Salmos 126 - Kashibo-Kakataibo Biblia

Diosan ka masánuituti nitë́xëtia aín unikama kuëënun ꞌimiti ꞌikë kikë bana

¹ Nukën ꞌIbun nu amiribishi Jerusalénnu bëtëkënkë ax ka namati ꞌikësa nun sinánkëx ꞌiakëxa.

² Usa ꞌain kananuna ꞌitsaira kuëëni munuma kuai kuëëankën; usai ꞌia isi ka bëtsi menu ꞌikë unikama kánani kikankëxa: ¡Nukën ꞌIbun ka ñu chaiirabu atu ꞌaxuanxa!

³ Nuribia Nukën ꞌIbun ñu chaiirabu ꞌaxunkëx kananuna nuxribi ꞌitsaira kuëëankën.

⁴ ¡Nukën ꞌIbu nukamina nun ꞌakë ñukamaxa amiribishi upí ꞌinun ꞌimitëkënti ꞌain, anu uni ꞌikëma me anua ꞌuí ꞌibúkë usaribi ꞌinun kamina nu ꞌimiti ꞌain!

⁵ Uikaman kara tëmërai nitë́xëkin aín bëunan mëskúkinbi ñu ꞌapatia ax ka aín ñu ꞌapákë tuaia aín bimi bitsi munuma kuëëni kikanti ꞌikën.

⁶ ꞌIanan ka ñu bëru ñusutimi papiax tëmërai insa tankinbi ꞌapátankëxun, tuaia aín bimi pëñanu puruanan ꞌikúxun bëanan papixun bëi kuëënkanti ꞌikën.