁰ Mix nun Dios ꞌixun kamina, nukama uisai karanuna ꞌi isnuxun nu tankën, ¡usakin ꞌakin kamina manë uxua charokëxa upíira ꞌikësa usaribi ꞌinun ꞌimikin nu mëníokën!

¹¹ ꞌAnan kamina anua pakëti ꞌakënua ñuina pakëkë usairibi nux ꞌinun nu ꞌimiakën; usokin ꞌakëx kananuna ꞌitsaira tëmërakën.

¹² Usakin ꞌakin kamina bëtsi unikamanbia atun kuëënkësa okin nu tëmëraminun ëankën, usokëx kananuna bakan sikánan tsi rëkirukë iskësa anun nu inúmiakën, usakin pain abëtsinkin kamina anua piti ꞌaisamaira ꞌikë me upí ënu nu bëakën.

¹³ Usa ꞌain kana bërí anuxun mi rabiti xubunu atsínxun ꞌaímai këñutanun ñuina rëxun mi xaroxunti ꞌain; usakin kana ꞌën mi ꞌaxunuxun kakësabiokin mi ꞌaxunti ꞌain,

¹⁴ usakin ꞌaxunuxun kana, ꞌënbi ꞌaisama ñukama inuti tëmarakin mi kakën.

¹⁵ Usakin ꞌakin kana ꞌaímai këñutanun ñuina xuairabu a xaroxunkin vaca bënëkama ꞌimainun cabra ꞌain bënëkama; ꞌimainun carnero akamaribi mi xaroxunti ꞌain.

¹⁶ ¡Kamabi an Dios rabikë, mikamax kamina rikuatsinti ꞌain! Rikuatsinxun kamina usakian an ꞌë ñu ꞌaxunkëkama ñuixumainun kuati ꞌain.

¹⁷ ꞌËn kuëbitanbi rabikin kana, ꞌëa ꞌakinun kixun kakën.

¹⁸ ꞌËx ꞌatima sinánñu uni ꞌikë ka Diosan ꞌën bana kuakë ꞌitsianma;

¹⁹ ¡ꞌaínbi ka an ꞌën bana kuakin ꞌën ñukákësabi okin ꞌë ꞌaxuankëxa!

²⁰ ¡Usa ꞌaish ka Dios ax upíokin rabikë ꞌiti ꞌikën, an ka ꞌën ñukákëxun kuashikësa onan, kana ꞌaima kikínma ꞌë ñu ꞌaxuankëxa!