Salmos 14 - Kashibo-Kakataibo Biblia

Diosan bana kuaisama tankë ꞌatima sinánñu unikama ñuikë bana

¹ An ꞌunántisa ꞌikëbi ñu ꞌunánkëma unikaman ka Dios isa ꞌaíma ꞌikë kixun sinania: kamaxunbi ka ñu ꞌatimashi ꞌaia; usakin ꞌakin ka ñu ꞌatimaira ꞌakania; ¡an upí ñu ꞌakë uinu ꞌikë uni achúshirabi ka ꞌaíma ꞌikën!

² Diosan ka naíkamë ꞌëonuxunbi unikama isia, kara axa ami sinánkë uni ꞌianan an ꞌakinun barikë, uni sinánñuira ꞌikë kixun ka Diosan istisa tania.

³ ꞌAínbi ka kamaxunbi ꞌatima okinshi sinania; usa ꞌixun ka bëtsin ꞌakësaribi okin ꞌatima ñuira ꞌakania. ¡An ñu upí ꞌakë uni ka achúshirabi ꞌaíma ꞌikën! ¡Achúshira unixi ka an ñu upí ꞌakë ꞌaimaira ꞌikën!

⁴ An ñu ꞌatima ꞌatishi sinánkë unikaman ka bana kuatima, usa ꞌixun ka atun pán unin pikësa usaribi okin ꞌën unikama këmëkin ꞌaia, usakin ka an Dios rabikëma unikaman ꞌaia.

⁵ Usakin ꞌaínbi ka atux rakuëtan bamai bërëkinuxun ꞌaia, usai ꞌimainun ka Diosan, an kakësabiokin ꞌakë unikama ꞌakinia.

⁶ Usa ꞌain ka uni upí sinánñukama an kuëënkin ñu ꞌakëbë ami kuaia, usai ꞌikian aín kuëënkësa okin ꞌakania ka Diosan atu ꞌakinia.

⁷ ¡Uisati kara Diosan ꞌain bashi Sión kakë anuxunbi an Israel unikama ꞌakinkin ië́minun xutima ꞌik! Uínsaran kara Diosan an kaískë unikama aín menubi utëkënun ꞌimia anun ka, Jacobnën rëbúnkikamax kamabi Israel ëmakamanuax kuëënti ꞌikën.