Salmos 34 - Kashibo-Kakataibo Biblia

Nukën ꞌIbun ka aín unikama nuibatia

¹ ꞌËn kana Nukën ꞌIbu kamabi nëtë, ënkima rabiti ꞌain.

² ꞌËx kana Nukën ꞌIbumi ꞌitsaira sinani kuëënin; ¡usa ꞌain ka unikama sinan mëninshi atux ꞌëbë a kuati kuëënti ꞌikën!

³ Usa ꞌain kananuna kamaxunbi an ꞌa ñukama sinánkin Diosan anë rabiti ꞌain.

⁴ Usa ꞌain. Ka ꞌën ꞌakinun ñukákëxun kuankin ꞌë ꞌakiankëxa, ꞌianan ka ꞌën rakuëkëkama nëtë́nun ꞌimiakëxa.

⁵ Uikaman kara a isia ax ka ꞌitsaira kuëëni, uínsaranbi rabinkëma ꞌiti ꞌikën.

⁶ ꞌËx ñuñuma unisa ꞌixunmabi kana Nukën ꞌIbun ꞌakinun kixun ñukákën, ñukákëxun kuakin ꞌakinkin ka ꞌëx tëmërai masánuitutia iskin ꞌë ꞌakiankëxa.

⁷ Nukën ꞌIbun ka aín ángel kushiira an rabikë unikama ꞌakianan ië́minun kixun xutia.

⁸ Usa ꞌain kamina Nukën ꞌIbu asérabi kara mitsu ꞌakinia kixun isnuxun tanti ꞌain. ¡Uix kara ami katamëtia a unix ka chuámarua tani ami katamëti kuëënia!

⁹ Nukën ꞌIbu kamina an kaískë ꞌixun mitsun an kuëënkësabi okin ꞌaxunti ꞌain. Usa ꞌain ka an rabikë unikamax ñuñuma ꞌitima ꞌikën.

¹⁰ Ñuñuira unikama ax ka ñuñuma ꞌi tikiti ꞌikën, usai ꞌi ka ñuñu ꞌaínbi ꞌitsaira pananti ꞌikën, ꞌaínbi ka axa Nukën ꞌIbumi katamëkë unikamax uínsaranbi upí ñuñumama ꞌitima ꞌikën.

¹¹ ꞌËn nuibakë ꞌën xukë́antu ësokin mitsu kamainun kamina kuati ꞌain: ꞌën kana uisakin kara Nukën ꞌIbu rabiti ꞌikë a mitsu ꞌunánmiti ꞌain.

¹² ¿ꞌItsa baritia ꞌimi kaina tsótisa tanin? ¿Uisai unin kuanun ꞌatimai banaima kaina upiti tsoti ꞌain?

¹³ Mix ꞌatimai banakë a kamina ënti ꞌain, usai ꞌi kamina min kuëbitan këmëi banatima ꞌain.

¹⁴ Ñu ꞌatima ꞌati a ënkin kamina ñu upí ꞌati ꞌain; usakin ꞌakin kamina ami ꞌakë ñu a ënkinma abi ꞌati ꞌain.

¹⁵ Nukën ꞌIbun ka aín bana ꞌakë unikama bërúaia, usa ꞌixun ka an ñukákëxun kuakin ꞌakinia.

¹⁶ ꞌAínbi ka Nukën ꞌIbun uni ꞌatima sinánñukama ënë menua sinántëkëntima okin nëtë́miti ꞌikën.

¹⁷ Nukën ꞌIbun ka uni upí sinánñu kaman ñukákëxun kuatia, kuakin ka masá nuitutiabi ꞌakinia.

¹⁸ Nukën ꞌIbu ax ka kamabi nëtën ꞌurama ꞌikën, usa ꞌixun ka uikaman kara ñu ꞌatima ꞌaibi ami sinanatia a ꞌakinti ꞌikën.

¹⁹ Uni upí sinánñu kama ax ka ꞌitsaira tëmëraia, usai ꞌiabi ka a ñukamanua Nukën ꞌIbun ꞌakian.

²⁰ Usakin Diosan aín xokama bërúankëx ka ain xo achúshibi tëkëtima ꞌikën.

²¹ An ꞌatima ñu ꞌati sinánxun ꞌakë unikama ax ka anunbi tëmërai ñuia; ꞌimainun ka uni upí sinánñu ax ꞌatimokin tëmëramikë ꞌiti ꞌikën.

²² ꞌAínbi ka Nukën ꞌIbun uikamax kara ꞌain bana ꞌai ami katamëtia akama ië́mia; ¡usa ꞌain ka a unikamax kastikankëma ꞌiti ꞌikën!