Salmos 148 - Kashibo-Kakataibo Biblia

Nukën ꞌIbu an unio ꞌixun rabiti bana

¹ ¡Usa ꞌain ka ësokin Dios rabikanti ꞌikën! ¡Naínu ꞌikë Nukën ꞌIbu Dios rabinun ka ꞌakan! ¡Manámi ꞌikë Nukën ꞌIbu Dios rabinun ka ꞌakan!

² ¡Aín ángelkama atúnribi ka kamaxunbi Dios rabiti ꞌikën! ¡Aín suntárukama naínu ꞌikë atúnribi, ka Dios rabiti ꞌikën!

³ ¡Bari ꞌimainun, ꞌuxënribi ka rabiti ꞌikën! ¡An mananmixubi pëkakë, akamanribi ka rabiti ꞌikën!

⁴ ¡Naíkamë ꞌëo manami ꞌikë anribi ꞌamainun ka a manami ꞌikë ꞌumpax a kamanribi, naínuxunbi rabiti ꞌikën!

⁵ Nukën ꞌIbu ax ka rabikë ꞌiti ꞌikën, axa usai ka ꞌiti ꞌikë kikëbëshi ka kamabi ñu ax kikësabi oi uniakëxa;

⁶ an ka kamabi ñu nëtë xënibua ꞌaínbia usabi ꞌinun, ꞌimianan ax kikësabi oí ꞌiti banakama aribi uínbia bëtsiokin ꞌatëkëntima okin ꞌakëxa.

⁷ ¡Nukën ꞌIbu Dios ka menuxun ꞌamainun, parúmpapanu ꞌikë ñuinakan ꞌëo, ꞌimainun parúmpapa nëminu ꞌikë akamanribi rabiti ꞌikën!

⁸ ¡ꞌAmainun ka kaná mëríkë, matsi bëruñu, ꞌimainun matsi uxu kuainkë ꞌianan kuénkuru akamanribi ꞌati ꞌikën! ¡ꞌAmainun ka suñúan bënamë kuatsinkë anribi, ax kikësabiokin a rabiti ꞌikën!

⁹ ꞌAmainun ka bashikama ꞌianan me matákama ꞌimainun. Kamabi kunxankama ꞌianan axa tuákë ikama anribi rabiti ꞌikën

¹⁰ ¡ꞌImainun ñuina ꞌarakakë, ñuina ꞌarakakëma a kamanribi ꞌati ꞌikën! ¡ꞌIanan ka pëchiu ñuinakama ꞌimainun pukun niríkë a kamanbi rabiti ꞌikën!

¹¹ ¡ꞌAmainun ka kamabi menu ꞌikë ꞌapukama ꞌimainun bëtsi bëtsi ëmanu ꞌikë unikama! ¡ꞌAmainunbi ka ꞌapukama ꞌimainun aín kushibu akamanribi rabiti ꞌikën!

¹² ¡ꞌImainun ka xanukaman, ꞌamainun uni bënábu xanu chipashbu ꞌimainun uni kaniakëkë akamanribi rabiti ꞌikën!

¹³ ¡Kamaxunbi ka Nukën ꞌIbu Diosan anë rabiti ꞌikën, an ka aín anë ñuikin usakin rabiti kuëënia! ¡Ax ka chaiira ꞌaish naíkamë ꞌëo ꞌimainun mekama manámi ꞌikën!

¹⁴ ¡Diosan ka aín unikama kushioia! ¡Usa ꞌain ka nux aín uni ꞌixun rabimainun aín uni a ꞌurama ꞌikë akamanribi rabiti ꞌikën! ¡Usa ꞌain kananuna ashi ësokin rabiti ꞌain!