Salmos 63 - Kashibo-Kakataibo Biblia

Diosmi katamëti ka uni kuëënti ꞌikën.

(Ënëx ka Davidtan kuënëo bana ꞌikën)

¹ ¡ꞌËn ꞌIbu Dios, mix kamina ꞌën Dios ꞌain! Usa ꞌikë kana mi ꞌaisabi tankin kuëënkin barin: ꞌën kana shimaxun ꞌumpax barikë usaribi okin mi barin; usa ꞌain ka anu ꞌumpax ꞌikëma me ëskikë usa ꞌën nán ꞌikën.

² ꞌËn kana anumi ꞌikë min xubunua mi istisa tanin, anua mi iskësaribi okin kana min kushinmi ñu chaiirabu ꞌakë a istisa tanin,

³ ¡minmi ꞌë nuibakë ax ka ën tsókë usamaira ꞌikën! Usa ꞌikë kana ꞌën kuëbitanbi mi rabiti ꞌain;

⁴ ꞌanan kana ꞌëx anun tsókë nëtëkama anun mi rabiti ꞌain, ꞌusakin ꞌakin kana ꞌën mëkën manámiokin mi ñukáti ꞌain.

⁵ Usai ꞌitsaira kuëëni kana, unin timë́xun piti upíokin ꞌaxun pianan xëai kuëënkësa usaribiti ꞌikin, ꞌën kuëbitanbi kuëënkin mi rabiti ꞌain.

⁶ Ñantan ꞌuxi rakábukë anuxunbi kana mimi sinanin;

⁷ mix kamina an ꞌë ꞌakinkë a ꞌain. ¡Usa ꞌain kana ñuina pëchiñunën ꞌain tuá bërúankin ꞌain pëchi tëmú ꞌakësa usaribi okinmi ꞌakëx chuámarua tani min bërúankëx kuëënin!

⁸ ꞌËn namikama ax ka asérabi minan ꞌikën; usa ꞌain kamina min mëkën mëkeu anun kushiokin tuinkësa okin ꞌë ëntima ꞌain.

⁹ An ꞌë ꞌaisa tankë unikama ax ka, me kini ꞌukëmëu nipakëkë ꞌiti ꞌikën;

¹⁰ ¡atux ka manë xëtokën ꞌakëx bamakë ꞌiti ꞌikën, usakin ꞌakë ka an nami paxa pikë raëkëma shórapána akaman aín nami piti ꞌikën!

¹¹ ꞌaínbi kana ꞌapu ꞌaish Diosmi kuëënti ꞌain; usa ꞌain ka uikamax kara ami sinania ax sinanatëkentima oi ami kantati ꞌikën, ꞌaínbi ka axa këmëishi banakë unikama uisaibi banatima okin aín kuëbí xëpúti ꞌikën.