Salmos 16 - Kashibo-Kakataibo Biblia

Diosan banasa upíira ñu ka ꞌaíma ꞌikën

¹ ¡ꞌËn ꞌIbu Dios, ꞌë kamina bërúanti ꞌain, minmi ꞌakinti sinánkin kana ꞌën mi barin!

² ꞌËn kana mi kan: Mix kamina ꞌën Dios ꞌain usa ꞌixun kamina min ꞌë upí ꞌimin; usa ꞌain ka min ꞌakinkësaribi okin an ꞌë ꞌakinti bëtsi ñu ka ꞌaíma ꞌikën.

³ Ënë menuxun rabikankë dios ax isa kushiira ꞌikë, kiax ka aín unikamax kia,

⁴ ꞌaínbi ka uikaman kara a dios rabia akamax paëtani tëmërati ꞌikën, usai ꞌikin atun a rabimainun kana. ¡ꞌËn uínsaranbi atun ꞌakësokin ñuina xaroxuntima ꞌain! ¡ꞌËn kana uínsaranbi aín anë ñui banatima ꞌain!

⁵ Mix kamina ꞌën Dios an kamabi ñu ꞌë ꞌinánkë a ꞌain; min kamina upiti tsónun ꞌë ꞌimian.

⁶ Upí me akana a biti sinánkë ꞌixunmabi ꞌën bian; ¡asabika usa ꞌaish ka ꞌën bikë me ax bëtsi unikamanan ꞌikëbi mi ꞌë ꞌinánkë ꞌikën!

⁷ ꞌËn kana min banan ꞌësëkin mi ꞌë ꞌunamikë a kupí mi rabiti ꞌain; usa ꞌain ka min bana ꞌunánkë ꞌanbi ë ꞌimë́bi upí ꞌimikin bërúaia,

⁸ ꞌëx kana uínsaranbi ami manutima Diosmi sinanin; usa ꞌain kana axa ꞌë rapasu ꞌikëbëtan, uisa ñu kara ꞌikëbëbi ami katamëti tsóti ëniman.

⁹ Usa ꞌain kana ꞌitsaira ꞌën nuitu ukëmëuishi ami sinani kuëëinra kuëënin. Usa ꞌaish kana ꞌën nami chuámarua tani kuëënti ꞌain,

¹⁰ min kamina anu uni ñuia maínkë anu ꞌikëbi ꞌë ëntima ꞌain, ¡usa ꞌain kamina an mi ñu ꞌaxunkë uni uinubi ëntima ꞌain!

¹¹ Usa ꞌixun kamina uisai karana tsóti ꞌai kixun ꞌë ꞌunánmiti ꞌain. Anu mix ꞌikë anu ka anuax ꞌitsaira kuëëntisabi ꞌikën; anuax ka min unikama ꞌitsaira kuëënti ꞌikën.