Salmos 40 - Kashibo-Kakataibo Biblia

ꞌËn kana mixmi ꞌën Dios ꞌain min kuëënkësokinshi mi ꞌaxunti kuëënin

¹ Uisai karana Nukën ꞌIbumi katamëti ꞌai kixun kana ꞌën ꞌunánkën, usa ꞌain ka munuma banakin ꞌën kakëxun kuakëxa;

² an ka ꞌë uisa ñu inuti kara bamati, ꞌikëbi ꞌë ië́miakëxa; usakin ꞌakin ka chua menu nanë́kësa ꞌaish bamakësa ꞌikëbi ꞌë ꞌakiankëxa. Usakin ꞌakëx kana anuax uisaibi ꞌitëkënuxma maparanu nikësa ꞌinun ꞌëx ꞌikë ñukama inuti mëníokakën.

³ Usa ꞌikë ka anun a rabi kantanun ꞌë Diosan kanta ió achúshi ꞌunánmiakëxa. Usai ꞌëx ꞌia isi ka ꞌitsaira unix kuëëni chikirakëkin Nukën ꞌIbu rabiakëxa.

⁴ ¡Chuámarua ka uni ax Nukën ꞌIbumi katamëkë ax ꞌiti ꞌikën, usa ꞌain ka sinánñumasa ꞌaish rabinimaishi banakë unikama, ꞌianan an Diosmabi bëtsi ñu rabikë a unikaman kakësoi ꞌitima ꞌikën!

⁵ Nukën ꞌIbu, ꞌitsaira ka min ꞌakë ñu upíbu ꞌikën ꞌimainun ka numi ꞌaxunkë ñukama axribi ꞌitsaira ꞌitsa ꞌikën. ¡Usa ꞌain ka misaribi bëtsi Dios ꞌaíma ꞌikën! ꞌËn kana a ñukama ñuiti ꞌain, ꞌaínbi ka ꞌitsaira ꞌaish tupubiankin ñuitisamaira ꞌikën.

⁶ Min kamina bëráma ꞌasa okin ñuina rëxun xaronan ñu bimi bixun ꞌinántëkënti a kuëëniman; usa ꞌixun kamina ꞌaímai këñutanun ñuina xaroxunkin ꞌuchakëkama mëníonun ñu ꞌinaínshiti kuëëniman. Usa ꞌixun kamina min bana kikësokinshi nun ꞌaxunti kuëënin.

⁷ Usa ꞌain kana ꞌën mi kan: Ënu kana ꞌëx ꞌain, usai ka ꞌë ñuikin kirikanu kuënëo bana ax kia.

⁸ ꞌËn ꞌIbu Dios ꞌëx kana mix kikësabiokin ꞌai ꞌitsaira kuëënin; ¡usa ꞌain kana min ꞌunánmikë banakama manukinma ꞌën nuitunënbi sinanin!

⁹ Min unikama ꞌitsaira nëbë́tsinuxun kana; usaími kikë bana unëkima atu ñuixuan. ¡Minbi kamina upíokin ꞌunanin ꞌËn ꞌIbu Dios. ꞌËn kana unë́kinma min bana ñuian!

¹⁰ ꞌËn kana min unikama kaímama ꞌikima min ꞌakë ñukama ñuikin kan; usakin ñuixuanan kana Diosan ka nuibakin nu ië́miti ꞌikë kixun kamabi menu ꞌikë unikama kakën. Uisaxunbi kana mix kamina asérabi nuibanairakë ꞌai kixun ꞌaisamaira ꞌikëbi min unikama kaima ꞌiama ꞌain.

¹¹ Mix ꞌën ꞌIbu ꞌixun kamina, ꞌë nuibakin ëntima ꞌain; min kamina ënkinma asérabi ꞌë bërúanti ꞌain.

¹² ꞌËx ꞌaisamaira ñu ꞌinúkë ax ka ñuikinbi sënëoinsamaira ꞌikën. Usa ꞌixun ka anbi ꞌë upíokin istisama oia; ¡usa ꞌixun ka ꞌën ñu ꞌatima ꞌakë anbi ꞌë sinánñuma unisa ꞌinun ꞌimia! Usa ꞌaish ka ꞌën maxkánu ꞌikë bubëtan sënë́maira ꞌixun uisa ñubi ꞌaisama okin bëtsi sinánmia.

¹³ ꞌËn ꞌIbu Dios ꞌë kamina ië́miti ꞌain, ꞌianan kamina bënë́kin, ¡ꞌishtun ꞌë ꞌakinti ꞌain!

¹⁴ ¡An ꞌë ꞌaisatankë unikama kamina bëtsi bëtsi ñu inútanun ꞌimiti ꞌain! ¡Usokëx ka rabinkësa ꞌaish an ꞌë ꞌaisama oti kuëënkë unikamax kuanti ꞌikën!

¹⁵ ¡Usai ꞌi ka rabinkiani axa ꞌëmi kuaikë unikama abáti ꞌikën!

¹⁶ ꞌAínbi ka an mi ꞌakinun barikë unikamax ꞌitsaira kuëënti ꞌikën; uikamax kara min ië́mikin ꞌakinti kuëënia: “¡Akamax ka: ënima Nukën ꞌIbu ax ka chaiira ꞌikë kiax kiti ꞌikën!”

¹⁷ Usa ꞌain kamina ꞌëx ñuumarasa tani bënëti tëmëraia mix Dios ꞌixun ꞌë manutima ꞌain. Mix kamina an ꞌë ꞌakianan chuámarua ꞌinun ꞌimikë a ꞌain; ¡ꞌakintimi panakima kamina bënë́kin ꞌë ꞌakinti ꞌain!