Salmos 33 - Kashibo-Kakataibo Biblia

Dios an ñu unio ꞌikë rabi kantati bana

¹ Mitsux Nukën ꞌIbun uni ꞌaish kamina, ¡kuëni Nukën ꞌIbumi kantati ꞌain! Uni upí sinan ñukama axa a rabi kantaia kuakë ax ka upí ꞌikën.

² Nukën ꞌIbu kamina arpa mëëkë aín banabi tankin asabi ka kati ꞌain ꞌanan kamina manë sharikati a mëëkin rabiti ꞌain,

³ ꞌai kamina anun kantakëma kanta ió anúnribi, ¡kantai munuma banai kuëënkanti ꞌain!

⁴ Nukën ꞌIbun bana ax ka asérabi upíira ꞌikën; usa ꞌixun ka anbia unio ñukama upí ꞌinun ñuia.

⁵ Nukën ꞌIbun ka aín bana kuati upiti tsókin upí ñu ꞌakë uni nuibatia; ¡usokin ka an kamabi menu ꞌikë unikama nuibatia!

⁶ Diosan ka aín banan ishi naíkamë ꞌëo uniokëxa, ꞌanan ka bari ꞌuxë ꞌispa akamaribi uniokëxa.

⁷ ꞌAnan ka parúmpapa baka anubia ꞌitinua timë́nun ꞌimiakëxa.

⁸ Nukën ꞌIbu ax ka kamabi menu ꞌikë unin rabikë ꞌiti ꞌikën; ¡ꞌianan ka kamabi unikama me kuainakëanu ꞌikë atúnribi rabikë ꞌiti ꞌikën!

⁹ An ka aín banakë anuinshia kamabi ñu uninun ꞌimiakëxa; ꞌianan ka ax usai ka ꞌiti ꞌikë kikëbë ñukamax usaibi ꞌiakëxa.

¹⁰ Nukën ꞌIbun ka atun sinánkësa okían a rabikëma unikaman ñu ꞌati kuëënkinma a ꞌatia sinánkë ñukama ꞌanun ꞌamima,

¹¹ ꞌaínbi ka Nukën ꞌIbun uisakin kara ꞌaisatania usakinbi ñu ꞌakin ax kikësabi oia ꞌinun ꞌimia.

¹² Diosan unikamax ka aín ꞌibua Dios ꞌain kuëënkë ꞌiti ꞌikën, atux ka Diosan kaískë ꞌikën.

¹³ Nukën ꞌIbun ka naínuxunbi iskin kamabi unikama ꞌunania;

¹⁴ ꞌanan ka uinu kara ax ꞌia anuxunbi ënë menu tsókë unikama ꞌunania;

¹⁵ an ka uni sinánñu ꞌinun uniokëxa usa ꞌixun ka uisakin sinánkin kara unin ñu ꞌaia akamabi ꞌunania.

¹⁶ Uinu ꞌikë ꞌapuxi ka aín suntáru ꞌitsaira ꞌaínbi ië́tima, ꞌianan ka aín këru unixi aín kushínbi ië́tima;

¹⁷ caballokaman ka uibi ië́mitima ꞌikën; atux kushiira ꞌixunbi ka uibi ië́mitima ꞌikën.

¹⁸ ꞌAínbi ka Nukën ꞌIbun axa ami katamëkëkama ꞌimainun asérabi a nuibakë unikama an ka nu nuibati ꞌikë kixun ꞌunania,

¹⁹ anun numi ꞌiti barin a piti ꞌaíma ꞌaínbi numin bamanun ëntima ꞌikën.

²⁰ Nukamax kananuna Nukën ꞌIbumi katamëtin; ¡an ka nu ꞌakianan bërúaia!

²¹ Nukamax kananuna nun nuitu chuámarua tani kuëënin; nun kananuna aín anëmi sinanin.

²² ¡Usa ꞌain kamina mix Nun ꞌIbu ꞌixun, nu nuibakin ꞌakinti ꞌain, nun ꞌakinun mi kakësabiokin kamina nu ꞌakinti ꞌain!