Salmos 116 - Kashibo-Kakataibo Biblia

Min kamina ñutisa ꞌikëbi ꞌë ꞌakian kixun Dios kakë bana

¹ ꞌËn kana Nukën ꞌIbu nuibatin, an ka ꞌën ñukákëxun kuatia,

² an ka kamabi ꞌën ñukákë banakama kuakin ꞌë ꞌakianxa. ¡Usa ꞌikë kana tsókëpan ꞌixun kamabi nëtën ꞌën a ñukáti ꞌain!

³ ꞌËx kana ꞌatima ñu inuti bamati ꞌuramashira ꞌiakën, usai ꞌikin ꞌatimakin sinánkë anunbi kana, paëtani rakuëakën.

⁴ Usa ꞌain kana Nukën ꞌIbu ami sinánkin, ꞌëa ꞌakinun kakin ñukákën.

⁵ Usa ꞌaish ka Dios ax upí ꞌianan nuibanairakë ꞌikën; nun Dios an ka kamabi uni nuibairaia.

⁶ Diosan ka sinan mëninñushi unikama bërún aia. Usa ꞌixun ka an ꞌakinti ꞌaíma ꞌain kushiñumasa tani ꞌiabi ꞌë ꞌakiankëxa.

⁷ Usa ꞌain kana bërí, kuni chuámarua tanin, min kamina ꞌëbë upí ꞌixun ꞌë,

⁸ ñutisa ꞌikëbi ꞌakianan, bëunan mëskuti inkin ꞌatimakin sinaniabi ꞌë ꞌakiankën.

⁹ Usa ꞌain kana ꞌën Diosan kakëxun aín bana tankin an kakësabiokin, axa ënë menu tsókë unikamabë tsókë ꞌixunbi ꞌati ꞌain.

¹⁰ ꞌËx kana ꞌaisamairai tëmërai kixun ꞌunani kana, Diosmi katamëakën.

¹¹ Tëmërai bënëti kana ꞌëx ësai kiakën, kamabi unix ka ami katamëisama këmë ꞌikën.

¹² ¿ꞌËn ꞌIbu Dios uisoxun karana kamabi ñumi upíokin ꞌë ꞌaxunkë usaribi okin mi ꞌaxunti ꞌain?

¹³ ¡ꞌËa ꞌitsaira ñu ꞌaxunkë akama kupín kana, asabi ka kixun aín anë ñuikin rabiti ꞌain!

¹⁴ ꞌAnan kana ꞌën ꞌIbu usakin ꞌaxunkatsi kikë usakinbi, kamabi uni istánun ꞌaxunti ꞌain.

¹⁵ Nukën ꞌIbun ka an nuibakë unikama, bamaia isti kuëënima.

¹⁶ ¡ꞌËn ꞌIbu Dios, ꞌëx kana an mi ñu ꞌaxunkë uni a ꞌain! ¡ꞌËx kana an mi ñu ꞌaxunkë xanu aín tuá ꞌain! Min kamina an ꞌë nëakësa oxun ꞌatimamikë ñukama a ꞌë mëníoxuankën.

¹⁷ Usa ꞌain kana, ꞌëmi ñukama ꞌaxunkë a kupín ñuina rëxun xaroxunkin, asabika kakin min anë rabikin mi ñukáti ꞌain.

¹⁸ ꞌAnan kana ꞌën Dios usakin ꞌaxunkatsi kikë usakinbi, kamabi unin istánun ꞌaxunkin,

¹⁹ kana anuxun Dios rabiti xubu me mëníokë, ¡Jerusalén ëma nëbë́tsi ꞌikë, aín xubu anuxun ꞌaxunti ꞌain! ¡Usa ꞌain ka axëshi rabikë ꞌiti ꞌikën!