Salmos 119 - Kashibo-Kakataibo Biblia

Nukën ꞌIbu Dios aín bana kikësokinshi rabiti bana

⁹⁷ ¡A mi ꞌë ꞌunánmikë min bana kana ꞌitsaira kuëënin! ¡Usa ꞌixun kana kamabi nëtën iskin anua ꞌunanin!

⁹⁸ Min bana ax kikësaibi ꞌiti ax ka ꞌënan asábi ꞌikën, usa ꞌikë kana uínsaranbi ëntima ꞌain; an ka axa ꞌëmi nishkë unikaman ꞌunánkësamaira ꞌinun ꞌë ñu ꞌunánmiaxa.

⁹⁹ Usa ꞌixun kana anua kuakin an ꞌë ꞌunánmikë unikaman ꞌunánkësamaira okin, ꞌunánkin min banakama upíokin ꞌitsaira sinanin.

¹⁰⁰ Usa ꞌain kana uni kaniakëkë kaman kuakësamaira okin ꞌën kuankin ꞌunánin, ꞌën kana a tanti banakama ax kikësabiokin ꞌain.

¹⁰¹ ꞌËn kana kamabi ñu ꞌatima ꞌën ꞌakëkama ëan, usa ꞌixun kana min banakama kikësokinshi ꞌain.

¹⁰² Usa ꞌixun kana mix kikësokinshi ꞌati bana a ënkëma ꞌain, mix kamina an ꞌë ꞌunánmikë a ꞌain.

¹⁰³ Mix usai ñu ꞌakatsi kikë bana ax ka bata ñubëtan sënë́nmaira ꞌikën, usa ꞌaish ka buna rëpa ain banua tankësamaira ꞌikën.

¹⁰⁴ Min banakama anuabi kana ꞌupiokin kuakin ꞌunan; usa ꞌixun kana unin këmëkinshi ñu ꞌakëkama a timain.

¹⁰⁵ Min banax ka achúshi tirítan anun ꞌëx niti a pëkakë usa ꞌikën, ꞌianan ka tirítan anu nankëxun ꞌën bai pëkakë usa ꞌikën.

¹⁰⁶ ꞌËn kana asérabi min bana kikësa okinbi ꞌaxunuxun mi kakën, usa ꞌain kana usakinbi mi ꞌaxunti ꞌain: ¡ꞌaxunkin kana mix kikësabi okinshi a tankin ꞌain!

¹⁰⁷ ꞌËn ꞌIbu Dios, kana ꞌitsaira tëmërai atsan; usa ꞌain kamina min bana kikësabiokin upí tani tsónun ꞌë ꞌimiti ꞌain.

¹⁰⁸ ꞌËn kuëbitanbi rabikëxun kuakin, kamina min banakama ꞌunánun ꞌën ꞌunánmiti ꞌain.

¹⁰⁹ ꞌËn tsótinëx ka ꞌatima ñu inuti bamatinuishi ꞌikën, usa ꞌaínbi kana min ꞌunánmikë min banakama a ꞌën manukëma ꞌain.

¹¹⁰ ꞌAisama unikaman ka ꞌë bamamikatsi kixun ami ꞌëx ꞌiti ñu ꞌë nanxunia, ꞌaínbi kana min ꞌunánmikë min banakama a manuiman.

¹¹¹ Min banakama ꞌën ꞌunánkë ax ka këñutima ꞌikën, a bana kaman ka chuáma tani kuëënun ꞌë ꞌimia.

¹¹² Usa ꞌain kana min banakama kikësokin ꞌanuxun sinanin, usa ꞌain kana xënibua ꞌaínbi bamakin ënuxun ꞌati ꞌain.

¹²⁹ Min ꞌunánmikë banakama ax ka upíira ꞌikën; usa ꞌikë kana ax kikësabiokin a bana tanin.

¹³⁰ Usa ꞌain ka an ꞌunánkë uni an ñuixunkëxun kuakin, min bana sinan mëninñushi unikama atúnribi kuankin ꞌunania.

¹³¹ ꞌËn kuëbitanbi banakin min bana kuaisa tankë an ka ꞌë ꞌitsaira kuëënun ꞌimia.

¹³² Mix ꞌën Dios ꞌixun, nuibakin ꞌë iskin, kamina an mi nuibakë unikamami ꞌakësaribi okin ꞌë nuibati ꞌain.

¹³³ Min bana kikësabi oi ninun ꞌimikin kamina; ꞌaisama ñukama ꞌaisatankinbi tënënun ꞌë ënkinma ꞌakinti ꞌain.

¹³⁴ Unin bënë́kinshi ꞌati sinánxun ꞌakë ñukama ꞌaxuma ꞌanun ꞌamixunma ꞌanan, kamina min bana kikësokinshi ꞌanun ꞌë ꞌimiti ꞌain.

¹³⁵ Min uni ꞌikë ꞌë upíokin isanan kamina, a tanti min bana akamaribi ꞌë ꞌunánmiti ꞌain.

¹³⁶ Unin min banakama kikësokin ꞌaiama isi, ꞌitsaira anun masá nuitukëbë ka ꞌën bëunkë ax ꞌumpax ꞌikësaira ꞌinun ꞌibuaxa.

¹³⁷ Dios mix kamina upíira ꞌain; usa ꞌain ka min banakama ax kikësokinshi ꞌati ꞌikën.

¹³⁸ Kamabi ax kikësabiokin ꞌati min bana kamami nu ꞌinan, ax ka upíira ꞌianan asérabi ꞌikën.

¹³⁹ ꞌËx kana ꞌitsaira nishin min bana kikësokin ꞌaíma, axa ꞌëmi nishkë unikamax ka ami manuaxa.

¹⁴⁰ Min bana ax ka ꞌitsaira ñu inúaxa, usa ꞌain kana min uni ꞌixun a bana kuakin mi nuibatin.

¹⁴¹ Mënin sinan ñushi ꞌikëa unin ꞌë istisama tankëxunbi kana, ꞌën min bana ax kikësoi ꞌikin ënkëma ꞌain.

¹⁴² Min ꞌakë ñukama axa xënibua ꞌaínbi upí ꞌimainun ka min ꞌunánmikë ñukama ax asérabi këmëkin ꞌunánmikëma ꞌikën.

¹⁴³ An ꞌë tëmëramikë ñukaman atsamikë ꞌikëbi ka a tanti min banakaman ꞌë kuëënun ꞌimiaxa.

¹⁴⁴ Min banakama ax ka upí ꞌikën; ¡usa ꞌain kamina ax kikësa okinshi upíokin ꞌai tsónun ꞌë ꞌunánmiti ꞌain!