Salmos 32 - Kashibo-Kakataibo Biblia

Ñu ꞌatima ꞌakë chikínati bana

¹ Ui unin kara aín ꞌuchakama chikinakin ñu ꞌatima ꞌakë ënia ax ka kuëënia, usai ꞌikëbë ka asérabi aín ꞌuchakama ꞌaíma ꞌitánun mëníoxunkë ꞌia.

² Chuámarua ka uni ꞌatima ñu ꞌati sinánkëma ax ꞌikën, usa ꞌikë ka Nukën ꞌIbun a ꞌatimokin isima.

³ ꞌËn ꞌuchakama mi chikinaxunkëmapain ꞌaish kana, nëtë kamabi ini ꞌën nami bëtsia tani ꞌitsaira ꞌiankën,

⁴ usai ꞌikin kana ñu ꞌatima ꞌai ꞌuchakësa tankën nëtë ꞌimainun kamina imë́bi ꞌë ꞌatimokësa ꞌiakën. Usokëx kana ro uá barin urukin xarokëx núkai chushikë usaribiti ꞌiakën, usai ꞌi kana ꞌën nami ꞌaisama tani ꞌiakën.

⁵ ꞌAínbi kana ꞌën ꞌakë ñukama këñun ꞌën ꞌuchakama mimi unpukinmaira chikinaxuankën; ꞌën ꞌuchakama mi chikinaxunti sinánkin kana usakin ꞌakën, ꞌaia kamina mix ꞌËn ꞌIbu ꞌixun ꞌën ꞌakë ꞌuchakama ꞌë mëníoxuakën.

⁶ Usa ꞌain ka, anúan tëmërati ꞌikëbëtan an nuibakë unikaman mi ñukáti ꞌikën, tëmërakë an ka baka chaiira kushi ꞌëi mapurutankëxa, uinu kara sënënia anu sënë́nkësokinribi tëmëramiti ꞌikën, usa ꞌaínbi ka anbi atu uisabi otima ꞌikën.

⁷ Min kamina mimi katamëkëxun: ꞌaisama ñu inutiabi ꞌakianan ꞌë bërúain, usa ꞌain kana ꞌëmi ië́mikin ꞌakinkëx kuëëni munuma kantakin mi rabiti ꞌain.

⁸ Nukën ꞌIbu ka ësai kia: ꞌën kana mi usakinmi ñu ꞌati ꞌunánmiti ꞌain, ꞌianan kana ꞌën ꞌunánmikin bana ñuixunti ꞌain, kianan kamina uisa upí ñu karana ꞌati ꞌai ꞌë ismikatsi kian.

⁹ Mix kamina burro ꞌimainun caballosa ꞌitima ꞌain, an ka uisakin kara kaia abi kuatima, usa ꞌikë ka anun nikinkin nitsinakin buinati aín, kuëbínu mëxin tëkërëkaxun nikinkëx uisakin kara ꞌaia usaibi ꞌia, usa ꞌain ka bëtsiokin ꞌaxun ꞌuramamitisama ꞌikën.

¹⁰ Uni ꞌatimakama an ka ꞌaisamaira paë tani tëmërati kaínti ꞌikën, ꞌaínbi ka axa ami katamëkë unikama ꞌitsaira nuibanan, ꞌakinia.

¹¹ Nukën ꞌIbumi kamina mënin sinánñushi unikama ꞌimainun upí sinánñu unikama mitsux; ¡abë timëax kuëni sharákanti ꞌain!