Salmos 122 - Kashibo-Kakataibo Biblia

Jerusalén ëma ñui kantati bana

¹ ¡ꞌËx kana ësakian ꞌë kakankëx kuëëankën: Anuxun Dios rabiti xubunu kananuna kuanti ꞌain!

² Bërí kananuna Jerusalén, ¡xëkuë ꞌukëmëu ꞌain!

³ Jerusalén ëma birukin ꞌa ax ka kamabi unikama anu timë́ti ꞌa ꞌikën.

⁴ Usa ꞌain ka anu timë́xun Diosan anë rabi ñaká itsi ñaká itsinuax Israel unikama Diosan kásabi oi ꞌia.

⁵ Anu ka anuxua ꞌapukaman ñu ꞌatima ꞌakë unikama uisoti kara iskë a ꞌimainun. David anu ꞌikë ꞌapun xubu a ꞌikën.

⁶ Mitsux kamina mitsun nuitunënbi upíokin sinani kiti ꞌain: Jerusalén anu ka an mi nuibakë unikama chuámarua bukukanti ꞌikën.

⁷ ꞌIanan ka min ëma kënëara mëu ꞌikë unikama atúxribi uisabi okëma ꞌiti ꞌikën; ꞌimainun ka anu ꞌapu timë́kë xubukama axribi upíokin unin bërúankë ꞌiti ꞌikën.

⁸ Usa ꞌain kana bërí ꞌën xukë́nkama ꞌimainun ꞌën ꞌunánkë unikama kati ꞌain; Axa Jerusalénnu ꞌikë unikamax chuámarua ꞌiti kana kuëënin.

⁹ Usa ꞌain kana Jerusalén anuxun Dios rabiti xubu anua ꞌain, upíokin bërúankë ꞌiti kuëënin.