Salmos 130 - Kashibo-Kakataibo Biblia

Nukën ꞌIbun ka ami katamëkëxun nu ꞌakian ꞌikë kikë bana

¹ ꞌËn ꞌIbu Dios ꞌën ꞌakë ñukaman ꞌimikëx kini ꞌukëmëu nipakëkësa, ꞌixunbi kana mi ñukákin ënkëma ꞌain:

² ¡ꞌËn ꞌIbu Dios ꞌëx mi ñukáti munuma kia kamina kuati ꞌain! ¡Min kamina ꞌën ñukákëxun min pabitan kuati ꞌain!

³ ꞌËn ꞌIbu Dios, minmi unin ꞌucha ꞌunánkëbë kara, ¿uix mi rapasu kuanti ꞌik?

⁴ ꞌAínbi kamina min nux ꞌuchakëkama nu mëníoxunin, usa ꞌixun kananuna nun mi rabiti kuëënin.

⁵ ꞌËn bëru ñunshin bëtanbi kana Dios kainin, usakin ꞌai kana ain bana kuati ami katamëtin.

⁶ ꞌËn kana Nukën ꞌIbu Dios kainin, an ñantan bërúankë unían pëkaratamainun ꞌakësamaira okin. An bërúankë unikaman pëkaratia kainkë usaribiokin,

⁷ usaribi okin kamina Israel unikama mitsun kaínti ꞌain, an ka asérabi nuibanankë ꞌixun nux uisaibi ꞌiti kuëënima.

⁸ ¡An ka Israel unikama nuibakin, atun ꞌuchakëkama tërënxunti ꞌikën!