Salmos 145 - Kashibo-Kakataibo Biblia

Kamabi unin ka Nukën ꞌIbu rabiti ꞌikë kikë bana

¹ Mixmi chaiira Dios ꞌaish ꞌapuira ꞌikë; kana min anë sinánkin xënibua ꞌaínbi mi rabiti ꞌain.

² Kamabi nëtën kana upíokin sinánxunkin; xënibua ꞌaínbi min anë rabiti ꞌain.

³ Nun ꞌIbu Dios an ka chaiira ꞌixun nukaman rabiti kuëënia; usa ꞌain ka an ꞌakë ñukamax uisaira kara kixun nun ꞌunántisamaira ꞌikën.

⁴ Usa ꞌikë kananuna aín papa ꞌixun nun bakë bëchikëkama min ꞌa ñukama ñuixunkin, min kamina kushiira ꞌixun kamabi ñu ꞌakë kixun atúnribi ꞌunánun ñuixunti ꞌain.

⁵ Usakin ñuixunkëxa ax ka ꞌapu kushiira ꞌikë, kimainun kana ꞌëx min kamina ñu chaiirabu unin iskëma ñukama ꞌakën kiax kiti ꞌain.

⁶ Kikëbëa unikamax min kushínbi kamina anun rakuë́ti ñukama ꞌakën a ñui kimainun kana, ꞌëx min kamina ñu chaiirabu ꞌakën kiax kiti ꞌain.

⁷ Usakin ñuixunkëxun ka mixmi nuibanankë ax ka chaiira ꞌikë ki, munuma banakin ax ka upí ꞌikë kikin mi rabikanti ꞌikën.

⁸ Nukën ꞌIbu Dios an ka nuibanairakë ꞌixun, bënëtishi ami nishkin ꞌatima okinma uni nuibatia.

⁹ Nukën ꞌIbu Dios ax ka kamabi unibë upí ꞌikën, usa ꞌixun ka an unio ñukama upíokin nuibakin bërúaia.

¹⁰ ¡Min unio ñukama an ka aín Dios ꞌikë mi rabiti ꞌikën! ¡ꞌAmainun ka min unikaman asérabi min bana kikësabiokin ꞌakin upíokin sinánkin mi rabiti ꞌikën!

¹¹ ¡ꞌIanan ka min nëtë upíira a ñuiribi kiti ꞌikën! ¡ꞌImainun ka min kushinbimi ꞌa akama ñuiribi kiti ꞌikën!

¹² ¡ꞌIanan ka unikamanribi min kushinmi ñu ꞌa a kamaribi ꞌunánmiti ꞌikën. Usakin ꞌanan ka mix anu ꞌikë ax ka upíira nëtë ꞌianan chaiira ꞌikë kixun unikama ñuixunti ꞌikën!

¹³ Mix ꞌapu ꞌia ax ka xënibua ꞌainbi mix ꞌapu ꞌiti ꞌikën, usa ꞌain ka kamabi unin rëbúnki ax mix kuëënkësabi oi ꞌiti ꞌikën.

¹⁴ ꞌËn ꞌIbu Dios min kamina axa tëmërakë unikama, ꞌimainun axa atsankëkama aribi kushinun ꞌimin.

¹⁵ Kamabi unin ka anun ꞌinánti nëtë ꞌikëbëtan min ꞌinánkëxun piti binuxun kainia.

¹⁶ Usa ꞌain kamina ꞌinántisabi tankin a bitsi kuëënun axa ënë menu tsókë unikama ꞌinánan nuribi ꞌinánkin kamabi ñuina aín piti ꞌinánin.

¹⁷ Nukën ꞌIbu ax ka uisakin ñu ꞌakatsi kara kia, usakinbi kamabi ñu upíokin ꞌaia.

¹⁸ Nukën ꞌIbu ax ka an rabikë unikama ꞌurama ꞌianan, an asérabi këmëkinma rabikë akamanu ꞌia.

¹⁹ An ka an rabikë unikaman kuëënkësokin ꞌaxuanan; uínsaran kara ꞌakinun ñukatia anun ka ñukákëxun kuankin, ꞌakianan ië́mia.

²⁰ Nukën ꞌIbun ka an nuibakë unikama nuibakin bëruaia, ꞌaínbi ka an ñu ꞌatima ꞌakë unikama ꞌatima okin këñuia.

²¹ ¡ꞌËn kana ꞌën kuëbitanbi Nukën ꞌIbu rabiti ꞌain! ¡ꞌAmainun ka kamabi unínribi upíokin sinánxunkin aín anë upíira a rabiti ꞌikën, bërí ꞌananbi ka xënibua ꞌaínbi rabiti ꞌikën!