Salmos 24 - Kashibo-Kakataibo Biblia

Nukën ꞌIbu anuxun rabiti xubunu timë́xun rabiti ñuikë bana

¹ Nukën ꞌIbunan ka kamabi me kuainakëa ax ꞌikën, usa ꞌain ka kamabi ñu anu ꞌikë a ꞌimainun, kamabi uni anu tsotia.

² Nukën ꞌIbun ka me uniokin parúmpapakamanu an tuinti ꞌanan ënë me uniokin bakakamanu ꞌanan ꞌumpaxnuribi ꞌakëxa.

³ ¿Uix kara anua Diosan bashi kakë upíira anu kuanti ꞌik? ¿Uix kara anua ꞌikë ꞌain xubu upíira anu Dios rabi kuanti ꞌik?

⁴ Anu kuanti uni ax ka upí sinánñu ꞌixun ñu ꞌatima ꞌati sinani ꞌuchaima ꞌianan; Dios asérabi ain anë ñui kikëma ꞌiti ꞌikën.

⁵ Usa unikama ka Diosan ië́mianan, upíokin sinánxunkin ꞌakianan usakian ñu upíokin ꞌati ꞌunamiti ꞌikën.

⁶ Usai ka Dios an barikë unikama ax ꞌiti ꞌikën, usai ka Israelkaman Dios ꞌakinun an ñukákë unikama atux ꞌiti ꞌikën.

⁷ ¡Ax irapain ꞌia Jerusalénnu ꞌikë xëputi chaiirakama ka xëókiti ꞌikën! ¡Xëókia anun atsían xëkuë ax mërakëbë ka anun ꞌapuira ax atsínti ꞌikën, ax ka kamabi unin ꞌapu ꞌiti ꞌikën!

⁸ ¿Ui kara ꞌapuira ꞌianan kushiira ënëx ꞌik? ¡Ax ka Nukën ꞌIbu kushiira ꞌianan rakuëma ꞌikën! ¡Ax ka Nukën ꞌIbu ꞌaish rakuëtimaishi ꞌakanania!

⁹ ¡Ax irapaia ꞌia Jerusalénnu ꞌikë xëputi chaiirakama ka xëókiti ꞌikën! Xëókia anun atsían xëputi mërakëbë ka ꞌapuira ax atsínti ꞌikën, ax ka kamabi unin ꞌapu ꞌiti ꞌikën.

¹⁰ ¿Ui kara ꞌapuira ꞌianan kushiira ënëx ꞌik? ¡Ax ka Dios kamabi kushiñu a ꞌikën! ¡Ax ka Dios ꞌapuira a ꞌikën!