Salmos 43 - Kashibo-Kakataibo Biblia

¹ ꞌËn ꞌIbu Dios ꞌë ꞌakinkin kamina; ¡bëtsi unikama ꞌën ꞌakësa ꞌikëa ꞌunánkanun ꞌati ꞌain! ¡akin kamina këmë unikama ꞌimainun ñu ꞌatimashi ꞌakë unikamanua ꞌë ië́miti ꞌain,

² mix kamina ꞌën Dios ꞌianan an ꞌë ꞌakinkë a ꞌain! ¿Uisa kupín kaina mi ꞌura ꞌinun ꞌë ꞌimin? ¿Uisa kupín karana masá nuitukë nianan, axa ꞌëmi nishkë unikaman ꞌatima okë ꞌiti ꞌain?

³ Min kamina min kushi an tirísa; ꞌixuan aín bashi upí kakë anu buánan, anuxun mi rabiti xubu, anu kuanun ꞌë ꞌimiti ꞌain.

⁴ ꞌImikëxun kana anuxun mi ñuina xaroxunti ꞌakë a ꞌurama oti ꞌain ꞌën ꞌIbu Dios, anuxun kana mi rabikin ꞌitsaira kuëënkin, arpa mëëkin mi rabiti ꞌain ꞌën ꞌIbu Dios, usa ꞌixun kamina ꞌitsaira kuëënun ꞌë ꞌimiti ꞌai ꞌËn ꞌIbu Dios.

⁵ ¿Uisa kupín karana sinanati kana ꞌaima kiax kiti ꞌain? ¿Uisa kupín karana ꞌitsaira sinánti ꞌain? ꞌËn ꞌIbu Dios ashi kana an ꞌë ꞌakinun rabiti ꞌain. ¡An ka ꞌën Dios ꞌixun ꞌë ꞌakinti ꞌikën!