Salmos 139 - Kashibo-Kakataibo Biblia

Diosan ka kamabi ñu ꞌunania kikë bana

¹ Nukën ꞌIbu min kamina uisa karana, ꞌëx ꞌai kixun upíokin ꞌunanin;

² usa ꞌixun kamina kamabi ꞌën ꞌakë ñukama ꞌunanin; ꞌianan kamina ꞌuranxubi uisakin karana ꞌën sinanin abi ꞌunanin.

³ Min kamina kamabi ꞌën ꞌakë ñukama ꞌunánkin añu ꞌanan karana añu ꞌaima kixun, ¡kamabi ꞌën ꞌakë ñukama ꞌunanin!

⁴ ꞌËn usai kiti bana ꞌunánkë ꞌaímabi kamina, mix Dios ꞌixun uisa banan karana kiti ꞌai abi ꞌunanin.

⁵ Min kamina nëbë́tsiorakin ꞌë bëararan; usa ꞌixun kamina min ꞌë isin.

⁶ Usa ꞌain ka min ꞌakë ñukama ax ꞌën ꞌunántibëtan sënë́nmaira ꞌikën; ¡usa ꞌikë kana ax ꞌëbëtan sënë́maira ꞌikë ꞌunánkasmain!

⁷ ¿Uinu karana ꞌëx min bëru ñunshin ëbiani kuanti ꞌain? ¡Kana uinubi kuantima ꞌain! ¿Uinu karana mi ëbiani ꞌëx abati kuanti ꞌain? ¡Uinubi kana kuantima ꞌain!

⁸ ꞌËx naíkamë ꞌëo, manámi kuaruxunbi kana anuabi mi ꞌën mërati ꞌain; ꞌimainun kana me ꞌukëmëuira kuabuxunbi, anuaribi mi mërati ꞌain;

⁹ ꞌëx pëchiu ꞌaish nuankiani kuani ami bari urukë ami kuananbi, ami bari kuabúkë parúmpapa ꞌikë au tsóti kuankëbi kamina,

¹⁰ ꞌë ënkinma isti ꞌain; ¡usa ꞌixun kamina ꞌë ꞌakinkin bërúanti ꞌain!

¹¹ ꞌËn kana bëánkibukë ami unë́ti sinánti ꞌain, ꞌianan kana nëtë xabá axa ꞌëx ami unë́nun bëánkibunun kixun sinánti ꞌain,

¹² usa ꞌaínbi ka bëánkibukë anbi min istisama okin ꞌë unëtima ꞌikën, ꞌianan ka bëánkibukë ax nëtësaira ꞌinun pë́kikë ꞌiti ꞌikën. ¡Min iskëx ka nëtë xabá usaribi bëánkikë ax ꞌikën!

¹³ Min kamina kamabi ꞌën namikama ꞌakën; min kamina ꞌën titan puku ꞌukë mëu uninun ꞌë ꞌimiakën.

¹⁴ Usa ꞌixun kana unin iskëma ñu ꞌakinmi ꞌë unio ꞌixun mi rabin, ꞌianan kana min ꞌakë ñukamaxa upí ꞌain mi asábi ka kain. ¡Usa ꞌain kana usakin mi ꞌa ꞌikë asérabi ka ax ꞌikë kixun ꞌunanin!

¹⁵ Min kamina ꞌunanima ꞌikima ꞌëx karana uisai kani a isakën, unëax ꞌikësa ꞌinun ꞌën, titan puku ꞌukëmëúküax ꞌëx kanikë ax ka me ꞌukëmëúküax ꞌëx kanikësa ꞌiakëxa.

¹⁶ Min kamina min bërúnbi uisai karana ꞌëx uni ꞌinux ꞌirui abi isakën; usa ꞌain ka kamabi ax min kirikanu kuënëokë ꞌiakëxa. Min kamina achúshi nëtërabi ꞌëx uni tankëx tsókë ꞌaímabi, uisai karana ꞌëx tsóti ꞌai kixun abi mëníokë ꞌiakën.

¹⁷ ꞌËn ꞌIbu Dios, min sinánkë ax ka ꞌën sinánkëbëtan sënë́maira ꞌikën; ¡usa ꞌaish ka ꞌën ñuitisama tëiratë ꞌiti ꞌikën!

¹⁸ ꞌËn ñuitisatankëxbi ka parúmpapa masi bëru iskë usamaira a ñukama ꞌiti ꞌikën; usa ꞌikë tupunkin ñuikin këñuamaxi ꞌuxax bësukinbi kana mibëbia ꞌikë oti ꞌain.

¹⁹ ꞌËn ꞌIbu Dios, an ꞌatima ñu ꞌakë unikama a këñunun ꞌimianan kamina, an uni ꞌakë unikama aribi ꞌë ꞌura ꞌinun ꞌimiti ꞌain,

²⁰ ꞌimianan kamina axa mi ñui ꞌatimati banakëkama a ꞌanan. Axa min anë ñui ꞌatimati banakë unikamaribi ꞌati ꞌain.

²¹ ꞌËn ꞌIbu, ¿ꞌëx kara ax mimi nishkë unikama ami nishin, ꞌianan karana axa mi ñui ꞌatimati banakë amiribi nishima ꞌiti ꞌain?

²² ¡ꞌËn kana atu asérabi istisama tanin! ¡Usa ꞌain kana ꞌëx a unikamami nishkësa ꞌain!

²³ Mix Dios ꞌixun kamina, ꞌën nuitu ꞌunánkin ꞌë tanti ꞌain; ꞌianan kamina uisakara ꞌën sinánkama ꞌikë kixun ꞌunánti ꞌain;

²⁴ ꞌunánan kamina ꞌën karana ꞌatima ñu ꞌai akamabi, ꞌunánkin uisai karana ꞌëx ñu upí ꞌai xënibuti tsóti ꞌai kixun ꞌë ꞌunánmiti ꞌain.