Salmos 19 - Kashibo-Kakataibo Biblia

Diosan unio ñukama ꞌimainun ꞌain bana ñui kikë bana

¹ Naíkamë ꞌëo an ka Dios ax ka chaiira ꞌikë kixun unin ꞌakësa okin ñuia; ꞌimainun ka an unio naíkamë ꞌëo kuman batsisa anribi a ñukama ñuikin nu ꞌunánmia.

² Achúshi nëtë an ka bëtsi nëtë aribi unin ꞌakësa ꞌinun kaia; ꞌimainun ka imë́ anribi bëtsi imë́ ꞌiti aribi unin ꞌakësa ꞌinun kaia.

³ Usai ꞌia ka uínbi aín bana chanioima ꞌianan ka ax kia uisa banabi kuatima ꞌaínbi ka nu ꞌunánmia,

⁴ ꞌaínbi ka kamabi menu ꞌikë unikaman aín bana ꞌunania, usa ꞌaishi ka uinu kara me kuainakëakëxa anuxunbi aín anë kuakë ꞌikën. Anu ka Diosan achúshi ñu anua bari ꞌiti ꞌakëxa,

⁵ anuax ka bari achúshi uni ꞌain xubunuax mëratiñu ꞌaish kuëëni ꞌikësai ꞌianan, achúshi uni abáti ꞌunan axa kuëëni abákësa kiani kuania.

⁶ Usa ꞌain ka bari naí meukuax urui kuainakëkin amoribi pë́kaia, Usai ꞌikian pë́kakëx ka uínbi barin xana okin pë́kakëmama ꞌima.

⁷ Diosan banax ka upíira ꞌikën, an ka nu upiti tsónun ꞌimia an ꞌakë ñukama ax ka upí ꞌikën. Kamabi Dios kikë bana ax ka asérabi ꞌikën, an ka uni mënin sinánñushi usa ꞌikëmabi sinánñuira ꞌinun ꞌimia.

⁸ Dios kikë banakama ax ka asérabi ꞌikën, usa ꞌixun ka an ñu upí ꞌakë unikama ꞌain nuitu kuëëmia. Ax kikësabi oi ꞌiti Diosan bana an ka bëtsi banakama këñun mëskukëma ꞌikën, usa ꞌixun ka unin sinan upí ꞌimia.

⁹ Diosmi katamëti ax ka upíira ꞌikën, usa ꞌain ka uínsaranbi ax këñutima. Aín bana kikësoi tsóti ax ka asérabi ꞌikën, usa ꞌain ka axa ami katamëkë uni ax kikësai ꞌi tsóti ëntima ꞌikën.

¹⁰ ¡Usa ꞌaish ka kuri upíira kupíkë usamaira ꞌikën! ¡ꞌianan ka buna rëpa bataira ꞌain bánu ꞌikë usaribi ꞌixun nu ꞌunánmia!

¹¹ ꞌIanan ka a banakamaxribi an ꞌë ꞌunánmikë ꞌikën, usa ꞌain kana ñu ꞌaisama ꞌaisa tankinbi, min uni ꞌixun ax kikësokinbi ꞌati ꞌain.

¹² ¿Uin kara abi ñu ꞌatima ꞌatankëxun ꞌënbi kana usakin ꞌa kixun sinánti ꞌik? ¡Usa ꞌain kamina mix Dios ꞌixun ꞌën ꞌakë ꞌuchakama ꞌë mëníoxunti ꞌain!

¹³ ꞌIanan kamina min uni ꞌikë ꞌëx rabiakakë a ꞌë mëníoxunti ꞌain; usa ꞌain kamina rabiakakë anma usai ꞌinun ꞌimia ꞌë ꞌakinti ꞌain. Mëníoxunkin ꞌakinia ka achushi uni ꞌikë uínbi ꞌë ꞌucha otima ꞌikën, ꞌianan kana mix kikësoi ꞌisama tani chaiira ꞌuchakë anuax ië́kë ꞌiti ꞌain.

¹⁴ Min iskëx ka ꞌëx kikë banakama ꞌianan, ꞌën sinánkë ñukama asábi ꞌiti ꞌikën, mix kamina an ꞌë bërúankë ꞌianan an ꞌë ië́mikë a ꞌain.