Salmos 23 - Kashibo-Kakataibo Biblia

Diosan ka ꞌën ꞌIbu ꞌixun an ñuina ꞌarakakë bërúankë unisa ꞌixun ꞌë bërúaia kikë bana

¹ Diosan ka an ñuina ꞌarakakë unin aín ñuina bërúankësa; usaribi okin ꞌë bërúaia, usa ꞌixun ka uisa ñu kara inutiabi ꞌë ꞌakinia,

² an ka unin basi paxa upíira pimitankëxun aín ñuinakama tantimikësa usaribi okin ka Diosan ꞌë ꞌimia, ꞌimianan ka ꞌumpax bëchuni pakaxkikëma a xëakin ꞌën shima tërënun ꞌë ꞌimia,

³ ꞌianan ka amiribishi ami kushitëkënun ꞌë ꞌimiaxa, ꞌimianan ka bai upitan nikësa ꞌinun uisa ñu kara upí ꞌikë ashi ꞌanun ꞌë ꞌunánmia, ax ka usakin ñu ꞌaxunkin aín anë rabiti kuëënia.

⁴ Anun nisama anun kuaníbi kana añu ñubi inútimi rakuë́tima ꞌain, Dios mix kamina ꞌëbë kamabi nëtën ꞌain; ꞌimainun kamina ñu upíshi ꞌanun ꞌë ꞌimiti ꞌain.

⁵ Axa ꞌëmi nishkë unikaman ꞌatimokin isiabi kamina; atun ismainunbi anu pinux timë́ti ꞌaxunkin ꞌitsaira kuëënun ꞌë ꞌimin, usakin ꞌanan kamina ꞌën maxkánu ro tutukakin anun ꞌë machabonun ꞌamian, usokin ꞌanan kamina ꞌën ami xëati aribi buákakin ꞌaruan.

⁶ Min asérabi nuibanan ꞌë ꞌakinkëx kana nëtë itsi nëtë itsi inúmi mibë tsóti ꞌain ꞌën ꞌIbu Dios, mibë kana xënibua ꞌaínbi nëtë́timoi min nëtënu ꞌiti ꞌain.