Salmos 42 - Kashibo-Kakataibo Biblia

Diosan ꞌë ꞌakinti kana kuëënin kikë bana

¹ Chaxun shimaxun ꞌumpax xëanuxun barikësa, usaribi okin kana ꞌën Dios ꞌixunmi ꞌë ꞌakinun mi barin.

² Mix kamina Dios an uni tsónun ꞌimikë a ꞌain, usa ꞌain kana ꞌën mishi barin. ¿Uinsaran karana anuxun mi rabiti xubunuxun mi rabi kuantëkënti ꞌain?

³ Nëtë ꞌimainun imë́bi kana ꞌën piti pikësa ꞌinun tëmërai bëunan mëskúkin ëniman, usai ꞌia ka kamabi nëtën unikaman ꞌëmi kuaikin ꞌë ñukatia: “¿Uinu kara min Dios ax ꞌik?”

⁴ Kixuan ꞌë kakan a sinani kana uínsaran karana ꞌëx tëmëra akama sinani anun ꞌitsaira masánuituti paëin; ꞌianan kana anuxun mi rabiti xubu Jerusalénnu ꞌikë anuax unikamabë kuanxun fiesta ꞌakin mi rabi munuma kuëëni ꞌia akama sinanin. ¡Ax ka fiesta chaiira nun ꞌakë ꞌiakëxa!

⁵ ¿Uisa kupín karana Diosmi sinanatëkëni kana ꞌaima kiax kiti ꞌain? ¿Uisa kupín karana ꞌitsaira sinánti ꞌain? ꞌËn ꞌIbu Dios ashi kana an ꞌë ꞌakinun rabiti ꞌain. ¡An ka ꞌën Dios ꞌixun ꞌë ië́mia!

⁶ ꞌËn kana ꞌitsaira kana ꞌatima ꞌai kixun sinanin usa ꞌain kana añu ñubi ꞌaisama tanin. Usa ꞌain kana Jordán kakë baka anu ꞌikë me anuxun ꞌanan, Hermón kakë aín bashi ꞌimainun Misar anuxun mi ꞌitsaira sinani kuanti ꞌain.

⁷ Usa ꞌain kana ꞌën bërí aín bashinuaxa ꞌumpax kushiira ꞌibúti maparami chakabuti banakë an ka ꞌë bakami kimikësa tamia; xukirui kushiira banaia kuakësa, usaribi kana ꞌëmi tëmëramikëxun tanin.

⁸ Usai ꞌiabi ka nëtën Nukën ꞌIbun ꞌë nuibakin ꞌakinia, ꞌianan kana imë́ribi ënimaira ami kantain usai ꞌikin abë banakin kana ꞌën Dios an ꞌë tsónun bërúankë a ñukatin.

⁹ ꞌËn kana Dios an nuibakin ꞌë ꞌakinkë, a ësokin kati ꞌain. “¿Uisa kupín kaina ꞌëmi manuan? ¿Uisa kupín karana axa ꞌëmi nishkë unikaman ꞌatima okëx masá nuitukë ꞌaish niti ꞌain?”

¹⁰ Axa ꞌëmi nishkë unikamax ꞌë ñui banakë kuakë anunbi kana ꞌën namikama paëkësa tani atsan, usai ꞌia ka panakimaira kamabi nëtën atun ꞌë ñukatia. “¿Uinu kara min Dios ax ꞌik?”

¹¹ ¿Uisa kupín karana sinanati kana ꞌaima kiax kiti ꞌain? ¿Uisa kupín karana ꞌitsaira sinánti ꞌain? ꞌËn ꞌIbu Dios ashi kana an ꞌë ꞌakinun rabiti ꞌain. ¡An ka ꞌën Dios ꞌixun ꞌë ië́mia!