Salmos 124 - Kashibo-Kakataibo Biblia

Diosan ka nu ënkinma ꞌakinia ki kantakë bana

¹ Nukën ꞌIbu nubëma ꞌixun nukama ꞌakianma ꞌaish karanuna uisa ꞌitsían —kiax ka Israel unikama bërí kiti ꞌikën—,

² Dios nubëma ꞌixun nukama ꞌakiniama ka axa numi nishkë unikaman nu ꞌanux mëníoka kuatsini ukin,

³ nukama añu ñubi sinánkë ꞌikëmabi këñukin ñu ꞌakë ꞌitsíanxa. Atux ka ꞌitsaira numi nishakëxa.

⁴ Usokin ꞌakin ka ꞌumpaxan ꞌëkin mapurukin ꞌakësa okë ꞌitsíanxa; ¡kushínbi bakan ñu rinbiankin uankë usaribi okin nukama ꞌakë ꞌitsíanxa! Diosan nu ꞌakianma ꞌain.

⁵ ¡Usokin ꞌan ka baka chubë́ira ax nunun ꞌinúkë ꞌitsíanxa!

⁶ ¡Usa ꞌain kananuna Nukën ꞌIbu ami sinánkin rabiti ꞌain, an ka axa numi nishkë unikaman uisakin kara ꞌaisatania usakin ꞌakian xëtan tëapakësa usokinshi ꞌatanun nu ëanma ꞌikën!

⁷ Usa ꞌain kananuna an ñuina biti ꞌunánkë unían anun ñuina pëchiu biti nankë; a chankabuini nukama chikiakën.

⁸ Nukën ꞌIbun ka nu ꞌakinia, an ka naíkamë ꞌëo ꞌimainun me uniokëxa usa ꞌixun.