Salmos 37 - Kashibo-Kakataibo Biblia

Nukën ꞌIbumi katamëti ñuikë bana

¹ An ꞌatima ñu ꞌakë unikama rabanan nëëti kamina nishtima ꞌain, ꞌianan kamina uni ꞌatima kaman ñu ꞌakëbëbi atumi nutsitima ꞌain;

² atun ꞌakë ñu ax ka basi tëakëx chushikë; ¡usaribiti bënëtishi ꞌia!

³ Nukën ꞌIbumi katamëkin kamina upí ñuishi ꞌati ꞌain, usai ꞌi kamina ënë menu tsóti Dios kuëënkësabi oi ꞌiti ꞌain.

⁴ Nukën ꞌIbu nuibakin kamina an kakësabiokin ꞌati ꞌain, usokinmi ꞌakëbëtan ka min ñukákësabi okin mi ꞌaxunti ꞌikën.

⁵ Min tsóti Nukën ꞌIbun bërúanxunun kamina ami katamëti ꞌain; usaími ꞌia ka an mi ꞌakinti ꞌikën.

⁶ Usai ꞌikin mi ꞌaia kamabi unin min ꞌakë ñu iskë ax ka asérabi ꞌaish barin xamarukin pëkakë usaribi ꞌiti ꞌikën.

⁷ An ꞌakinun kiax bënë́kinma kamina Nukën ꞌIbun mi munu; ꞌakimainun kaínti ꞌain. Usai ꞌikin kamina an ñu ꞌatima ꞌakë unikaman, ꞌakësokin ñu ꞌatima ꞌati sinántima ꞌain, atun ka ñu ꞌatima ꞌatishi sinania.

⁸ Mix nishkë a ëni kamina nishkësa ꞌitima ꞌain; nishkë an ka nun sinánkëkama ꞌatima oia.

⁹ An ñu ꞌatima ꞌatishi sinánkë unikamax ka a menuax chikínkë ꞌiti ꞌikën, ꞌaínbi ka axa Nukën ꞌIbumi katamëkë unikaman a me biti ꞌikën.

¹⁰ Ënuax ꞌitsama baritia ꞌikëbë ka an ñu ꞌatima ꞌakë unikama ꞌaíma ꞌiti ꞌikën; usai ꞌikë barikinbi ka uinuabi mëratëkëntima ꞌikën.

¹¹ ꞌAínbi ka uni aín sinan mëninshi akamax kuni Diosan atu ꞌinánti menu ꞌiti ꞌikën, anuax ka ax ꞌikësamairai chuámarua tani kuëënti ꞌikën.

¹² An ñu ꞌatima ꞌakëira unikaman ka uisakin kara an ñu upí ꞌakë unikama ꞌatima oti ꞌikë kixun baria, usai ꞌikin ka ami xuamati nishkin upiokinbi istisama tania.

¹³ Usai atux ꞌikëbëbi ka Nukën ꞌIbu anúan atu ꞌatima oti nëtë, ka ꞌurama kuatsinia kixun ꞌunani atumi kuaia.

¹⁴ An ñu ꞌatimaira ꞌakë unikaman ka aín manë xëtokë bianan aín kanti kanukin anun uni sinan mëninñushi ꞌaish, ¡upitax tsókë akama ꞌakatsikixun bitsia!

¹⁵ ꞌaínbi ka aín manë xëtokë anunbi abi tarókati ꞌiti ꞌikën, usai ꞌikëbë ka aín kantikama ax tsasipakë ꞌiti ꞌikën.

¹⁶ Uni upí sinánñu axa chukúmashi ñuñu ꞌikëxbi ka, uni ꞌatimakamaxa ñuñu ꞌikë usamaira ꞌikën.

¹⁷ Nukën ꞌIbun ka an ꞌatima ñu ꞌakë unikama ꞌatima okin këñuanan, an ñu upí ꞌakë unikama ꞌakinti ꞌikën.

¹⁸ Nukën ꞌIbun ka axa uisa ñu ꞌatimabi ꞌaíma tsókë unikama bërúaia, a unikama anu ꞌiti nëtë ax ka uínsaranbi këñutima ꞌikën.

¹⁹ Usa ꞌain ka anúan numi ꞌiti nëtë ꞌikëbë, numin ꞌi rabinkësa ꞌima, raírinëxa a piti ñuñuma ꞌimainun, atun piti ꞌitsaira ꞌiti ꞌikën.

²⁰ ꞌImainun ka ñu ꞌatima ꞌakë unikamax basi chushikë bimikëxa rëkirutankëx këñúkë usaíshi ꞌiti ꞌikën; usai ka axa Diosmi nishkë unikama ꞌiti ꞌikën, ꞌianan ka kuin tëxëkirui kuani nëtë́kë usaribiti ꞌiti ꞌikën.

²¹ Ñu ꞌatima ꞌakë unin ka ꞌinantëkënuxun bëtsi unin ñu bixunbi a kupín aín ꞌibu kupíoima; ꞌaínbi ka uni upí sinánñu an kuni usakin ꞌakinma aín ñu bixun asérabi aín ꞌibu ꞌinántëkënia.

²² Uikamax kara Nukën ꞌIbun upíokin sinánxunkë ꞌikë akamax ka Nukën ꞌIbun ꞌinánti me anu ꞌiti ꞌikën, ꞌaínbi ka Nukën ꞌIbun upíokin sinánxukëma unikama ax ꞌatima okin masókë ꞌiti ꞌikën.

²³ An ñu upíokin ꞌaia isi kuëënkin ka Nukën ꞌIbun aín uni uisai kara tsóti ꞌikë kixun ꞌunánmia;

²⁴ usakin ꞌakin ka uisa ñu ꞌatima ꞌai kara pakëtia usai ꞌiabi ka pakëkëmasa ꞌitánun Nukën ꞌibun ꞌakinti ꞌikën.

²⁵ ꞌËx kana bëná ꞌiakën, bërí kana ꞌëx uni kaniakëkë ꞌain, ꞌaínbi kana uinsaranbi uni ñu ꞌatima ꞌakëma kamaxa ñuñuma ꞌi tëmëraia isama ꞌain. ꞌIanan kana aín bakë bëchikëkamaribi uínsaranbi bëtsi unikama aín piti ñukáti nitsia isama ꞌain.

²⁶ Usa ꞌixun ka kamabi nëtën nuibakin bëtsi aín ñu na ꞌinántëkënun ꞌinania; usakin ꞌakëbë ka aín bakë bëchikëkama ax upíokin sinánxunkë ꞌia.

²⁷ Ñu ꞌatima ꞌakë ënkin kamina ñu upíshi ꞌati ꞌain, usakin ꞌai kamina anu xënibua ꞌaínbi tsóti nëtënu ꞌiti ꞌain.

²⁸ Nukën ꞌIbu Diosan ka upí ñuishi ꞌati kuëënia. Usa ꞌixun ka an ënkinma a rabikë aín unikama ënima; ꞌaínbi ka an ñu ꞌatimaira ꞌakë unikama këñuia këñukin ka atun bakë bëchikë rëbúnkiñuma ꞌinun ꞌimiti ꞌikën.

²⁹ An ñu upí ꞌakë unikama a ka Nukën ꞌIbun nuibakin, me anua xënibua ꞌaínbi tsóti ꞌinánti ꞌikën.

³⁰ Uni upí sinánñu ax ka sinaínrax banaia; usa ꞌain ka uni upí sinánñu ax asérabi ñu ꞌanux këmëima banaia.

³¹ Aín Diosan bana ꞌunánkë ax ka aín nuitunënbi sinánkë ꞌia, usakin ꞌai ka ¡uínsaranbi ñu ꞌatima ꞌati sinanima!

³² An ñu ꞌatima ꞌakë uni an ka an ñu upí ꞌakë uni a rëtëti sinánxun ꞌutunia;

³³ Nukën ꞌIbun ka usakian atun ꞌanun ëntima ꞌikën, ꞌianan ka usakin ka ꞌaxa kixuan ñuitanun ꞌamitima ꞌikën.

³⁴ Nukën ꞌIbumi katamëkë ꞌixun kamina, min aín bana kikësa okinshi ꞌaxunti ꞌain, usakin ꞌaia ka anua aín bana ꞌakë unikama ꞌitia ꞌakë anu mi ꞌimiti ꞌikën, ¡Anuxun kamina min bërúnbi an ꞌatima ñuishi ꞌati sinánkë unikama Nukën ꞌIbun masókin ꞌatima oia isti ꞌain!

³⁵ ꞌËn kana an ꞌatima ñuira ꞌakë unikamaxa, rabiakakë axa uni ꞌitsañu ꞌaish í pëi bunkuira iskë usai ꞌia isakën;

³⁶ ꞌaínbi ka bënëtishi nëtë́akëxa; usai ꞌia barikinbi kana anua ꞌikë anuabi mërama ꞌain.

³⁷ An ñu ꞌatima ꞌakëma ꞌimainun uisa ñu ꞌatima ꞌaímabi tsókë uni akamina isti ꞌain: Usa ꞌain ka a unin ñu ꞌakëx upí iskë ꞌiti ꞌikën.

³⁸ ꞌAínbi ka an bana kuaisamatankë unikamax masókin achirabi bërutanuma këñúkë ꞌiti ꞌikën; usakin ꞌakëx ka an ñu ꞌatima ꞌakë unikama aín tsótinëx amiribishi unitëkënima ꞌatima okë ꞌiti ꞌikën.

³⁹ Usa ꞌain ka uni upíkama ax Nukën ꞌIbun ꞌakinkë ꞌikën, usa ꞌikë ka anúan tëmërati nëtëkama ꞌikëbëtan ꞌakinia,

⁴⁰ Usa ꞌikë ka Nukën ꞌIbun ꞌakinkin ië́mia. Usakin ꞌanan ka an ñu ꞌatima ꞌakë unikaman ꞌatima oisa taniabi bërúaia; usakin ka an ꞌakinun barikëxun axa ami katamëkë unikama ꞌaia.