Salmos 65 - Kashibo-Kakataibo Biblia

Dios ax ka rabiti ꞌikën

¹ ꞌËn ꞌIbu Dios Jerusalén menu ꞌikë, ¡mix kamina ashi rabiti a ꞌain!, ¡min kamina ñu asérabi ꞌaxunuxun katankëxun ꞌaxunti a kuëënin,

² min kamina mibë banakin nun ñukákëxun kuatin! Kamabi menu ꞌikë unin ka mibë banakin mi rabiti ꞌikën.

³ Nun ñu ꞌatima ꞌakëkama an ka nu ꞌatimakin sinánmia, ꞌaínbi kamina min nun ꞌuchakama nu mëníoxunin.

⁴ Chuámarua ka ami kaískë unikama an tania usa ꞌikë kamina mi ꞌurama ꞌinun atu ꞌimin, ꞌimikëx ka anuxun mi rabiti xubunu ꞌia. ¡Usa ꞌain ka min xubunu ꞌikë unikama min bana ꞌaiami ꞌakinkëx piti pi anun puchacë usa ꞌikën!

⁵ Nukën ꞌIbu Dios an nu ëñëmikë, min kamina mi ꞌurama ꞌinuxa atux min xubunu ꞌinun ꞌimin, usa ꞌixun kamina ñu chabu ꞌimainun upíira ꞌaxunkin mishi rabinun nu ꞌimin; ënë menu tsókë kamabi unikama ꞌimainun, parúmpapa ꞌukëmanan tsókë unikama ax ka mimi katamëtia;

⁶ min kamina mix kushiira ꞌixun, anubia ꞌitinu bashikama uniokën.

⁷ Min kamina parúmpapa bëchuni xukiruiabi aín bëchunkë nëtë́mianan, ëmakamanu ꞌikë unikama axa nishanani tsuákiruiabi bukubunun ꞌimin;

⁸ usakin mi ꞌakëbë ka anua me sënënakëa anua tsókë unikama axribi, min ꞌá ñu upíbu isi rakuë́ti ꞌikën; usai ꞌibi ka munuma sharati kuënkëni, amiaxa bari urukë a ꞌimainun amia bari kuabúkë amiaxi kuëënti ꞌikën.

⁹ Min kamina mekama bërúankin; ñu ꞌapákëkama kómiti ꞌuíribi ꞌibúnun ꞌimin; usakin ꞌakëxuan xëxatan ꞌëkin mapurukin chabókëxun ka ñu ꞌapákëkaman tuaia. ¡Usakin ꞌakin kamina me anu ñu ꞌapátisabi ꞌinua mëníokanun ꞌimin!

¹⁰ Min kamina anu ñu ꞌapáti me tukakin buinakë a ꞌaimaia chabátanun ꞌimianan, aín tukakëkamaxa ꞌaímai tsënkitanun ꞌimin; usakinmi ꞌitsaira ꞌuí ꞌibúmikin chabókëx me ꞌaímai tsënkikëbë ka ñu ꞌapákëx ꞌitsaira aín bimi ꞌinun bimia, usakin ꞌakin kamina unin ñu ꞌapákë ꞌitsaira biminun upíokin sinánxunin.

¹¹ Min upíokin sinánxunkëx ka bari këñúkëbëtan ꞌapákë ñu ax ꞌitsaira aín bimi ꞌia, usai ka minmi usai ꞌiti sinánxunkë me anuax ꞌia;

¹² usai ꞌikëbë ka anu uni ꞌikëma menua ꞌikë basi ax paxaira ꞌimainun, matá upíirabu ꞌinun aín bashikamanu ꞌikë pëikamaribi mëníokatia;

¹³ usai ꞌimainun ka anu pasto ꞌaxunkë anu ꞌaisamaira oveja ꞌia, ꞌimainun ka me sapankama anuribi ꞌaisamaira trigo ꞌapákë ꞌia; ¡usai ꞌikëbë ka kamabi uni kuëëni kantai sharatia!