Salmos 27 - Kashibo-Kakataibo Biblia

Nukën ꞌIbun ka barin pë́kakësa okin ꞌanan ꞌë ië́mia kikë bana

¹ Nukën ꞌIbun ka ꞌë ꞌakianan bërúaia, ¿uimi karana ꞌëx rakuë́ti ꞌain? Nukën ꞌIbuinshi ka ꞌën tsoti bërúaia, usa ꞌain ka ꞌëx ami rakuë́ti uni ꞌaíma ꞌikën.

² ꞌAtima sinánñu unikamabë ka axa ꞌëmi nishkë, akamax ꞌë ꞌatima onux ꞌëmi manánux timëtia; ꞌaínbi ka atuxi ꞌë ꞌakatsi kiax ꞌibi rakuë́ti abáti ꞌikën.

³ Suntárukaman ka ꞌë bëarabuinti ꞌikën, ꞌaínbi kana ꞌën nuitu kushiokin sinani rakuëtima ꞌain; ꞌë ꞌanux ꞌëmi ꞌikuatsinuxa mëníokakëbëbi kana chuámashirua ꞌiti ꞌain.

⁴ Achúshi ñushi kana Nukën ꞌIbu ñukan, usa ꞌain kana achúshi ñu ashi kuëënin: ax ka anuxun Nukën ꞌIbu rabiti xubunu ꞌëx kamabi nëtë anun tsókë a nëtëkama ꞌikën, a xubunuxun kana rabikin a ñukáti ꞌain. Ñukákin kana an unio ñukama upí iskin ashi rabiti ꞌain.

⁵ Uínsaran kara anun tëmërati nëtë ꞌia, anun ka Nukën ꞌIbun anuxun rabiti xubunuabi ꞌë bërúanti ꞌikën; usakin ꞌakëx kana a meu ꞌaish an tupëonkëx asábi ꞌiti ꞌain. ¡Usakin ꞌakëx kana mapara kini achúshinu unë́kësa ꞌiti ꞌain!

⁶ Usai ꞌikin axa ꞌëmi nishkë unikama abë ꞌakanankin ꞌatankëxun kana; mi ñuina xaroxunti ꞌain, xaroxunkin kana anuxun mi rabiti xubu anuax kuëëni munuma mimi kantakin Dios ꞌikë mi rabiti ꞌain.

⁷ Kushin banakin kakëxun kamina mix Dios ꞌixun ꞌën bana kuati ꞌain. Kuakin ꞌë nuibakin kamina, ¡minribi ꞌë kati ꞌain!

⁸ ꞌËn nuitunën sinánkin: Kana Nukën ꞌIbu ñukáti ꞌain. ꞌImainun kana ꞌën Nukën ꞌIbu ꞌë ꞌakinun barin.

⁹ ¡Usa ꞌain kamina ꞌëmi unë́kësa ꞌitima ꞌain! ¡ꞌËmi nishkin kamina ꞌë timakësa otima ꞌain! Min kamina ꞌëshira ënkinma ꞌë ꞌakinti ꞌain, mix kamina ꞌën ꞌIbu ꞌaish an ꞌë ië́mikë a ꞌain.

¹⁰ ꞌËn papabëtan ꞌën titan rakaniabi kamina, mix Nukën ꞌIbu ꞌixun ënkinma ꞌë isti ꞌain.

¹¹ ꞌËn ꞌIbu, mimishi katamëmainun kamina uisaira karana ꞌiti ꞌai ꞌë ꞌunánmiti ꞌain; ꞌunámianan kamina upiokinshi ñu ꞌanun ꞌë ꞌamiti ꞌain axa ꞌëmi nishkë unikama ka anu ꞌikë usa ꞌain;

¹² usa ꞌain kamina an kuëënkësa okían ꞌë ꞌakanun ꞌamitima ꞌain, atux ka ꞌëmi ꞌikuaianxa usa ꞌain ka atun këmëi banakin bënë́kinshi ñu ꞌaisa tania.

¹³ ꞌAínbi kana ꞌën asérabi kamina min ñu ꞌakën kixun ꞌunanin usa ꞌixun kana asérabi ka Diosan ꞌë nuibakin ñu ꞌaxa kixun isti ꞌain, anun ꞌëx tsókë nëtëkama anun.

¹⁴ ¡Nukën ꞌIbumishi ka uni katamëti ꞌikën! ¡Katamëkin kamina kushikin ꞌatimakin sinántima ꞌain! ¡ꞌImainun kamina Nukën ꞌIbumishi katamëkanti ꞌain!