Salmos 46 - Kashibo-Kakataibo Biblia

Nun ꞌIbu Dios ax ka nu ꞌakini nubë ꞌia kikë bana

¹ Nukën ꞌIbu Dios ax ka an nu kushionan ami katamëkëxun ꞌakinkë ꞌikën, usa ꞌixun ka uínsaran karanuna ꞌaisama ñu inuti anuabi nu ꞌakinia.

² Usa ꞌain kananuna me shaí kikin, parúmpapa nëminnu ain bashikama nanë́mainun,

³ nëtë́timaira parúmpapa kushiira ain bëchunkë, xukirukëbë ain bashikama shaíkikëbëbi rakuë́tima ꞌain.

⁴ Achúshi baka xobutia aín panakakama ꞌikësa usaribiti ka anua ꞌikë Diosan ëma Jerusalén kakë ax ëmakamasama upíira ꞌikën.

⁵ Usa ꞌain ka a nëbë́tsinbi ꞌixun Diosan aín ëma bërúanti ꞌikën. Anuxun ka Diosanbi nëtë pëkarakuatsinia xabakuatsinun ꞌimiti ꞌikën.

⁶ Uinsaran kara Diosan bëtsi bëtsi menu ꞌikë uni aín bana kuanun ꞌimia anun ka ratuti bëtsi ëmanu ꞌikë ꞌapukama me shaíkikë anunbi rakuë́ti ꞌikën.

⁷ ¡Nukën ꞌlbu kamabi kushiñuira ax ka nukamabë ꞌikën! ¡Jacobnën rabia Dios ax ka aminu katamëkë ꞌikën!

⁸ Rikuatsinxun kamina ñukama chaiirabu, kamabi menu Nukën ꞌIbun ꞌakëkama a isi uti ꞌain:

⁹ an ka kamabi menu ꞌikë unikama ꞌakánantëkënia, anuishi sënë́nmikin aín manë pará ꞌianan aín piakama ꞌimainun, anuaxa ꞌakanankë caballonën nirinkë manë ꞌakë akama mëníonun ꞌamia.

¹⁰ ¡Usakin ꞌamikëxun ka! “¡ꞌËx kana Dios ꞌai kixun ꞌunánkanti ꞌikën, kamabi menu ꞌikë unikama manámi kana ꞌëx ꞌain! ¡ꞌËx kana kamabi me manánmira ꞌain!”

¹¹ ¡Kamabi kushiiñu Nukën ꞌIbu ax ka nubë ꞌikën! ¡Usa ꞌaish ka Jacobnën Dios ꞌiá ꞌaish nun Diosribi ꞌixun nu ꞌakinia!