Salmos 47 - Kashibo-Kakataibo Biblia

Dios ax ka kamabi unikaman ꞌapuira ꞌapu ꞌikën

¹ ¡Kamabi menu ꞌikë unikamax ka kuëëni, mëtashkikan! ¡ꞌIanan ka a rabi kuëënkin munuma sharákin Dios rabikan!

² Nun ꞌIbu ax ka kushiira ꞌaish manámi ꞌikë ꞌaish ami rakuë́ti ꞌikën; ax ka ꞌapuira ꞌapu ꞌaish kamabi menu ꞌikën,

³ an ka kamabi ëmanu ꞌikë ꞌianan bëtsi mekamanua ꞌikë unikama nux atusamaira ꞌikë, nu meua ꞌinun ꞌimiakëxa,

⁴ an ka anu nux ꞌiti me nu kaisxuankëxa nun chaitiokë Jacob nuibakin kásabiokin, usa ꞌain kananuna ꞌitsaira kuëënin.

⁵ ¡Nukën ꞌIbu Dios ax ka anua ꞌikë anu kuaruaxa, kuëëni sharákian carnero mancha banokëbë ka kuaruakëxa!

⁶ ¡Usa ꞌain kananuna Dios anun kantati anun ami kantakin rabiti ꞌain! ¡A mi kantakin kananuna ax ꞌapuira ꞌikë a rabiti ꞌain!

⁷ ¡Dios ax ka ami upiti kantakin rabiti ꞌikën! ax ka kamabi menu ꞌikë unikaman ꞌapu ꞌikën.

⁸ ¡Dios ax ka kamabi menu ꞌikë unikaman ꞌapuira ꞌapu ꞌikën! ¡Usa ꞌaish ka Dios ax anua tsókë upíira anu tsótaxa!

⁹ Usa ꞌain ka kamabi menu ꞌikë ꞌapukama ꞌimainun, Diosan aín uni ꞌiti kaisa Abrahamnën rëbúnkikamabë timë́ti ꞌikën,

¹⁰ usa ꞌain ka kamabi menu ꞌikë ꞌapukaman ainan ꞌixun aín unikamabëtan Dios rabiti ꞌikën. ¡Ax ka ñukama manánmi ꞌikën!