Salmos 2 - Kashibo-Kakataibo Biblia

Diosan kaískë uni ꞌapu ꞌiti ñuikë bana

¹ ¿Uisakatsi kara uni ꞌuchañukama tsuákiruax Diosmi banain? ¿Usai ꞌikin kara usokin ꞌanuxumabi uisakin ꞌati kara ñu ꞌikë kixun sinánkanin?

² Ënë menu ꞌikë ꞌapukama an bana mëníokën ka atúnbi timë́xun uisakin kara, ꞌain ꞌIbukëñun an kaískë ꞌapu ꞌati ꞌikë kixun sinánkania.

³ Sinani ka atuxi munuma banai kikania: ¡Usakin ꞌakin kananuna atun kushian an kuëënkësokin nu ꞌanun ꞌamitima ꞌain! ¡Usai ꞌikananuna atun ubiokëma bukuti ꞌain!

⁴ Usai atux ꞌikëbëbi ka Dios naínu ꞌapu ꞌikë, ax atumi kuaiti ꞌikën;

⁵ usai ꞌitankëx nishkin ka atu ratuti ꞌikën; kushiira atumi nishkin ka ësokin kati ꞌikën:

⁶ ꞌën kana axa ꞌapu ꞌiti uni anëan, usa ꞌain ka aín bashi upí Sión kakë anu ꞌapu ꞌiti ꞌikën.

⁷ ꞌËx kana uisakin ꞌati kara Diosan sinánxa a ñui kiti ꞌain, an ka ësakin ꞌë kaxa: Mix kamina ꞌën bakë bëchikë ꞌain; usa ꞌaish kamina bërí ꞌën bakë bëchikëira ꞌiti ꞌain.

⁸ ꞌË kamina bëtsi bëtsi mekama minan ꞌinun ñukáti ꞌain, ñukákëxun kana uinu kara me kuainakëtia abi ꞌën mi ꞌinánti ꞌain.

⁹ Usa ꞌain kamina min kushin kamabi ꞌapu ꞌatimakama; ¡kamina me ꞌakë kënti tukapakësa okinshi ꞌati ꞌain kixun ka ꞌë Diosan kaxa kiax ka ꞌapu kiaxa!

¹⁰ ꞌApukama ꞌimainun an bana mëníokë unikama ënë menu ꞌikë mitsun kamina ënë bana kuati ꞌain, ¡Kuakin kamina upíokin ënë bana sinánkanti ꞌain!

¹¹ Dios rabikin kamina kuëëni shaíkikin rabikanti ꞌain; usakin ꞌai ka ami rakuë́kanti ꞌikën,

¹² usa ꞌain kamina Dios ax nishkima mitsu, ꞌaisama okin tëmëramia usa ꞌain rabikanti ꞌain. ¡Diosan ka axa ami katamëkë unikama chuámarua tania ami sinani kuëënun ꞌimia ësai ka Diosan kaískë unikama kiakëxa!