Salmos 51 - Kashibo-Kakataibo Biblia

Davidtan aín ꞌuchakë mëníoxunun Dios ñuká bana

¹ Mix nuibanairakë, Dios ꞌixun kamina ꞌë nuibati ꞌain; usa ꞌixun kamina ꞌë nuibakin ꞌën ꞌatimakin sinánxun ñu ꞌakëkama a ꞌë tërënxunti ꞌain.

² ¡ꞌËn ñu ꞌatima ꞌakë a kamina ꞌë mëníoxunti ꞌain! ¡ꞌAnan kamina ꞌëx ꞌuchakëkama a ꞌë tërënxunti ꞌain!

³ ꞌËn kana asérabi upíokin ꞌunanin min kakësokin ꞌaíma kana ꞌatima ñu ꞌai ꞌucha kixun; ꞌën ꞌuchakë ax ka ꞌën sinánnuax nëtë́tisama tania.

⁴ Mimi kana ꞌëx ꞌuchan, usai ꞌikin kana, a ꞌaia min uni ꞌaisama iskë ñu a ꞌan, usa ꞌain ka min bana usakin ñu ꞌakatsimi kikë ax asérabi ꞌikën.

⁵ Asérabi kana ꞌën titan tuakëxbi ꞌuchañu ꞌiakën; usa ꞌaish kana ꞌën titan puku ꞌukëmëu ꞌaishi ꞌuchañu ꞌiakën.

⁶ Min kamina asérabi sinan mëninñushi uni a nuibatin, usa ꞌixun kamina ꞌëribi sinan ñuira ꞌinun ꞌimia.

⁷ ꞌËn ꞌuchakë ꞌë mënioxunkin hisopo kakë i pëñan anun ꞌakësa ꞌitánun ꞌë mëniokëx kana upíira bërúti ꞌain; usokin min ꞌë mëniokëx kana matsi uxua iskësamaira ꞌimainun xapu tunkikë usaribi ꞌinun ꞌën nuitu mëniokati upíira ꞌiti ꞌain.

⁸ ꞌË kamina ꞌitsaira tëmëranun ꞌimian; ꞌaínbi kamina amiribishi ꞌitsaira kuëënun ꞌë ꞌimi tëkënti ꞌain.

⁹ ꞌËn ꞌuchakëkama a kamina istima ꞌain ꞌianan kamina ꞌën ñu ꞌatima ꞌati sinánkë a ꞌë tërënxunti ꞌain.

¹⁰ ꞌËn ꞌIbu Dios, ꞌatima ñu sinánxuma ꞌanun kamina ꞌë ëntima ꞌain. ¡ꞌIanan kamina upí sinánñu bërí ꞌinun ꞌë ꞌimiti ꞌain!

¹¹ Minan ꞌikë kamina ꞌë ëntima ꞌain, ꞌianan kamina ꞌënua ꞌikë min bëru ñunshin ꞌë bikuantima ꞌain.

¹² Min kamina amiribishi kuëëntëkënun ꞌë ꞌimiti ꞌain; min bëru ñunshin an ka uisa kara mix kikësabi oi ꞌiti min bana a ꞌë ꞌunamiti ꞌikën,

¹³ usakin ꞌakëxun kana ꞌën uni ꞌatimakama a atun ñu ꞌatima ꞌakë ëni kara uisai tsóti ꞌikë kixun ꞌunánmiti ꞌain, ꞌimainun ka usakin ꞌën ꞌunánmikëx uni ꞌuchañukama ax minan ꞌiti ꞌikën.

¹⁴ An uni ꞌakë uni ꞌisataniabi kamina a sinánua ꞌë mëníoti ꞌain, mix kamina ꞌën Dios an ꞌë ië́miti a ꞌain, usa ꞌixun kana mi rabi kantakin mix kamina usa ꞌai kixun ꞌën ñuiti ꞌain.

¹⁵ ꞌËn ꞌIbu min kamina ꞌën kuëbitan bananun ꞌë ꞌimiti ꞌain, usakin ꞌën kuëbí ꞌakëxun kana anun upiti kantakin mi rabiti ꞌain.

¹⁶ ꞌËn kana kuëënkin ñuina rëtankëxun mi xaroxuanan a mi ꞌinaínshiti ñukama mi ꞌinánti ꞌain, ꞌaínbi kamina min a ñukama ꞌaxunti kuëëniman.

¹⁷ Mi ñuina ꞌaxun xaroxunkë usamaira ka uin kara Dios ꞌikë; ¡asérabi ain nuitunënbi mi sinania ax ꞌikën usa ꞌikë kamina timaiman! (Ënë banax ka Davidtan kuënëomasa ꞌikën, usa ꞌaish ka bëtsi menu buánkë ꞌixuan uni itsin kuënëosa ꞌikën Jerusalén ëma anun kënëkë kënë rurupa ꞌain.)

¹⁸ Min kamina upíokin Sión kakë me a ꞌati ꞌain ꞌanan kamina Jerusalén; ëma anun kënëara a birutëkënun ꞌamiti ꞌain.

¹⁹ Usa ꞌain kamina mi ꞌinaínshiti ñukama a ꞌimainun, ꞌaímai këñutanun mi ñuina xaroxunkë a upí isti ꞌain, usokin ꞌakëbëtan ka anuxun ñuina xaroxunti ꞌakë anuxun mi ñuina xaroxunkanti ꞌikën.