Salmos 121 - Kashibo-Kakataibo Biblia

Diosan ka bërúankin mi ꞌakinti ꞌikën kikë bana

¹ ꞌËx kana aín bashikama iskin sinani ꞌësai kin; ¿Uinuax kara an ꞌë ꞌakinti uti ꞌik?

² An ꞌë ꞌakinti ax ka Nukën ꞌIbunuax uti ꞌikën, an ka naíkamë ꞌëo ꞌimainun me uniokëxa.

³ ¡Dios an ka uínsaranbi ꞌatima ñu inuti tëmëranun mi ꞌimitima ꞌikën! ¡ꞌImainun ka uínsaranbi mi bëruankin ꞌakini ꞌuxtima ꞌikën!

⁴ Ax ka uínsaranbi ꞌuxkëma a ꞌikën; usa ꞌaish ka uínsaranbi Israel unikama bëruaibi ꞌuxima.

⁵ Nukën ꞌIbu ax ka an mi bërúankë a ꞌikën; usa ꞌixun ka Nukën ꞌIbu an uisaibi ꞌisama okin mi bërúankin ꞌakinia, uin kara an ꞌakësaribi okin mi rapasu ꞌixun ka mi ënkinma ꞌakinti ꞌikën.

⁶ Nëtë́n ka barin mi xarotima ꞌikën, ꞌimainun ka imë́bi ꞌuxë́n mi ꞌatima otima ꞌikën.

⁷ Nukën ꞌIbu Diosan ka kamabi ñu ꞌaisama inuti ꞌikëbi mi bërúaia usa ꞌixun ka an upitimi tsónun mi ꞌimiti ꞌikën.

⁸ Diosan ka mi bërúankin bërí ꞌananbi xënibua ꞌaínbi, uinu karamina kuani anuabi mi ꞌakinti ꞌikën.