Salmos 118 - Kashibo-Kakataibo Biblia

Diosan ka kushiira ꞌixun nu nuibatia kikë bana

¹ Nukën ꞌIbu kananuna axa upí ꞌikë asabika kakin rabiti ꞌain, usa ꞌain ka axa nuibanankë ax këñutima ꞌikën.

² Israel unikamax ka kiti ꞌikën: Diosax ka xënibua ꞌaínbi nuibanania.

³ Sacerdotekamax ka kiti ꞌikën: Dios an ka xënibua ꞌaínbi nu nuibatia.

⁴ An Dios rabikë unikamax ka kiti ꞌikën: Diosan ka xënibua ꞌaínbi ënkinma nu nuibatia.

⁵ Usa ꞌain kana masá sinani tëmërai bënë́kin Dios ñukákën; ñukákëxun kuakin ka ꞌë ꞌakiankëxa.

⁶ Dios ax ka ꞌëbë ꞌikën; usa ꞌain kana ꞌëx rakuëtima. ¿Usa ꞌikë kara unikaman uisa ꞌë oti ꞌik?

⁷ Dios an ka ꞌëbë ꞌixun ꞌë ꞌakinia. ¡Usa ꞌain kana an ꞌë ꞌatimokë unikamax ꞌatimokë isti ꞌain!

⁸ Dios mimi nux katamëkë ax ka asérabi upí ꞌikën usa ꞌain ka ax unimi katamëkësamaira ꞌikën.

⁹ Diosmi nux katamëkë ax ka uni ñu ꞌunánkëira, ami katamëkësamaira ꞌikën.

¹⁰ Bëtsi bëtsi menu ꞌikë unikaman ꞌë bëarabuinkë ꞌikëbi ka, Diosan aín anën ꞌën ira atu ꞌanun ꞌë ꞌakiankëxa.

¹¹ Amami amamixuan bëarabuinkëxunbi kana, ꞌën ira Diosan anën atu ꞌakën.

¹² Binan bëarabuinkësa okin ka ꞌë ꞌakankëxa, ꞌaínbi ka axira nishkin tsin muxa rëkirukin këñúkë usai ꞌikin; ¡ꞌëinra atu aín anën ꞌanun Diosan ꞌë ꞌakiankëxa!

¹³ Bënëkinshi ñu ꞌatima ꞌakë anunbi pakënun kixun ka ꞌë titikakankëxa, ꞌaínbi ka Diosan ax kushiira ꞌixun ꞌë ꞌakiankëxa.

¹⁴ ꞌËx kana Dios rabi kantain, usa ꞌikë ka an ꞌë kushiñu ꞌimia. ¡Ax ka an ꞌë ië́mikë a ꞌikën!

¹⁵ Uni aín sinan upíbu ax ka atun xubunuax Dios rabi kuëëni kantaia: ¡Ësai ki Diosan ka aín kushi ꞌinánkin nu ꞌakinia!

¹⁶ ¡Diosan ka aín kushin ñu chabuira ënkinma ꞌaia! ¡Uni aín sinan upíbu ax ka an ꞌimikëx aín xubunuax Dios rabi kuëëni kantaia!

¹⁷ ¡ꞌËx ñukëmapain ꞌixun kana, Diosan ꞌa ñukama ñuixunkin uni kati ꞌain!

¹⁸ Diosan ka ꞌaisamaira tëmëratanun ꞌë ꞌimiaxa, usokin ꞌakinbi ka ñutanun ꞌë ënkëma ꞌikën.

¹⁹ ¡Anuxun a rabiti xubu aín xëputi kamina xëókati ꞌain, anu atsínxun kana Dios asábi ka kakin rabitisa tanin!

²⁰ Ënëx ka anun Dios rabi atsínti xëkuë ꞌikën, usa ꞌain ka axa ami sinánkë unikamax anun atsinia.

²¹ ꞌËn kana mi ꞌasábi ka kain, Dios min kamina ꞌën kakëxun, kuakin an ꞌë ië́mikë a ꞌain.

²² An xubu ꞌakë unikaman timakin rakan maxá ax ka bërí maxá upí ami xubu ꞌakin uarukin nankë a ꞌikën.

²³ Ësakin ka Nukën ꞌIbun ꞌaxa, usa ꞌain kananuna nun iskëma ñu ꞌaia isan.

²⁴ Ënë nëtën ꞌakësaribi okin ka Nukën ꞌIbun nu ꞌakiankëxa: ¡usa ꞌain kananuna bërí chuámarua tani kuëënti ꞌain!

²⁵ Nukën ꞌIbu Dios nukama kamina, ¡ië́miti ꞌain! Nukën ꞌIbu Dios nun ꞌakë ñukamaxa upí ꞌinun kamina nu bërí ꞌakinti ꞌain.

²⁶ ¡Axa Nukën ꞌIbun anën ukë ax ka chuámarua ꞌiti ꞌikën! Usa ꞌain kananuna nun anuxun Dios rabiti xubu anuxunribi mitsu upíokin sinánxunti ꞌain.

²⁷ Nukën ꞌIbu an ka ax Dios ꞌixun; ¡nu pë́kaia! Usa ꞌain kamina fiesta ꞌakin taëokin i pëñan chukúmabu buánti ꞌain anuxun ñuina xaroti, ain mancha ꞌikë anubi kuanti ꞌain.

²⁸ Asabi ka kakin rabikin kana mix ꞌën Dios chaiira ꞌikë, mi rabiti ꞌain.

²⁹ Nukën ꞌIbu Dios kananuna asabika kakin axa upí ꞌikë rabiti ꞌain; an ka nu nuibakin uínsaranbi ënima.